Hechos 17
17
I ch'oqowik chila Tesalónica
1Che i kisolinik ma Pablo xaq i ma Silas, xeik'aw pa tinimit Anfípolis xaq pa tinimit Apolonia, te'uri xeupon pa tinimit Tesalónica, chila ipa o wi jun ja re molb'al ib' ke i judío. 2I ma Pablo, pacha ax k-on wi, x-e pa taq ja re molb'al ib' ke i judío are kuriqa i ij sábado, lik che i oxib' uxlanb'al ij le re oxib' seman, xuchap rib' chitzij ku' man krajlaj utzij i Dios chke chrij pacha tz'ib'tal kan chupam uwuj i Dios, 3xusaqij chke chi i Cristo, lik rajwaxik chi kkamik, xwiri kwalij chik che i kamik. Xaq xub'ij iri chke:
—I Jesús le chi kinsaqij chiwe, are i Cristo.
4Je o jujun chke aj Judío xkikojo xaq xkiya kiwach ku' ma Pablo i ma Silas. Xaq je k'i aj Grecia xkikoj u'ij i Dios xaq keje jub'an ixoqib' chi o kipatan chila pa tinimit lik xkikojo. 5Xwiri ile xa xumi'saj koywal aj Judío chi kkikoj ti i Jesús, rumali chi xkimol kichi' jub'an itzel laj taq winaq chi xa to' keperkat pa taq b'e chkich'ujersaxik i winaq xaq chu'anik ch'oj pa taq b'e re i tinimit. Xwi ta la ile, xaq xe'ok prachoch jun achi chi ma Jasón ub'i, kkitzukuj ma Pablo xaq i ma Silas jachb'al ke pki'ab' i winaq; 6xwiri xekiriq ti chila, xkijukukej b'i i ma Jasón junam ku' jub'an chik qachalal chwach i Cristo chi je o ru' xaq xekik'am b'i chwach i atol tzij re i tinimit, kesik'in chub'ixkil i tziji:
—¡I winaqi, chi je kich'ujersam konojel i winaq chwach ronojel i jyub' ta'aj wo'or je k'unnaq waral, 7i ma Jasón le je uk'ulam ru' chi rachoch! ¡Konojel ike ketijin chuqelik i ma César aj Roma#17.7 I tzij César ri b'iyaj taj, iri are ub'i upatan chi lik mas nim u'ij, chila kki'at wi tzij aj Roma., man kkib'ij chi o jun chik ajawinel chi Jesús ub'i!
8I winaq xaq i ajpatanib' re i atb'al tzij are xkita i tzij le, lik xe'ok che i k'achirik. 9Xwiri ma Jasón xaq i rachi'il xkitoj i kelb'al b'ik, rumali i atol tzij xeko'taj b'ik.
Ma Pablo xaq i ma Silas kkib'ij utzij i Dios pa Berea
10Are xok a'ab', i qachalal chwach i Cristo xkib'ij che ma Pablo xaq i ma Silas, chi su' che'el chila che i k'ijib'al le che'oj pa tinimit Berea. Are xeupon pa tinimit su' xe'e pa ja re molb'al ib' ke i judío. 11I aj judío le mas utz kik'ux chkiwach i winaq aj Tesalónica, lik ru' ronojel kik'ux xkikoj retalil che i utzij i Dios xaq ij ij kkajlaj uwach uwuj i Dios, ilb'al re we lik qatzij ni'pa i kb'ix chke. 12Rumali chi je k'i aj Judío xekojonik xaq xekojon k'iyal achiyab' xaq ixoqib' aj Grecia chi lik o ki'ij kumal i winaq che i k'ijib'al le. 13Xwiri, i Judío winaq pa Tesalónica are xketamaj chi ma Pablo ktijin chub'ixkil utzij i Dios pa tinimit Berea, xeupon chila chkich'ujersaxik i winaq. 14Are uri i qachalal chwach i Cristo lik juntir xkitaq b'i ma Pablo k'a chuchi' taq i mar; xwiri ma Silas ru' a Timoteo xekanaj kan pa tinimit Berea. 15I jub'an chi kachi'ilam b'i ma Pablo xe'e ru' k'a pa tinimit Atenas. Te'uri xetzalij chali pa Berea ru' utaqanik ma Pablo chi kkib'ij chke ma Silas xaq a Timoteo chi juntir che'oj ru' ma Pablo man je roy-em chik.
I ma Pablo o pa tinimit Atenas
16I ma Pablo, tz'aqat je roy-em ma Silas xaq a Timoteo chila pa tinimit Atenas, lik xpe ub'is che are xrilo chi i tinimit lik nojnaq che i jalajuj taq tiox. 17Rumali chi ij ij kkichap kib' che i tzij ku' aj Judío chila pa ja re molb'al ib' ke i judío le, xaq keje ile ku' i jub'an chik chi kkikoj u'ij i Dios; xaq ij ij keje ile ku'an ku' i jub'an chi kkimol kib' chila pa k'eb'al. 18Xaq o jujun winaq chi o kino'oj aj Epicúreo xaq aj Estoico xe'ok chuchapik kib' che i tzij ru' ma Pablo. O jujun chke kkib'ij:
—¿Wach taq kraj ub'ixkil i loxlox laj achi le?
