Mëvaangë 14

Poolë i Balënabaasë ku livulë li Ikoonyoomë

1Ku Ikoonyoomë, Poolë i Balënabaasë bëkotë ku cizutununu ci Sizwiifë i bunë bëlëtubaangë mpaapë Sizwiifë i banë bëkeeli ko Sizwiifë, bisë kuta maanë. 2Kasi Sizwiifë banë bëmaangë kuta maanë, bëkosi n'vuusu mu kati ku bo bëkeeli ko Sizwiifë i baawu bisë vaanë simbalulu syaawu simbi ke baanë yaawu bë nguli. 3Kosuku, Poolë i Balënabaasë bëvyoosi mpaapë bilumbu ku Ikoonyoomë. Baawu bëlëtubilaangë yi lufyaatu looso i civuufu cyooso mu Fumu. Fumu wusë bëvaanë lutumu mu kuvaangë bimaaku i biliimbu i wulësisiminë bucyelikë booso mu manë bëloongaangë mu muulaandi. 4Basë livulë be liinë bisë kabukë mu bikuuku byooli : bëmesë bëba yimunë Sizwiifë i bën'ka bëba yi mimbunzi. 5Sizwiifë i banë bëkaambu Sizwiifë bisë dukënë fë cimweekë i sifumu syaawu bwiinji bëvangisi Poolë i Balënabaasë simpasi i kubëvoondë mu mëmanyi. 6Bunë baatu bë bwaali bisë kubakulë, baawu bisë kutiinë ku lweeku lu Liistë i Delëbë, mëvulë më Likayoonë i maalë mo mëbelëmë. 7Kunë yivaandi, baawu bisë ba mu kuloongë Mpolu Mboti.

Poolë wabelusi cikatë ku livulë li Liistë

8Ku Liistë, kwabë libakëlë li cikatë. Kutoonë fë lubutulu lwaandi, wabë cikatë i wusye podyaangë kuve kulyaatë. 9Naandi wulëkuwaangë maambu manë Poolë wulëtubë. Poolë wusë kun'sitikë meeso i monë ti naandi wuke yi ciminu mu kubelukë. 10Mu lyaawu, Poolë wusë n'kaambë mu mbeembu n'kamu : « Telëmë, silili mu maalu maaku! » Fo fë cimweekë, muutu be woowo wusë kutelëmë i kulyaatë. 11Bunë nkoongë yisë monë manë mëvaangë Poolë, yaawu yisë kulosukë mu mbeembu yi basë Likayoonë : « Sinzaambi bacitukë baatu lu moonyi i baawu bakulumukë fëke beeso#14.11 28.6.! » 12Baawu bëlëteelaangë Balënabaasë mu lizinë li « Zeesë » i Poolë « Elëmeesë » #14.12 Mu cikulu ci singeleekë Zeesë wabë n'kuluutu-si nzaambi i Elëmeesë wabë ciluumbi., cibilë Poolë wabë cipayi cilë natë libuungu. 13ngangë-Nzaambi Zeesë, wunë cizutununu cyabë fë nkotulu livulë, wusë natë singoombi simbakëlë sinë bëvwiikë sindedembë si biteekë fë ntwaalë cizutununu: naandi wulëtoombaangë ti nkoongë baatu yiyindulë civakuli mu cibilë ci Balënabaasë i Poolë. 14Kasi bunë mimbunzi yi wali yisë kubakulë lyaawu, baawu bisë beenzë binkutu byaawu i bisë lengë kotë mu nkoongë i ke losukaangë : 15« A bayaami, cibilë-mbici beeno lulë mu kuvangilë katyoobo? Beeso baatu buke beeno, twalutwalilë Mpolu Mboti, mu kulutelë lubiikë bintumbë kwaandi vwiili i lubalulë ntalwiinu ke Nzaambi moonyi wunë wavaangë liyilu, n'toto, m'bu i byakë byooso bike mwaawu#14.15 Lub 20.11; Twi 146.6.. 16Mu civi-cikulu, naandi wubiikë mëloongo mooso kulaandë sinzilë syaawu. 17Mu kumonë, naandi wusye leembo ko kuvaangë liboti: ku yilu, wun'nokisi n'vulë i wuluvaanë bilya i siteepu#14.17 Twi 147.8; Zel 5.24., naandi wuluvaanë bilya i wun'waasi n'timiinu mu liyaanji. » 18Keti kulutubilë obo, mimbunzi bësye podi ko kufuungë nkoongë baatu mu kuleembu kubëyindulilë civakuli.

19Sizwiifë sifuminë ku Antyoosë li Pisidi i ku Ikoonyoomë i bisë dedulë nkoongë mu simbalulu syaawu simbi. Mu lyaawu, baawu bisë lakë Poolë mëmanyi mu kun'voondë i bisë kun'natë ku ngaandë livulë, cibilë ti baawu bëbalë ti naandi wafwa. 20Kasi bunë bitamaanë bisë kudukënë fëke naandi, naandi wutelëmë i wukotë ku livulë. Mu cilumbu cilandëkënë, wuyendë yimunë Balënabaasë ku Delëbë.

Poolë i Balënabaasë bavutukënë ku Antyoosë li Sili

21Poolë i Balënabaasë bëtendulë Mpolu Mboti ku livulë li Delëbë kunë baawu bisë bakë mpaapë bilaanzi. Baawu bisë vutukënë ku Liistë, li Ikoonyoomë i ku Antyoosë li Pisidi. 22Baawu bisë ciinzi bitamaanë bitu, kubëvaanë mëngolo mu kukalilë mu ciminu i ke bëkaambaangë : « Beeso tube fwaanë kumonë beenë simpasi mu kukotë ku lwaangu lu Nzaambi. » 23Mu cyosuku Cingangë, baawu bësoolë bëkuluutu#14.23 bë bësoolë, kaambofo bë bëbyaasi. i bunë bamani kukaangë n'sweelë i kusambilë, baawu bisë kubëtuunvi ke Fumu wunë bëlëteelë maanë.

24Fë mbusë, baawu bisë sabukë Pisidi i bisë kutuukë ku Pamfili#14.24 Pisidi: 13.14. - Pamfili: libweeti li Pelëgë (1.13) i Atali (v.25).. 25Baawu bisë kuloongë libuungu li Nzaambi ku Pelëgë i bisë kweendë ku Atali. 26Kuunë, bëkandëmë mu likuumbi mu kweendë ku Antyoosë li Sili, livulë kunë bëbëtuunvi mu muulë Nzaambi mu cisalu cinë baawu bëfwenikini kusalë. 27Bunë batuuci ku Antyoosë, baawu bëkucikë bayaawu bë Cingangë i bisë bëkaambë maambu makë mooso manë Nzaambi wuvaangë mu baawu i bunë naandi wuzibulë yivaandi livitu lu ciminu mu banë bëkeeli ko Sizwiifë. 28Poolë i Balënabaasë bëvyoosi mpaapë bilumbu kwaawu yimunë bitamaanë ku Antyoosë.

Attualmente Selezionati:

Mëvaangë 14: NTVIL

Evidenzia

Copia

Confronta