MAWUTO HA WASU 24
24
1Koikiida-ho mkonu itanu Ananyia mkohanyi ulya ang'anyi kasoka arianyi na mata-ho wa wameku wasongoru wakasotsana nao kimu na mdedi umu rina lyake ewio nyi Tertulo, wakadeda na mchili chu mwitoṟi kya Paulo. 2Nahong'u o kekilaho naho Tertulo kawoka imkumba kahamba. 3“Lukauwonye wuhoya sa wufoi ipfo shi yapfo le, hoi Felisi odu ung'anyi kudi. Na kui riso lyapfo lya kyambuṟe shindo sha kunu mkambonyi ifu shikaengeṟa ihenda ichia. Kyasia isho shose loshiambya luikuana orio shiheri na hando hose. 4Kya indi njilaengeṟe ikurohya, Ngakuterewa ukuluadanyewo madedo hadu sa maangu kui wuhoo wopfo. 5Kyamba lombona mndu chu m mwambutsi sa mbicho awa moamtsa mapaṟatsano kiidi kya Wayuda wose iwo wadung'anye wuyana wu wose, nao nyio msongoru o siṟi ya Wanasareti iya ikuwikye kyanya. 6Alemhesha na ifanyitsa hekalu ngafu, nyihondo lukambada, [lukakunda imwanduya kui wuwawaso wadu. 7Kya indi mchili Lisia kashika-ho kalumsoka na pfinya ing'anyi ipfo mawokonyi hadu 8kawawasa walya wemkumba wache na kopfo.] Iyo kumonyi ochiidima imbesa nomanye kya shindo shilya lumkumba nasho so.” 9Wayuda nawo wakakusanza nao wehamba ke na wudo shikeri.
Paulo adeda lyekuuta oshangunyi lo Felisi
10Na Paulo ili mchili chu mwitoṟi amkemya ke nadede kahaluo, “Ili ngamekumanya ke iyo nyi omekaa ochichilia mkambo fu hando ha maka sa ifoi nkyondo ngakudedya-ho kyako njimonyi na ngoo njikesi. 11Nyi kyangu kyapfo kyetichya ke kulameida-ho mkonu ngoseṟa ya ikumi na iwi wokia mandi njiledo ihenda Yerusalemu njiwike-pfo wuindi. 12Nawo walanjiwone njechideda na mndu ipfo hekalunyi ang'u ma njechiamtsa kitohyo ipfo wandunyi, manya ipfo masinangogenyi manya hando hengi ha ipfo mṟinyi. 13Ma wechiidima iwanza shindo sho wacha nkumba nasho wulalupfo. 14Kya indi ngahamba na pata aa oshangunyi lopfo ke njikeri iwikya Ruwa chu o waku wadu wauindi njechichumia njia ii wekeilaha ya siṟi ikuwikye kyanya kui idikya ishi shose shiidikyanyi na wuwawaso na isho shii shiṟehye nyi waikimbi. 15Ili njiwode mkusirye njikusirye nafo Ruwa ke kochikaa-pfo maṟukyonyi ha wapfu wai wa wuhoṟotsu na walai wa wuhoṟotsu, ma koka nyiwo nawo wakeri nafo. 16Nakyo nyikyo kyannenga njikuitike inyi njimonyi njikae na ngo tsa mrimenyi tsii njihoṟotsu sumuhana na Ruwa na wandu kya orio shindo shose.”
17 “Komeida-ho maka ifoi njilewuya na mkambonyi fo wandu wako njiwaendye njodambiko na shidaso. 18Nasho nyisho walenjikoya ipfo hekalunyi njishirie njii mwilishe njimonyi manya njilamsanzye-pfo na wandu mamwingi ma yamtsa-ho kifahyo. 19Kya indi walya walenjiwonapfo nyi Wayuda wengi wawukye Asia. Nyi kiwawari wo wakae iya sumhana na iyo wanjikumbe koka wawode ideda ma lida ma lida lyenjikumba inyi. 20Ang'u wandu wa wawenyi wakuhambye nyi deko liki waliwonye koko lilya ndehoṟoki ipfo mengenyi iya. 21 Shile nyi kipfa kya dedo limu lilya mandi ndefihiṟa njihoṟoki makiidi hawi hawo njehamba, ‘Nyi kipfa kya maṟukyonyi ha wapfu nkyondo njianduyo oshangunyi lonu njidi inu.’”
22Kyasia Felisi kawatiṟimishya mdumbuye nyi kipfa aweichi necha kya njia ii kahamba, “Lisia mchili ulya o wasikari ili echisoka na kunu nawo njechidumbwo kya madedo hanu.” 23Nahong'u kawawasa mchili ulya mtutu ke naringe Paulo nakae akuachie nalaime na wandu wake ma umu-ho mocha imtarama ma mocha imsahya.
Paulo Oshangunyi lo Felisi na Drusila
24Kyasia komeida-ho mfiri sa maangu kukacha-ho Felisi warianyi na mka ulya oke Drusila o ipfo mbaṟiny ya Wayuda. Kalaha-ho Paulo kamwadanya kededa kya idikya Kristo. 25Kyasia ili ashika yongwo mbonyi tsa wuhoṟotsu na tsa wukeha na tsa kiheo kya mondu fochikaa fuche naho Felisi kawuko m madima kahamba, “Kekuhendyeng'u wulalu, ngawona mkonu njechikudumya-se.” 26Nao nyi awekusihye ke nyi echinengo fesa nyi Paulo kundu nampfunguo. Nkyo kitewe kawa momlaha kafoi kakapa nao sumu. 27Koikiida-ho maka iwi Felisi kasehya-ho Porkio Festo wuchili woke. Na Felisi kakunda ikulopa na Wayuda kada Paulo ai mpfunge.
Paulo aterewa Mondu foke fudao ko mchili ang'anyi
Attualmente Selezionati:
MAWUTO HA WASU 24: KIM2
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Kimochi Bible © Bible Society of Tanzania, 2016.
