રોમનોનેં પત્ર 7
7
પએંણેંલા જીવન નો દાખલો
1હે વાલોં, તમું જાણો હે, હૂં મૂસા નું નિયમ જાણવા વાળં નેં કું હે કે ઝર તક મનખ જીવતું રે હે તર તક હેંનેં ઇપેર મૂસા ના નિયમ નો અધિકાર રે હે. 2કેંમકે પઈણીલી બજ્યેર મૂસા ના નિયમ ને પરમણે ઝર તક હેંનો આદમી જીવતો હે, તર તક વેયે હેંનેં હાતેં રેંવા હારુ નિયમ મ બંદાએંલી હે, પુંણ અગર હેંનો આદમી મરેં જાએ, તે વેયે હેંના આદમી ના નિયમ થી સુટી થાએં ગઈ હે. 3એંતરે હારુ અગર એક બજ્યેર પુંતાનો આદમી જીવતોસ વેહ, અનેં વેયે બીજા આદમી નેં રેંવા લાગેં જાએ તે વેયે સિનાળવું કરવા વાળી કેંવાએ હે, પુંણ અગર હેંનો આદમી મરેં જાએ, તે વેયે હેંના નિયમ થી સુટી થાએં જાએ હે, અનેં વેયે બીજો આદમી કરે તે હુદી સિનાળવું કરવા વાળી નેં કેંવાહે. 4વેમેંસ હે મારં ભાજ્યોં, તમું હુંદં ઇસુ મસીહ નેં હાતેં મૂસા ના નિયમ હારુ મરેંજ્ય હે, એંતરે કે તમું હાવુ બીજા ન એંતરે ઇસુ મસીહ ન થાએં જો, ઝી મરેંલં મહો પાસો જીવતો થાએંજ્યો. એંતરે કે આપું પરમેશ્વર ની સેવા હારુ જીવન જીવજ્યે. 5કેંમકે ઝર આપું પાપી સોભાવ પરમણે જીવન જીવતં હેંતં, તર મૂસા ના નિયમ ની જાણ કરાવેંલી પાપી અસ્યા આપડી મોત લાવવા હારુ આપડા શરીર મ કામ કરતી હીતી. 6પુંણ હાવુ આપું મૂસા ના નિયમ થી આજાદ થાએંજ્ય હે, કેંમકે આપું હેંનેં હારુ મરેંજ્ય ઝી એક ટાએંમેં આપનેં કેદી નેં જુંગ રાખતું હેંતું. હાવુ આપું પરમેશ્વર ની સેવા હેંના આત્મા ની આજ્ઞા પાળેંનેં નવા તરિકા થી કરેં સકજ્યે હે, નેં કે જુંના તરિકા થી ઝેંનેં મ લખેંલા નિયમ નેં પાળવું પડતું હેંતું.
મૂસા નું નિયમ અનેં પાપ
7એંનું મતલબ હું મૂસા નું નિયમેંસ પાપ હે? ના, બિલકુલ ના, પુંણ હૂં મૂસા ના નિયમ દુવારાસ પાપ નેં જાણેં સક્યો. મૂસા નું નિયમ અગર એંમ નેં કેંતું કે લાલસ નેં કરવી, તે લાલસ નેં હૂં નેં જાણતો. 8પુંણ મૂસા ના નિયમ દુવારા પાપ નેં મારી મ બદ્દી પરકાર ની લાલસ પેદા કરવા નો મુંખો મળેંજ્યો, કેંમકે મૂસા ના નિયમ વગર પાપ મરેંલો હે. 9હૂં તે પેલ પાપ નેં જાણતોસ નેં હેંતો, પુંણ ઝર મેંહ મૂસા ના નિયમ નેં જાણ્યુ, તે મારી મ પાપ ની અસ્યા થાવા મંડી અનેં હૂં પરમેશ્વર થી સિટી થાએંજ્યો. 10વેયોસ નિયમ પરમેશ્વરેં મારા જીવન હારુ આલ્યો હેંતો, પુંણ મનેં પરમેશ્વર થી સિટી કર દેંદો. 11કેંમકે મૂસા ના નિયમ દુવારા પાપેં મુંખો મેંળવેંનેં મનેં સેંતર્યો, અનેં હેંના નિયમ દુવારાસ મનેં પરમેશ્વર થી સિટી હુંદો કર દેંદો.
