રોમનોનેં પત્ર 13
13
અધિકારજ્ય ના અધીન મ રેંવું
1દરેક મનખ પુંતાનં અધિકારજ્ય ના અધીન મ રે, કેંમકે બદ્દા અધિકાર પરમેશ્વરેંસ આલ્યા હે, વેયા પરમેશ્વર દુવારાસ ઠરાવા મ આયા હે. 2એંતરે હારુ ઝી અધિકાર આલવા મ આયા હે હેંનો ઝી વિરોધ કરે હે, વેયુ મનખ પરમેશ્વર ના નિયમ નો વિરોધ કરે હે, અનેં વિરોધ કરવા વાળં નેં દંડ મળહે. 3તાજું કામ કરવા વાળં નેં અધિકારી થી સમક નહેં લાગતી, પુંણ ઝી ભુંડં કામં કરે હે હેંનનેં સમક લાગે હે. એંતરે હારુ ઝી અધિકારી થી સમકવા નહેં માંગતું, વેયુ તાજું કામ કરે, એંતરે કે અધિકારી તમારું માન કરે. 4કેંમકે અધિકારી મનખં તમારી ભલાઈ હારુ પરમેશ્વર દુવારા પસંદ કરેંલં સેંવક હે, એંતરે હારુ ઝર તમું ભુંડું કામ કરો હે, તરસ તમનેં હેંનની સમક લાગે હે, કેંમકે દંડ આલવા હારુ હેંનં કન પૂરો અધિકાર હે. વેય તે ભુંડું કામ કરવા વાળં નેં દંડ આલવા હારુ પરમેશ્વર દુવારા પસંદ કરેંલં સેંવક હે. 5તમું ખાલી અધિકારજ્ય ના દંડ થી બસવા હારુસ હેંનં ના અધીન મ નહેં રો, પુંણ એંતરે હારુ હુંદં અધીન રો કે તમારા વિસાર સહી રે. 6એંતરે હારુ વેરો હુંદો ભરો, કેંમકે અધિકારી પરમેશ્વર ના સેંવક હે, અનેં વેયા કાએંમ હેંનાસ કામ મ લાગેંલા રે હે. 7એંતરે હારુ દરેક ના હક નો ભાગ હેંનનેં આલો, ઝેંનેં કન વેરો લેંવાનો હક હે હેંનેં વેરો ભરો. અનેં ઝેંનેં કન ટેક્ષુ લેંવાનો અધિકાર હે, હેંનેં ટેક્ષુ ભરો. ઝીની બીક રાખવી જુગે હીની બીક રાખો. ઝેંનું ઈજ્જત કરવું જુગે હેંનું ઈજ્જત કરો.
એક-બીજા હામેં ફરજ
8તમારે બદ્દનેં ખાલી એકેંસ વાત નું લેંણેદાર રેંવું જુગે, અનેં વેયુ લેંણું આ હે કે એક-બીજા હાતેં પ્રેમ રાખવો. કેંમકે ઝી એક-બીજા હાતેં પ્રેમ રાખે હે, વેયુસ પૂરુ નિયમ પાળે હે. 9કેંમકે મૂસા ના નિયમ મ ઘણી આજ્ઞા હે, ઝેંવું કે સિનાળવું નેં કરવું, કેંનેં યે માર નેં દડવું, સુરી નેં કરવી, લાલસ નેં કરવી, અનેં હેંનેં સુંડેંનેં બીજી કઇ બી આજ્ઞા વેહ તે બદ્દનો સાર ઇની આજ્ઞા મ મળે હે, “પુંતાના પાડુસી ઇપેર પુંતાનેં જેંમ પ્રેમ રાખ.” 10કેંમકે બીજં ઇપેર પ્રેમ રાખવા વાળું કેંરં યે હેંનું ભુંડું નહેં કરતું, એંતરે હારુ અગર આપું એક-બીજા હાતેં પ્રેમ રાખજ્યે હે, તે આપું પરમેશ્વર નું પૂરુ નિયમ પાળજ્યે હે.
11તમારે એંવુંસ કરવું જરુરી હે, કેંમકે તમું જાણો હે કે આ કેંવો ટાએંમ હે, હાવુ તમારે નીંદર મહું જાગવા નો ટાએંમ આવેંજ્યો હે, કેંમકે ઝેંના ટાએંમ થી આપેં પ્રભુ ઇસુ ઇપેર વિશ્વાસ કર્યો હેંતો, હેંના ટાએંમ ના હિસાબ થી હાવુ આપડું તારણ ઘણું નજીક આવેંજ્યુ હે. 12લગ-ભગ રાત હાવુ પૂરી થાવા કરે હે, અનેં ઇજવાળું થાવા કરે હે, એંતરે હારુ આપું ઇન્દારા ન ભુંડં કામં કરવા નું સુંડેંનેં, ઇજવાળા મ લડવા હારુ હત્યારં બાંદેં લેંજ્યે. 13દાડા ના ઇજવાળા મ જીવન જીવવા વાળં મનખં હાતેં વેવહાર કરજ્યે, નેં કે મોજ-મસ્તી મ, નેં પીવા મ, નેં સિનાળવું કરવા મ, નેં લુસાઈ કરવા મ, નેં ઝઘડા કરવા મ, અનેં નેં એક-બીજા ઇપેર બળવા મ જીવન જીવજ્યે. 14પુંણ પ્રભુ ઇસુ મસીહ આપડું હતિયાર હોવું જુગે, અનેં શરીર ની ભુંડી લાલસ પૂરી કરવા ની કોશિશ નહેં કરો.
Attualmente Selezionati:
રોમનોનેં પત્ર 13: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.
