प्रकाशितवाक्य 6
6
सत्त मुहरां दा खोलया जाणा
1फिरी मैं दिखया की छेलुये उना सत्तां मुहरां चे इकी जो खोलया; कने मैं चारों जिन्दे प्राणियां चे इकी जो पुकारदे सुणया। उदी अबाज गड़क्यां सांई तेज थी। उनी बोलया, “हुण जा, अग्गे बद।” 2तालू ही मिंजो इक चिट्टा घोड़ा मिल्ला, कने उदे पर सवार होयो माणुऐ धनुष लिया था; कने उसयो इक मुकुट भी दितया था, कने सै इक विजेता सांई जित हासिल करणा निकलया कने दुबारा ला उनी ही जितणा।
दुज्जी मोहर-लड़ाई
3जालू छेलुये दुज्जी मोहर खोली, तां मैं दुज्जे जिन्दे प्राणिऐ जो ऐ बोलदे होऐ सुणया, “हुण जा, अग्गे बद।” 4फिरी इक चमकदार लाल घोड़ा उसा जगा ला बार आया जिथू सिहांसन रख्या है। परमेश्वरे उस पर बैठयो जो धरती दे लोकां जो अपु चे लड़ाणे दी शक्ति दिती, ताकि सै लड़ाईया दे बकत इक दुज्जे जो मारी देंन। इस कम्मे तांई परमेश्वरे इस सवारे जो इक बड्डी तलबार भी दितियो थी।
तिजी मोहर-अकाल
5जालू छेलुये तिजी मोहर खोली, तां तिजे जिन्दे प्राणिऐ जो ऐ बोलदे होऐ सुणाया, “हुण जा, अग्गे बद।” कने तालू मैं दिखया की इक काला घोड़ा बाहर आया है कने उस पर सवार बंदे दे हथे च इक तरकड़ी थी। 6कने मैं सुणया की उना चारों जिन्दे प्राणिया चे कोई बोला दा था, ऐ माणुऐ सांई अबाज थी की, “ओंणे बाले दिना च धरतिया पर अकाल पोंणा। इस तांई इक किलो कणक कने तिन किलो जौं दी कीमत पुरे इक दिने दिया ध्याड़िया बराबर होंणी। पर तेले कने अंगूरा दे रस्सां दी कीमत नी बदलणी।”
चौथी मोहर-मौत
7जालू छेलूये चौथी मोहर खोली तां मैं चौथे जिन्दे प्राणिऐ जो ऐ बोलदे सुणया, “हुण जा, अग्गे बद।” 8तालू मैं फीका पिया हरे रंगे दा घोड़ा दिखया; कने उस पर सबार बंदे दा नां मौत था; कने अधोलोक उदे पिच्छे-पिच्छे ओआ दा था। कने उसयो धरतिया पर रेणेबाले इक चौथाई लोकां जो मारणे दा हक है। उनी उना जो भूखा ला, उना जो बुरियां-बुरियां बिमारियां जो, कने उना जंगली जानवरां ला मारी दिता।
पंजवी मोहर-शहीद
9जालू छेलुये पंजमी मोहर खोली, तां मैं वेदिया दे थल्ले उना लोकां दिया आत्मा थियां जिना जो मारी दितया था क्योंकि उना परमेश्वरे दे बचना दा प्रचार कितया था कने प्रभु यीशु पर भरोसा करणे ला पिच्छे नी हटे की यीशु उना दा प्रभु है। 10कने उना जोरे ला पुकारी करी परमेश्वरे ला बोलया, “हे पबित्र कने सच्चे परमेश्वर; तू धरतिया पर रेणेबाले उना बुरे लोकां जो सजा देंणे च इतणा लम्बा इंतजार कजो करदा है?” असां बिनती करदे न की तू उना लोकां दे व्यवहारे जो बदला ले जिना सांझो मारी दितया था। 11कने उना चे हर इकी जो चिट्टे कपड़े दितयो। कने परमेश्वरे उना जो बोलया, “हुणे तांई अराम करा, क्योंकि हल्ले भी कुछ सोगी कम्म करणे बाले कने तुहाड़े साथी मसीह भाई न, जिना जो तुहाड़े सांई मारी देणा है। जालू दीकर तुहाड़े मसीह साथियां दे मरणे दी संख्या पूरी होई जांगी, तालू ही मैं बदला लेंणा।”
छेमी मोहर-भयानक दिन
12जालू मैं उसयो छेमी मोहर खोलदे दिखया, तां मैं दिखया की इक बड़ा बडा हिलण होया, कने सूरज दा रंग काले कम्बले सांई काला होई गिया कने पूरे चन्द्रमे दा रंग खूने सांई लाल होई गिया। 13कने अम्बरे दे तारे धरतिया पर इयां पेई गे जियां तूफाने ला रुखे ला कच्चे फल पेई जांदे न। 14अम्बर उस कागजे सांई गायब होई गिया जिसयो लपेटी दितया हो कने सारे पाड़ कने समुंद्रे चे सारे टापूआं अपणी जगा बदली दिती। 15इदा नतीजा ऐ होया की, तालू धरतिया दे राजे, कने प्रधान, कने सरदार, कने अमीर कने सामर्थी लोक, कने हर इक सेवक, कने जड़े गुलाम नी न, सारे पाड़ां दियां गुफां च कने पथरां थल्ले जाई लुकयो न; 16कने पाड़ां कने पथरां ला बोलणा लग्गे, “साड़े पर पेई जा; कने सांझो उसला बचाई लिया जड़ा सिंहासने पर बैठया है कने छेलुऐ दिया सजा ला बचाई लिया।” 17क्योंकि सै भयानक दिन आई गिया है जालू परमेश्वरे कने छेलुये सारयां जो सजा देंणी कने कोई भी इसा सजा ला नी बची सकदा।
Attualmente Selezionati:
प्रकाशितवाक्य 6: BHTNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Bhattiyali New Testament (भटियाली नोआ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
