Mëvaangë 10

Pyeelë watelu ke Kolëneeyë

1Ku livulë li Sezalee kwaba libakëlë lin'viipë, lizinë Kolëneeyë. Naandi waba n'kuluutu-mësodaadi wu Loomë wunë baawu bëlëtelaangë, « nkoongë yi Itali ». 2Naandi waba muutu wusulëmë fë meeso më Nzaambi i cintwaali yimunë likaandë lyaandi, baawu bëlëcinzikaangë Nzaambi mu n'timë wumweekë. Naandi wulë zudyaangë biyeembi bi Sizwiifë, i wulësambilaangë Nzaambi ntaangu yooso. 3Cilumbu cin'viipë, fë zoolë tatu mu m'bukulu-bwiisi, naandi wusë kumonë mu cyeendë-meeso, yaanzi mweekë yi Nzaambi yinë yikotë ku n'zwaandi i wusë n'kaambë : « Kolëneeyë! » 4Kolëneeyë wusitikë meeso maandi ke yaanzi, yi boomë booso, wusë n'yufulë : « Maambu mbici a Fumu? » Yaanzi wusë n'vutulilë : « Nzaambi wacikunë misaambwaaku i lusalusu lunë njeeyi wulë mu kuzudi biyeembi. Mu lyaawu, naandi kusë wukuzimbëkënë ko. 5Ntaangu be yiiyi, filë baatu ku livulë li Zafee, bwiinji baawu beendë bëteli muutu wumweekë mu lizinë li Simu, wunë bëlukë Pyeelë. 6Naandi wuke ke Simu wunë wun'lulikaangë mikaandë bibulu. N'zwaandi yike belë-belë yi m'bu. » 7Ntaangu yaanzi yo yilëtubënaangë yaandi yisë kweendë, Kolëneeyë wusë telë bisasi byaandi byooli, i wumweekë mu kati ku mësodaadi maandi wunë wuke muutu wusulëmë. 8Fë mbusë kubëzabisi maambu, manë yaanzi kubëkaambë, naandi wusë bëfilë ku Zafee.

9Cilumbu cilandëkënë, ntaangu bëbeelë mu nzilë sikwendë, i batuuci belë-belë ku Zafee, fë ntaangu-mbatë, Pyeelë wusë makë fë beedi yi n'zo mu kusambilë. 10Naandi wabë yin'zalë i wusë toombë ci kulya. Kasi ntaangu yo bëlë n'laambilaangë bilya, naandi wusë monë mu cyeendë-meeso. 11Pyeelë wusë monë li yilu kuzibukë, i ciimë cimweekë cikulumukë, cifwanëkënë bukë n'lelë bësiimbë mu sinkumë si na, cizelumukë fë n'toto. 12Fë yilu n'lelë beenë, fabë bibulu bi mpilë yi mpilë yaandi: bibulu bi maalu më na, sinyokë i sinuni si yosuku mpilë. 13Mbeembu yisë n'kaambë : « A Pyeelë telëmë! Voondë i lya. » 14Kasi Pyeelë wusë vutulë : « O a Fumu moniko! Miinu yibuunu kulya vyaasi cyosuku cifuungu kaambofo cikaambu kulyoomë#10.14 Lev 11.1-47; Ezk 4.14.. » 15Mbeembu yisë bën'kaambooso : « Keelë njeeyi wulëmonë bisumukë binë Nzaambi kutubë ti bilyoomë#10.15 Mak 7.15,19.. » 16Lyaawu livangënë fë vyaasi tatu, i fë mbusë, n'lelë beenë wusë vutukë ku yilu.