12એંતરે હારુ આપું કેં સકજ્યે હે કે મૂસા નું નિયમ પવિત્ર હે, અનેં આજ્ઞા પવિત્ર, ધર્મી અનેં તાજી હે. 13તે હું મૂસા નું નિયમ ઝી તાજું હેંતું વેયુ મારી હારુ મોત નું કારણ બણ્યુ? ના, બિલકુલ ના, પુંણ પાપેં મૂસા ના નિયમ નેં ઝી તાજું હેંતું, હેંનેં દુવારાસ મારી હારુ મોત લેંનેં આયો. ઇવી રિતી પાપેં સાબિત કર્યુ કે ખરેખર પાપ હું હે, અનેં આજ્ઞા થી ખબર પડી કે પાપ પૂરી રિતી થી ભુંડો હે.
મનખં નો મએં વાળો સોભાવ
14કેંમકે આપું જાણન્યે હે કે મૂસા નું નિયમ તે આત્મિક હે, પુંણ હૂં માણસ હે અનેં હૂં પાપ ની ગુલામી મ હે. 15ઝી હૂં કરું હે હેંનેં હૂં નહેં હમજતો, કેંમકે હૂં ઝી કરવા માંગું હે વેયુ નહેં કરતો, પુંણ ઝેંનેં હૂં નફરત કરું હે વેયુસ કરું હે. 16અગર ઝી હૂં નહેં કરવા માંગતો, વેયસ ભુંડં કામં કરું હે, તે હૂં માન લું હે કે મૂસા નું નિયમ તાજું હે. 17ઇવી દસ્યા મ ઝી ભુંડં કામં હૂં કરું હે, એંનો મતલબ વેયુ હૂં નહેં કરતો, પુંણ મારી મ રેંવા વાળો પાપ મનેં કરાવે હે. 18કેંમકે હૂં જાણું હે, કે મારી મ એંતરે મારા શરીર મ કઇ અસલ ની વસ્તુ નહેં રિતી. મનેં તાજં કામં કરવા ની અસ્યા તે હે પુંણ વેયુ મારી થી થાતું નહેં. 19કેંમકે ઝી તાજું કામ કરવા ની અસ્યા હૂં કરું હે, વેયુ તે નહેં કરતો, પુંણ ઝી ભુંડું કામ કરવા ની અસ્યા હૂં કરતોસ નહેં, વેયુ હૂં કરેં કરું હે. 20ઝી હૂં નહેં કરવા માંગતો વેયુ કરું હે, એંનો મતલબ વેયુ હૂં નહેં કરતો, પુંણ મારી મ રેંવા વાળો પાપ મનેં કરાવે હે.
21ઇવી રિતી મારો અનુભવ એંવો હે કે ઝર હૂં ભલાઈ કરવા ની અસ્યા કરું હે, તે મારી થી ભુંડાઈસ થાએ હે. 22કેંમકે પરમેશ્વર ના નિયમ હારુ હૂં પૂરા હૃદય થી તે ઘણો ખુશ થું હે, 23પુંણ મારા શરીર ન અંગં મ બીજા પરકાર નું નિયમ ભળાએ હે, ઝી મારા મન ના નિયમ હામેં ઝઘડો કરે હે, અનેં મનેં પાપ ના નિયમ નો ગુલામ બણાવે હે, ઝી મારા શરીર મ રે હે. 24હૂં કેંવો દુઃખી માણસ હે, મોત ને રસ્તે લે જાવા વાળા પાપ ના ગુલામ થાએંલા શરીર થી મનેં કુંણ સુંડાવહે? 25હૂં પરમેશ્વર નું ધનેવાદ કરું હે, ઝેંને પ્રભુ ઇસુ મસીહ દુવારા મનેં બસાયો. એંતરે હૂં પુંતે મન થી તે પરમેશ્વર નું નિયમ પાળું હે, પુંણ શરીર થી પાપ નું નિયમ પાળું હે.
Attualmente Selezionati:
રોમનોનેં પત્ર 7: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.
