1 કરિંથીઓને 4
4
મસીહ ના સેંવક
1મનખં હમનેં મસીહ ના સેંવક અનેં પરમેશ્વર ના ભેદ વતાડવા વાળા ખજાંસી હમજે. 2એક ખજાંસી નેં હુંપેંલા કામ મ ઈમાનદાર રેંવું જુગે. 3પુંણ મારી હારુ કઇ સિંતા ની વાત નહેં, તમું કે બીજુ કુઇ અધિકારી મનેં પારખે, કે હૂં ઈમાનદાર હે કે નહેં. આં તક કે હૂં પુંતે હુંદો નહેં પારખતો કે હૂં ઈમાનદાર હે કે નહેં. 4કેંમકે મારું મન મનેં કઇની યે વાત મ દોષી નહેં ઠહરાવતું, પુંણ એંને આધારેં હૂં દોષ વગર સાબિત નહેં થાતો, કેંમકે મનેં પારખવા વાળો પ્રભુ હે. 5એંતરે હારુ ઝર તક પ્રભુ પાસો નેં આવે, તર તક કેંનો યે નિયા નહેં કરો, વેયોસ ઇન્દારા મ હતાએંલી વાતેં ઇજવાળા મ લાવહે, અનેં દરેક ના મન ના ઈરાદા બદ્દનેં હામેં પરગટ કરહે, તર દરેક મનખ નેં મળવા વાળી વાહ-વાહી પરમેશ્વર દુવારા મળહે.
6હે વાલોં, મેંહ તમનેં એંમ હિકાડવા હારુ મારો અનેં અપુલ્લોસ નો દાખલો આલેંનેં સરસા કરી હે એંતરે કે પવિત્ર શાસ્ત્ર મ ઝી લખેંલું હે, હેંનેં કરતં અગ્યેડ તમારે નેં વદવું જુગે, તર તમું એંમ કેંનેં ઘમંડ નહેં કરો કે મારો અગુવો તાજો હે અનેં તારો અગુવો ખરાબ હે. 7તમનેં બીજં કરતં ખાસ કેંનેં બણાય? અનેં ઝી કઇ તમારી કન હે વેયુ બદ્દું પરમેશ્વરેં આલ્યુ હે, તે ફેંર હેંનેં મ ઘમંડ કરવા જીવી કઇ વાત નહેં.
8તમું તે પુંતાના બારા મ એંમ વિસારો હે કે હમારી બદ્દી આત્મિક જરુરતેં પૂરી થાએં ગઈ હે, અનેં હમું તે ધનવાન થાએંજ્ય હે. અનેં તમનેં એંમ હુંદું લાગતું વેંહે કે હમવેં તે તમારી વગર રાજાવં જુંગ રાજ કરવું સલુ કર દેંદું હે. અગર તમું ખરેખર રાજ કરવું સલુ કર દેંહો તરતે હૂં ખુશ થાએં જએં એંતરે કે હમું હુંદા તમારી હાતેં રાજ કરેં સકહું. 9મનેં તે એંમ લાગે હે કે પરમેશ્વરેં હમનેં પસંદ કરેંલં સેંલંનેં હેંનં મરવા વાળં નેં જુંગ સિલ્લી લાએંણ મ ઇબા કર્યા હે. કેંમકે હમું હરગદૂતં અનેં ઇની દુન્ય ન મનખં હારુ તમાશો બણેંજ્યા હે. 10હમું મસીહ ના બારા મ પરસાર કરજ્યે હે એંતરે હારુ મનખં ની નજર મ હમું મુરખ હે, અનેં તમું એંમ વિસારો હે કે હમું બુદ્ધિમાન વિશ્વાસી હે, મનખં ની નજર મ હમું કમજોર હે, પુંણ તમું તાકતવર હે, અનેં તમનેં માન મળે હે, પુંણ હમું તે ઈજ્જત વગર ના થાજ્યે હે. 11હમું આજ તક ભુખા અનેં તરહેંલા હે, અનેં હમારી કન પેરવા હારુ તાજં સિસરં હુંદં નહેં, હમું મનખં દુવારા સતાવ વેંઠજ્યે હે, અનેં હમારી કન રેંવા હારુ ઘેરં હુંદં નહેં. 12પુંતાના ભરણ-પોષણ કરવા હારુ હમું ઘણી મેહનત કરજ્યે હે, ઝર મનખં હમારા વિરુધ મ બુંલે હે તર હમું હેંનનેં આશિષ આલજ્યે હે, ઝર હમારો સતાવ થાએ હે તે હમું વેંઠજ્યે હે. 13ઝર મનખં હમનેં બદલમ કરે હે, તે હમું હેંનં હાતેં નરમાઈ થી વાત કરજ્યે હે. આજ તક મનખં હમારું માન નહેં કરતં, વેય હમનેં કસરા-કુટા નેં જુંગ હમજે હે.
સેતવણી
14હૂં તમનેં લાજેં મારવા હારુ ઇયે વાતેં નહેં લખતો, પુંણ મારું મક્ષદ તમનેં શિક્ષણ આલવું હે, કેંમકે તમું મારં વાલં સુંરં જુંગ હે અનેં તમારી હાતેં હૂં ઘણો પ્રેમ કરું હે. 15ભલે મસીહ મ તમનેં હિકાડવા વાળા હજારોં વેંહે, તે હુંદા વેયા બદ્દા તમારા બા જુંગ નહેં ગણાતા, પુંણ બદ્દ કરતં પેલ ઇસુ મસીહ નો તાજો હમિસાર મેંહ તમનેં હમળાયો હે એંતરે હારુ હૂં તમારા બા જુંગ હે. 16અનેં હૂં તમનેં અરજ કરું હે કે મારી જુંગ જીવન જીવો. 17એંનેં લેંદે મેંહ તીમુથિયુસ નેં ઝી પ્રભુ મ મારો વાલો અનેં વિશ્વાસુ સુંરા જુંગ હે ઝેંનેં હૂં ઘણો પ્રેમ કરું હે, હેંનેં તમારી કન મુંકલ્યો. વેયો તમનેં મારા બારા મ વતાડહે કે હૂં મસીહ મ કેંવું જીવન જીવુ હે, ઝેંમ કે ઝાં બી હૂં જું હે દરેક મંડલી મ એંવુંસ શિક્ષણ આલું હે. 18તમારી મનં અમુક મનખં એંમ વિસારે હે કે હૂં તમનેં મળવા હારુ આવવાનોસ નહેં, એંતરે હારુ વેય ઘમંડી થાએંજ્ય હે. 19અગર પ્રભુ ની અસ્યા થાઈ તે હૂં તમારી કન જલ્દી આવેં, તર હૂં હેંનં ઘમંડી મનખં નું ખાલી શિક્ષણેંસ નેં પુંણ હેંનની સામ્રત હુંદો જાણ લેં. 20કેંમકે પરમેશ્વર નું રાજ મનખં ના જીવન મ હેંનની વાતં થી નેં પુંણ હેંનં ન કામં થી ભળાએ હે. 21તમું હું સાહો હે? કે ઝર હૂં તમારી કન આવું તે હું કરે? અગર તર તક તમવેં ભુંડા તરિકા નેં સુડ્યા વેંહે તે તમનેં ખરેખર વળગેં, પુંણ અગર સુંડ દેંદા વેંહે તે નરમાઈ અનેં પ્રેમ થી વેવહાર કરેં.
Attualmente Selezionati:
1 કરિંથીઓને 4: GASNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.