1 પિતરનો પત્ર 2
2
જીવતો ભાઠો અનેં પવિત્ર પરજા
1એંતરે હારુ દરેક પરકાર ના ભુંડા વેવહાર થી સિટી રો, બીજં હાતેં દગો નહેં કરો, ઢોંગ નહેં કરો, એક-બીજા ઇપેર બળો નહેં, કુઇ ની યે નિંદા નહેં કરો. 2પુંણ ઝીવી રિતી એક નવું પેદા થાએંલું સુંરું પુંતાની આઈ નું દૂદ ધાવવા હારુ અસ્યા રાખે હે, હીવીસ રિતી તમું હુંદં પરમેશ્વર નું વસન હિકવા ની અસ્યા રાખો, એંતરે કે તમું આત્મિક રિતી મજબૂત બણેં સકો અનેં તમું પૂરી રિતી પરમેશ્વર દુવારા બસાવા મ આવો. 3કેંમકે પવિત્ર શાસ્ત્ર મ લખેંલું હે, “તમવેં અનુભવ કરેંનેં જાણ લેંદું હે કે પ્રભુ ભલો હે.”
4તમું પ્રભુ ઇસુ કન આય હે, ઝી એક જીવતા ભાઠા જુંગ હે, હેંનો ઘણં-બદં મનખંવેં નકાર કર્યો પુંણ પરમેશ્વરેં હેંનેં પસંદ કર્યો અનેં પરમેશ્વર ની નજર મ વેયો ઘણો કિમતી હે. 5તમું હુંદં પુંતે જીવતા ભાઠા જુંગ હે, ઝેંનેં પરમેશ્વર પુંતાનેં હારુ ઘેર બણાવા તમનેં કામ મ લે હે. એંતરે કે તમું પવિત્ર યાજક નો સમાજ બણેંનેં, આત્મિક ભુંગ સડાવેં સકો, ઝેંનેં પરમેશ્વર ઇસુ મસીહ નેં લેંદે ગરહણ કરે હે. 6ઇયુ ઝેંવું પવિત્ર શાસ્ત્ર મ લખેંલું હે વેમેંસ હે,
“ભાળો, મેંહ એક કિમતી ભાઠા નેં પસંદ કર્યો હે, ઝી ખુંણા નો ખાસ ભાઠો હે, હેંનેં સિય્યોન સેર મ મેંલું હે,
અનેં ઝી કુઇ હેંનેં ઇપેર વિશ્વાસ કરહે હેંનું કાળું મોડું નેં થાહે.”
7તમું ઝી ઇસુ મસીહ ઇપેર વિશ્વાસ કરતં વેહ, તમારી હારુ ઇયો ભાઠો ઘણો કિમતી હે, પુંણ ઝી મનખં હેંનેં ઇપેર વિશ્વાસ નહેં કરતં હેંનના બારા મ પવિત્ર શાસ્ત્ર મ લખેંલું હે કે,
“કારિગરંવેં ઝેંના ભાઠા નેં કામ મ લેંવા હારુ નકમ્મો ગણ્યો, વેયોસ ઘેર ના ખુંણા નો ખાસ ભાઠો બણેંજ્યો.”
8અનેં ફેંર પવિત્ર શાસ્ત્ર મ એંમ હુંદું લખેંલું હે, “મનખં નેં ઠેહ વાગવા વાળો ભાઠો ઇયોસ હે, અનેં ઇયોસ ઠેહ વાગેંનેં પાડવા વાળો ભાઠો હે,” કેંમકે વેય વિશ્વાસ કરવા નહેં માંગતં, એંતરે હારુ વેય ઠોકર ખાએંનેં પડેં જાએ હે, પરમેશ્વરેં હેંનં હાતેં હેંમેંસ થાવા હારુ યોજના બણાવી હીતી. 9પુંણ તમું પરમેશ્વર ન પસંદ કરેંલં મનખં, અનેં યાજકં નો ટુંળો હે ઝી રાજા ની સેવા કરે હે, પવિત્ર મનખં અનેં પરમેશ્વર ની પુંતાની પરજા હે. હેંને તમનેં ઇન્દારા મહા પુંતાના ગજબ ના ઇજવાળા મ તેંડ્ય હે, એંતરે કે તમું હેંનં ગજબ ન કામં ના બારા મ વતાડેં સકો. 10પવિત્ર શાસ્ત્ર મ તમારા બારા મ હાસું લખ્યુ હે કે, તમું પેલ પરમેશ્વર ન મનખં નેં હેંતં, પુંણ હાવુ તમું પરમેશ્વર ન મનખં હે. પેલ તમું પરમેશ્વર ની દયા નેં જાણતં નેં હેંતં, પુંણ હાવુ તમું હેંનેં જાણો હે, કેંમકે હેંને તમારી ઇપેર પુંતાની દયા વતાડી હે.
મસીહી જવાબદારી
11હે વાલોં, તમું ઇની દુન્ય મ પરદેશી અનેં પરવાસ કરવા આવેંલા મનખ જુંગ હે, એંતરે હારુ હૂં તમનેં અરજ કરું હે કે તમું બદ્દી પરકાર ની ભુંડી શારિરીક અસ્યા થી બસો, કેંમકે ઇયે તમારા આત્મા ના વિરુધ મ કામ કરે હે. 12અવિશ્વાસી મનખં મ તમારો વેવહાર અસલ રેંવો જુગે, એંતરે કે વેય ઝીવી-ઝીવી વાતં મ તમનેં ખરાબ કામં કરવા વાળં હમજેંનેં તમારી નિંદા કરે હે, વેય તમારં ભલાઈ ન કામં ભાળેંનેં ઇસુ મસીહ નેં પાસો આવવા ને દાડે પરમેશ્વર ની મહિમા કરે.