17Pyeelë wulëtoombë mu kuzaabë bunë bukelili suundu yi cyeendë-meeso cinë naandi kumonë. Kasi mu ntaangu yimweekë, baatu Kolëneeyë kufilë bisë kufulë mu kuzaabë fanë fabë n'zo yi Simu. Baawu bisë tuukë buyifanwabu fë nkotulu. 18Baawu bisë telë i bisë kufulë : « N'zo beenë faafë fë n'kalilaangë Simu wunë bëlukë Pyeelë? » 19Ntaangu yo Pyeelë kulë dunguminë mu kuzaabë manë kumonë mu cyeendë-meeso, Ciluunzi cisë n'kaambë : « Baatu#10.19 Baatu bë tatu kaambofo baatu. bëtatu bëlë mu kukutoombë. 20Telëmë! Nengëmukë buyifanwabu i weendë ke baawu. Keelë wulëkekëmë, kasi miinu yibëfilisi. » 21Fë mbusë, Pyeelë wusë kulumukë i wusë kaambë baatu beenë: « Miinwaawu beeno lulë mu kutoombë. Cibilë-mbici beeno lwakwisilë? » 22Baawu bisë vutulë : « Kolëneeyë, n'kuluutu-mësodaadi na watufilë ke njeeyi. Naandi muutu wusulëmë, wun'cinzikaangë Nzaambi. Sizwiifë syakë syooso bën'tubaangë mëboti mu naandi. Yaanzi yi Nzaambi yisë kun'tumisi mo njeeyi weendë ke naandi, bwiinji kuyuwu manë wuzolisi kun'kaambë. » 23Pyeelë wusë bëkosi ku n'zo i kubëvaanë faama fë kunukinë.

Cilumbu cilandëkënë, Pyeelë wutelëmë i wusë ke yendaangë yimunë baawu. Baanë bë nguli bëmesë bë livulë li Zafee bisë kweendë yaandi. 24Cilumbu cilandëkënë, naandi wuye tuukë ku livulë li Sezalee. Kolëneeyë wulëbëvin'ngaangë yimunë likaandë lyaandi i sindiku syaandi si n'timë sinë naandi kuvekilë. 25Ntaangu yo Pyeelë kulëkotilë ku n'zo, Kolëneeyë kwiisë kun'dyengënë i wusë fukumë fë ntwaalaandi yi luciinzu looso. 26Kasi Pyeelë wun'telikë i wusë tubë : « Telëmë cibilë ti miinu yivaamë, yilë muutu vwiili bo buke njeeyi. » 27Ntaangu yo naandi wulëtubënaangë yi Kolëneeyë, naandi wusë kotë ku n'zo i ke zakënë mpaapë baatu bëdukënë kuunë. 28Naandi wusë bëzabikini: « Beeno luzabisi ti, Zwiifë wukeeli yi n'swa ko mu kukalë fë cimweekë i mweeni, kaambofo mu kukotë ku n'zwaandi. Kasi Nzaambi wabë wukun'deesi ti, miinu sye fwanëkënë kuve kumonë wosuku muutu wukaambu kulyoomë. 29Mu boobo, Ntaangu yo beeno lwakun'telilë, miinu yisye maangë kuve mu kwiisë. Mu lyaawu, yatoombë kuzaabë mu mbici beeno lwakun'telilë afa. » 30Kolëneeyë wusë n'vutulilë : « Bilumbu bi tatu byavyookë i kanuku mu zoolë be yiiyi yin'tatu yi m'bukulu-bwiisi, miinu yilësambilaangë#10.30 yilësambilaangë, kaambofo yikaangaangë i yilëkaangë n'sweelë. ku n'zwaami. Kususukulabu, muutu mweekë wunë wuvwaatë n'lelë wun'lesikë wusë kum'monikinë 31i wusë tubë : “Kolëneeyë, Nzaambi wacikunë misaambwaaku i lusalusu lunë wun'vaangaangë mu biyeembi. 32Mu lya lyoolyo filë baatu ku livulë li Zafee bwiinji bateli Simu wunë bën'telaangë yivaandi Pyeelë. Naandi wun'kalilaangë ku n'zo Simu wunë wun'lulikaangë mikaandë bibulu. N'zwaandi yibelëmë yi m'bu.” 33Mëlengë-lengë miinu yisë filooso baatu mu kukutelë. Njeeyi liboti wavaangë cibilë wakwiisë. Ntaangu ayi, beeso booso tweekë fë ntwaalë Nzaambi, bwiinji mo tuyuwu makë mooso manë Fumu wakutumë mu kutuzabikini. »