Xaq je o jub'an chik chi kkib'ij:
—¡Kqil yoj xa ajb'il ke i jub'an chik dios aj naj!
Ile xkib'ij che i ma Pablo rumal xusaqij chke ni'pa i utz laj tzij re i Jesús, chi xaq xwalij che i kamik. 19Are uri xekik'am b'i ma Pablo ku' chila ipa kkimol wi kib' pa nuk'b'al t'isb'al chi Areópago ub'i xaq xkitz'onoj che:
—Kqaj kak'ut chqe wach taq ke'el i k'ak' k'utunik le chi ak'amom li chqe. 20Yet kattijin chub'ixkil k'ak' taq tzij chqe, wo'or kqaj kqetamaj wach usuk' ke'eloq; xecha.
21Xwiri konojel i winaq aj Atenas xaq konojel i aj naj chi je jeqel chila, lik to' xwi kkita xaq xwi kkilapo wach taq i k'ak' taq k'ulmaxik.
22Are uri ma Pablo xtak'i an chkixol ike chila pa Areópago xaq xub'ij chke:
Ix aj Atenas, ru' ronojel ni'pa i wilom, yix lik ijikb'am ik'ux che ukojik ki'ij i jalajuj taq tiox. 23Man lik kintijin chrilik i jalajuj taq k'ijib'al ipa ki'an wi i moloj ib' pa tinimit, xinriq jun sujb'al sipon chi tz'ib'tal i tziji chwach: I Dios chi etamam ti uwach. Are i Dios le chi kikoj u'ij yix, tupu iweta'am ti uwach, are ile kintijin yin chub'ixkil utzij chiwe.
24I Dios chi x-anaw i jyub' ta'aj xaq ronojel ni'pa i o chwach, are Ire Ajwal re i kaj xaq re i ulew. Ire jeqel ti chupam jun ja chi xa winaq je yijb'awnaq. 25Rajwaxik taj che we o taq kya' che rumal jun winaq, man are Ire kyaw kik'aslemal konojel ni'pa i winaq, kuya kuxlab' xaq ronojel ni'pa i b'iroxik.
26Xa che jun winaq Ire xeu'an k'iyal nimaq taq tinimit, re kek'iji chwach ronojel i jyub' ta'aj xaq uch'ikom i ij re kik'aslemal xaq i k'ijib'al ipa kek'iji wi, 27man keje ile kkitzukuj i Dios, nti k-ono we lik to' pachalo xwiri lik kkiriq na. Man saq laj tzij i Dios naj ti o wi chqe chqajujunal. 28Man lik rumal i Dios o qak'aslemal, qab'inik xaq qa'olem chwach i jyub' ta'aj; pacha xkib'ij ajb'il chomiq taq tzij iwe yix: Oj umi'al ralk'uwal i Dios. 29Rumali yoj chi oj umi'al ralk'uwal i Dios, mqach'ob' taq chi i Dios keje pacha i tiox chi xa antal ru' anpwaq, ru' saqpwaq xaq ru' chomiq taq ab'aj chi xa antal kumal i winaq chrij pacha ketiki taq ike chuch'ob'ik chi keje i Dios ile. 30Ujer i Dios is xukuy kimak i winaq chi xki'an ile man keta'am taj wach kki'ano; xwiri wo'or kuya i taqanik chi konojel i winaq chi je o chwach i jyub' ta'aj chetzalij li ru' i Dios, 31man i Dios uch'ikom jun ij re u'atik tzij pkiwi konojel i winaq chwach i jyub' ta'aj ru' jun atb'al tzij suk'ulik, re jun achi chi u'ulum chik ire, chi xaq u'aljinsam chik chqe qonojel are xuwalijsaj che i kamik.
32Are xkita ile chi ni'pa i kamnaq kewalij che i kamik, o jujun xeyo'yanik xaq o jub'an chik xkib'ij:
—K'a te kqata ile chawe juyak tan chik.
33Are uri ma Pablo xel chkixol. 34Xwiri je o jujun xkikojo xaq xkiya kiwach ru'. Chkixol ile o jun achi chi ma Dionisio ub'i, chi are jun chke i winaq chi ajnuk'unel re molb'al ib' Areópago, xaq xuya uwach jun ixoq chi ati Dámaris ub'i. Xaq je o jub'an chik.
Attualmente Selezionati:
Hechos 17: ACHICUB
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Biblia Achí de Cubulco, Derechos reservados de Sociedad Bíblica de Guatemala