અધિકારજ્ય ના અધીન રેંવું
13તમું હેંનં બદ્દ અધિકારજ્ય ના અધીન મ રો, ઝેંનનેં મનખં દુવારા સુંટવા મ આવે હે, કેંમકે પ્રભુ ની ઇયેસ અસ્યા હે. રાજા ના અધીન મ રો, ઝી બદ્દ મનખં ઇપેર રાજ કરે હે. 14અનેં રાજપાલ ના અધીન મ હુંદં રો, કેંમકે ઝર મનખં ભુંડં કામં કરતં વેહ, તે હેંનનેં દંડ આલવા હારુ અનેં ઝી તાજં કામં કરતં વેહ તે હેંનની વાહ-વાહી કરવા હારુ હેંનં રાજપાલંનેંસ રાજા ઉપયોગ કરે હે. 15કેંમકે પરમેશ્વર ની અસ્યા ઇયેસ હે, તમું તાજં કામં કરો, એંતરે કે તમું હેંનં મુરખ મનખં નેં તમારા વિરુધ મ ગુંનો લગાડવા થી રુંકેં સકો, ઝી પરમેશ્વર નેં નહેં જાણતં. 16તમું પુંતે આજાદ મનખ નેં જુંગ જીવન જીવો, કેંમકે આપડે પ્રભુ ઇસુ મસીહવેં તમનેં આજાદ કર દેંદં હે, પુંણ હીની આજાદી ની ઓઠ મ ભુંડં કામં નહેં કરો, પુંણ તમું પરમેશ્વર ન સેંવકં જુંગ વેવહાર કરો. 17બદ્દનું માન કરો, બદ્દ વિશ્વાસી ભાઈ-બુંનં હાતેં પ્રેમ રાખો, પરમેશ્વર ની બીક રાખો, રાજ કરવા વાળં અધિકારજ્ય નું માન કરો.
ઇસુ મસીહ આપડો નમૂનો
18હે નોકરોં, દરેક પરકાર ની બીક રાખેંનેં પુંતાના માલિક ના અધીન મ રેંનેં હેંનનું કેંદેંલું માનો, ઇવી રિતી બદ્દ માલિકં ના અધીન મ રો, ઝી તાજો અનેં હમજદાર વેહ, અનેં ઝી કડક વેવહાર કરવા વાળો વેહ, હેંના અધીન મ હુંદં રો. 19કેંમકે પરમેશ્વર બદ્દું જાણે હે એંમ જાણેંનેં અગર આપું કઇ વાક વગર દુઃખ વેંઠજ્યે હે, તે પરમેશ્વર આપડી થી ખુશ થાએ હે. 20પુંણ અગર તમવેં ગુંનો કરેંનેં માર ખાદી વેહ અનેં હેંનેં વેંઠો હે તે હેંનેં મ તમારી વાહ-વાહી કરવા નું કઇ મતલબ નહેં, પુંણ અગર તાજું કામ કરેંનેં દુઃખ વેંઠો હે અનેં ધીરજ રાખો હે, તે પરમેશ્વર ખુશ થાએ હે. 21તમનેં એંનેં હારુસ પરમેશ્વરેં બુંલાય હે, કેંમકે ઇસુ મસીહ હુંદો તમારી હારુ દુઃખ વેંઠેંનેં એક નમૂનો બણ્યો હે, કે તમું હુંદં હેંને પરમણે જીવન જીવો. 22પવિત્ર શાસ્ત્ર મ લખેંલું હે, “હેંને કેંરં યે પાપ નહેં કર્યો, અનેં વેયો કેંરં યે ઝૂઠ નહેં બુંલ્યો.” 23હેંને પુંતે નિંદા વેંઠેંનેં હુદી હામેં નિંદા નહેં કરી, અનેં ઝર મનખંવેં હેંનેં ઘણો વિતાડ્યો તે હેંને કેંનેં યે ધમકી નહેં આલી, પુંણ હેંનેં પુંતાનું જીવન પરમેશ્વર ના હાથ મ હુંપેં દેંદું ઝી હમેશા સહી તરિકા થી બદ્દ મનખં નો નિયા કરે હે. 24ઝર ઇસુ મર્યો, તે વેયો પુંતે આપડં પાપં નેં પુંતાના શરીર ઇપેર લેંનેં ક્રૂસ ઇપેર સડેંજ્યો, હેંને એંમ એંતરે હારુ કર્યુ કે આપું પાપ કરવો બંદ કર દેંજ્યે અનેં ધાર્મિકતા થી જીવન જીવવા મંડજ્યે, અનેં હેંના ઘા પડવા થી તમું હાજં થાએંજ્ય હે. 25તમું પેલ ભટકેંલં ઘેંઠં નેં જેંમ હેંતં, પુંણ હાવુ તમું તમારા આત્મા ના રખવાળ અનેં ગુંવાળ કન વળેં આય હે.
Attualmente Selezionati:
1 પિતરનો પત્ર 2: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.