Sak 4
4
Gogulanu gu Nzambi!
1Milwaani ne mitswaaku ve ganegarenu mikarugi nde gunyi? Mikarugi mu banzale beenu tsibive tsikagageningi mu mirime myenu. 2Yenu diyibatsonzeme mu wuboke mumbare yenu digonenyungile pasi yivaave, te yenu disegonedile gyo. Yenu dine mitswaaku ne milwaani mumbare yenu dine nzale pasi yivaave, te yenu disegonedile gyo. Yenu disegonedile ginenu ne nzale mumbare yenu disegonevonde gyo. 3Te ga yenu divonde, yenu disegonedile mumbare bivonditsi byenu bisaandi bweedi: yenu dikavondi ke mu banzale ba yenu bene. 4Yenu vane dinde ga bagyetu bange butswaari#4.4 Gu Ndagi Yikale, Nzambi akabagusunu ga «mulumi» ne yitsuku gyandi ga «mugatsi» (Isayi 54.5). Ve laandenge yitsuku gyandi banzambi bamosi, yitsuku gyene gitsitsungu re: «nge butswaari» (Isayi 57.3).. Yenu diyatsi bweedi re mbaatsi buloongu bubu re mukolitsi wu Nzambi. Kagu mutu wuroonde bile mbaatsi buloongu bubu agubile mukolitsi wu Nzambi. 5Mireendu mi Nzambi misegoneyambile sage nzoolu re: «Nzambi ande ne nzale yivyogilile mu Dinyunyi di yandi aveege yetu#4.5 Mabigu mame masaandi mateendu gugare Ndagi Yikale nisi gu Yimoone. .» 6Nane, gyese gikaveegu manenu ne Nzambi giyi givyogilile byootsu, mumbare Mireendu migoneyambile gaandi re: «Nzambi akaduki bange manzange nzime, te akaveegi gyese gyandi gu babasigeme#4.6 Mugaande wu Banoongu 3.34; Sak aboonge mabigu gu Ndagi Yikale makaalusu gu diloongu di bagrek..» 7Kagu yululwanu Nzambi, te dukanu mukolitsi nzime ne akerine vale nenu. 8Gogulanu gu Nzambi ne yandi agugogule gu yenu. Gunganu makake menu, bange mabi; reetsanu mirime myeenu, yenu badine mirime mibeyi! 9Yabanu re yenu dinde gugare maguge, lilanu ne kayigenenganu, isevu gyeenu gikalugi bakoondu ne yinyunge gyeenu gikalugi ne ruungile. 10Gulumuganu ve wusu Fumu kere agumakise yenu.
Diyasosise bambaatsi
11Baane ba Tayi, diyagyelene. Wugonegyele vore wusosise mwaane tayandi, agonegyele nde mugage ne wusosise wo. Te ga yisosise mugage wu Nzambi, yisegonebegobise wo, yivane yikeke nzoonzi. 12Nane Nzambi yapiinze re wuveege mugage ne wuyi nzoonzi; yandi arungule wuyobule batu ne wuboke yawu. Ake yu, yinde nyi mu wusosise mbaatsyagu?
Sisanu dinzange
13Nemapape yulwanu me, yenu badigoneyambile re: «Nemunyi konane ngwaali yetu diguyende gu divule di siimbe, ne yetu digumane yilime gimoosi guune ne diguvage mukite ne digudile mbili badole.» 14Yenu badigoneyambile nane, yenu diseyabe dyaambu dikerugile yenu ngwaali. Nungyenze, yenu dinde ga ma dibuungi dikalabeni ke ma mu pesu dikyesi kere diretsyemugu. 15Yenu diyambile mbe nde re: «Ga Fumu aroonde, yetu digubile monyu ne diguvage dyaambu didi vore dina.» 16Nungyenze, yenu dikagani wuvage maambu mamanene, ne yenu dine manzange mu mo. Dinzange dyootsu di munoongu wene disaandi bweedi. 17Kagu, mutu wuyatsi wuvage dinyi, ga asavage dyo, yandi ane mbele yi dibi.
Attualmente Selezionati:
Sak 4: SNQ
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES