1 યોહાન 5
5
દુન્ય ઇપેર જીત મેંળવવી
1ઝી કુઇ એંમ વિશ્વાસ કરે હે કે ઇસુસ મસીહ હે, વેય પરમેશ્વર ન બેંટા-બીટી હે, અનેં ઝી કુઇ પરમેશ્વર ઇપેર પ્રેમ રાખે હે, વેય હેંનં બેંટા-બીટી ઇપેર હુંદં પ્રેમ રાખે હે. 2ઝર આપું પરમેશ્વર ઇપેર પ્રેમ રાખજ્યે હે અનેં હીની આજ્ઞાવં નેં માન્યે હે, તે હેંનેં થીસ આપું જાણન્યે હે કે આપું પરમેશ્વર ન બેંટા-બીટી ઇપેર પ્રેમ રાખજ્યે હે. 3પરમેશ્વર ઇપેર પ્રેમ રાખવો ઇયુ હે કે આપું હીની આજ્ઞાવં નેં માન્યે, અનેં હીની આજ્ઞાવેં માનવી કાઠી નહેં. 4કેંમકે ઝી કુઇ પરમેશ્વર ન બેંટા-બીટી હે, વેય દુન્ય ઇપેર જીત મેંળવે હે, અનેં વેયે જીત આપડો વિશ્વાસ ઝેંનેં થી દુન્ય ઇપેર જીત મિળવી હે. 5ઝી કુઇ ઇસુસ પરમેશ્વર નો બેંટો હે એંમ કરેંનેં વિશ્વાસ કરે હે, ખાલી વેયુસ દુન્ય ઇપેર જીત મેંળવે હે.
ઇસુ મસીહ ના બારા મ ગવાહી
6આ ઇસુ મસીહ હે, ઝેંનેં પરમેશ્વરેં ઇની દુન્ય મ મુંકલ્યો, અનેં હેંને પાણેં થી બક્તિસ્મ લેંદું, અનેં ફેંર ઝર હીની મોત થાઈ તે હેંનું લુઈ વેવડાયુ. વેયો ખાલી બક્તિસ્મ લેંવા હારુસ નેં પુંણ ક્રૂસ ઇપેર હેંનું લુઈ વેવડાવેંનેં મરવા હારુ હુંદો આયો હેંતો. અનેં ઝી ઇસુ ના બારા મ ગવાહી આલે હે, વેયો પવિત્ર આત્મા હે. 7-8અનેં વેયો હમેશા હાસુંસ બુંલે હે, ગવાહી આલવા વાળં તાંણ હે, પવિત્ર આત્મા, અનેં પાણેં, અનેં લુઈ અનેં તાંણ યે એકેંસ હરકી ગવાહી આલે હે. 9ઝર આપું મનખં ની ગવાહી માન લેંજ્યે હે, તે પરમેશ્વર ની ગવાહી તે હેંનેં કરતં વદેંનેં હે, અનેં પરમેશ્વર ની ગવાહી આ હે કે હેંને પુંતાના બેંટા ના બારા મ ગવાહી આલી હે. 10ઝી પરમેશ્વર ના બેંટા ઇસુ ઇપેર વિશ્વાસ કરે હે, વેયુ જાણે હે કે પરમેશ્વરેં ઝી કઇ કેંદું હે વેયુ હાસું હે. પુંણ ઝેંને પરમેશ્વર ઇપેર વિશ્વાસ નહેં કર્યો, હેંને પરમેશ્વર નેં ઝૂઠો માન્યો હે, કેંમકે હેંને હીની ગવાહી ઇપેર વિશ્વાસ નહેં કર્યો ઝી પરમેશ્વરેં પુંતાના બેંટા ઇસુ ના બારા મ આલી હીતી. 11અનેં વેયે ગવાહી આ હે કે પરમેશ્વરેં આપનેં અમર જીવન આલ્યુ હે, અનેં ઇયુ અમર જીવન આપનેં પરમેશ્વર ના બેંટા ઇસુ દુવારા મળ્યુ હે. 12ઝી કાએંમ પરમેશ્વર ના બેંટા ની સંગતિ મ રે હે, હેંનેં કન અમર જીવન હે. અનેં ઝી હીની સંગતિ મ નહેં રેંતું, હેંનેં કન અમર જીવન હુંદું નહેં.
અમર જીવન
13હૂં આ કાગળ તમનેં લખેં રિયો હે, કે ઝી તમું પરમેશ્વર ના બેંટા ના નામ ઇપેર વિશ્વાસ કરો હે, એંતરે કે તમું જાણેં સકો કે તમારી કન અમર જીવન હે. 14અનેં આપનેં પરમેશ્વર હાતેં જુંડાએંલું રેંવા થી હિમ્મત મળે હે, વેયુ આ હે કે અગર આપું હીની મરજી પરમણે કઇક માંગજ્યે હે તે વેયો આપડી હામળે હે. 15ઝર આપું જાણન્યે હે કે ઝી કઇ પરમેશ્વર કન આપું માંગજ્યે હે, વેયો આપડી હામળે હે, તે આપું ઇયુ હુંદું જાણન્યે હે કે ઝી કઇ આપેં હેંનેં કનહું માંગ્યુ હે, વેયુ મેંળવ્યુ હે.
16અગર કુઇ વિશ્વાસી ભાઈ કે બુંન નેં એંવો પાપ કરતં ભાળે ઝેંનો બદલો મોત નહેં, તે વેયુ પરમેશ્વર નેં હેંનેં હારુ પ્રાર્થના કરે, ઝેંને એંવો પાપ કર્યો હે ઝેંનો બદલો મોત નહેં, તે પરમેશ્વર હેંનેં અમર જીવન આલહે. અનેં પાપ એંવો હુંદો થાએ હે ઝેંનો બદલો મોત હે, હેંના બારા મ હૂં તમનેં પરમેશ્વર નેં પ્રાર્થના કરવા હારુ નહેં કેંતો. 17બદ્દી પરકાર ની ભુંડાઈ તે પાપ હે, પુંણ એંવો પાપ હુંદો હે ઝેંનો બદલો મોત નહેં.
18આપું જાણન્યે હે, કે ઝી કુઇ પરમેશ્વર નું બેંટા-બીટી હે, વેયુ પાપ મ જીવન નહેં જીવતું, પુંણ હેંનનેં પરમેશ્વર નો બેંટો ઇસુ બસાવેં રાખેં હે, અનેં શેતાન હેંનનેં અડેં હુંદો નહેં સક્તો.
19આપું જાણન્યે હે કે આપું પરમેશ્વર ની તરફ થી હે, ઝર કે આખી દુન્ય શેતાન ના કબજા મ હે. 20આપું ઇયુ હુંદું જાણન્યે હે કે પરમેશ્વર નો બેંટો ઇસુ મસીહ આવેંજ્યો હે, અનેં હેંને આપનેં હમજ આલી હે કે આપું હેંના હાસા પરમેશ્વર નેં વળખજ્યે, અનેં આપું હીની સંગતિ મ રેંજ્યે હે, એંતરે હારુ કે આપું હેંના બેંટા ઇસુ મસીહ ની સંગતિ મ રેંજ્યે હે, અનેં ઇયોસ હાસો પરમેશ્વર અનેં અમર જીવન હે. 21હે બાળકોં, તમું મૂર્તિ થી સિટી રો.
Attualmente Selezionati:
1 યોહાન 5: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.