Bunzonzi bu Pyeelë ku n'zo Kolëneeyë

34Pyeelë wusë tubë : « Buyifanwabu, miinu yabakulë cyelikë, Nzaambi wum'monaangë baatu bakë booso mpilë mweekë#10.34 Det 10.17.: 35bwaawu, mu yosuku si, wosuku muutu wun'cinzikaangë Nzaambi i wun'salilaangë maambu mësulëmë, naandi wuvangisyaangë Nzaambi sinyeenzi. 36Naandi wufilë cikuumbu cyaandi ke mboongu Islayeelë, Mpolu Mboti yi n'sikë#10.36 Ezy 52.7. wu Yeesu Kliistu, wukeeli Fumu baatu booso. 37Beeno luzabisi manë mëvyookë ntetë ku Ngalilee i ku Zudee yakë yooso, fë mbusë Za kulongilë i kubatizyaalë. 38Beeno luzabisi buni Nzaambi wutuulë cimpukë Ciluunzi ci Saantu mu Yeesu li Nazaleetë. Naandi wulyaatë mu si syooso mu kusalilë mëboti i mu kubelusi bibeedo byakë byooso banë babë mu civikë ci dyaabu. Licyelikë Nzaambi wabë yaandi. 39Beeso tukeeli simbaanji mu maambu makë mooso kuvaangë ku livulë li Yelusaleemë i mu sisi sin'ka si Sizwiifë. Baawu bën'voondë fanë bëm'baandë fë kuluusu. 40Kasi Nzaambi wun'vulumunë mu lufwa mu cilumbu cin'tatu i wusë n'vaanë likanë li kube monikooso. 41Yaaku ti ke baatu bakë booso ko, vandi ke beeso banë Nzaambi kusoolë ntetë, bwiinji tuba simbaanji syaandi. Beeso tulya yaandi fë cimweekë fë mbusë luvulumuku lwaandi#10.41 1.4; Lik 24.30,42.. 42Yeesu wututumë mu kuloongë baatu i mu kuzabikini ti naandi Nzaambi kusoolë, mu kufundisi baatu bë moonyi i bo bëfwa. 43Mibici yooso bëtubilë mu cibilë cyaandi: wosuku muutu wun'tuulë lufyaatu lwaandi mu Yeesu, wum'bakë lobukulu lu mësumu maandi mu lizinë li Yeesu#10.43 Ezy 53.5-6; Zel 31.34.. »

Banë bëkeeli ko Sizwiifë batambulë Ciluunzi ci Saantu

44Bo Pyeelë wulëtubë, Ciluunzi ci Saantu cisë kulumukë mu bakë booso bëlë kuwu bunzonzi bwaandi. 45Bitamaanë bi Sizwiifë bëyisë yimunë Pyeelë, bisë tulumukë mu kumonë ti Nzaambi wusë kululë yivaandi likabu lyaandi li Ciluunzi ci Saantu mu banë bëkeeli ko Sizwiifë. 46Licyelikë, baawu bëlëkuwaangë banë bëkeeli ko Sizwiifë, kutubilë mu simbeembu sin'ka, i ke dumisyaangë Nzaambi. Mu lyaawu, Pyeelë wusë tubë : 47« Baatu aba, batambulë Ciluunzi ci Saantu bo buke beeso, buni, beeso kupodi kubëfuungë kubatizyaalu? » 48Naandi wusë tumë mo bë bëbatizyaalë mu lizinë li Yeesu Kliistu. Mu lyaawu, baawu bisë loombë Pyeelë mu kukalë yaawu mwa bilumbu.

Attualmente Selezionati:

Mëvaangë 10: NTVIL

Evidenzia

Copia

Confronta