प्रेरितां रे कम्म 24

हाकिम फेलिक्स रे सामणे पौलुस

1पंज रोज्जा बाद हनन्याह प्रधान पुरोत्त मते सारे बुजुर्ग मणू जो ते तिरतुल्लुस नां रे कुसकी वकील जो कन्ने लेई करी कैसरिया कस्बे बिच आया तिन्हा ने राज्यपाल रे सामणे पौलुस पर इल्जाम लाए। 2जां तिसजो सद्देया गया तां तिरतुल्लुस ने पौलुस पर इल्जाम लाणे का पैल्ले हाकिम जो बोल्लेया, “ओ महाप्रतापी फेलिक्स, तुसा री दूरदृष्टी री वजह कने तुसा रे राज बिच बड़ी सांती बणे री है ते तुसा ने अपणे राज अंदर बड़े बदलाव कित्ते रे हिन। 3ओ फेलिक्स असी हर जगाह् ते हर तरिक्के कने असी इस गल्ल तांइ शुक्रिया करदे। 4मैं तुसा जो होर कष्ट नी दैणा चाह्‍ंदा, मैं तुसा का ए बिनती करदा कि रहम करी के असा री इक्क-दो गल्लां सुणी लेयो। 5किजोकी असा ने इस मणू जो उधमी ते दुनिया रे सारे यहूदियां बिच दंगा कराणे वाला, ते नासरत अन्दर रैह्णे वालेयां रे कुपंथ रा प्रधान पाए रा है। 6तिनिए मन्दिर जो असुध करणा चाह्या, पर असा तिसजो पकड़ी लेया असा तिसजो अपणी मूसा रे कानून रे हिसाब्बे सजा दित्ते री होणी थी।” 7पर पलटन रे सरदार लूसियास ने जबरदस्ती असा रे हत्थां का खुस्सि लेया, 8ते आरोपी जो तेरे सामणे इणे रा हुकम दित्तेया इन्हा सबणी गल्लां जो जिन्हेरे बारे अन्दर असी तिस पर इल्जाम लान्दे, तैं अप्पु ही तिसजो परखी करी सच्चाई रा पता लाई लैणा। 9यहूदियां ने भी तिसेरा साथ देई करी बोल्लेया, ए गल्लां इदेय ही हिन।

पौलुस रा बचाव

10जिस बेल्ले राज्यपाल ने पौलुस जो बोलणे रा इसारा कित्तेया, तां तिनिए जवाब दित्तेया: इस गल्ल रा पता लगणे का बाद कि तू मते साल्लां का इस देस रे मणूआं रा फैसला करेया करदा है इधेरे तांइ मैं खुसी कने अपणा जवाब दिन्दा। 11तू अप्पु ही पता लाई सकदा कि जां रा मैं यरुशलेम सहर अन्दर अराधना करणे तांइ मन्दिर बिच आया, मेरे जो बारा दिनां का उप्पर नी होए 12उन्हा ने मेरे जो ना मन्दिर अन्दर, ना सभास्थल अन्दर, ना सहर अन्दर कुसकी कने लड़ाई करदे या भीड़ कठेरदे दिख्खेया, 13ते ना तां से तिन्हा गल्लां जो, जिन्हेरा से अब्बे मेरे पर इल्जाम लाया करदे हिन, तेरे सामणे सच साबित करी सकदे, 14पर मैं तेरे सामणे ए मन्नी लिन्दा कि जिस पंथ#24:14 यीशु री शिक्षा पर चलणे वाले लोक। जो यहूदी अधिकारी कुपंथ बोलदे, तिसेरे ही नियम पर मैं अपणे पूरखां रे परमेश्वर री भक्ति करदा अते जे गल्लां मूसा रे कानून ते भविष्यद्वक्ता करणे वालेयां री कताबां अन्दर लिख्खे री हिन, तिन्हा सबणी पर विश्वास करदा। 15ते परमेश्वर का आस रखदा जे से अप्पु भी रखदे, कि परमेश्वर ने धार्मिक ते अधर्मी दोनो किस्मे रे मणूआं ने मुर्देयां बिच का फिरी जिन्दे कित्ते जाणे। 16इस तांइ मैं अप्पु भी कोसीस करदा कि परमेश्वर रे, ते मणूआं रे पास्से मेरा मन हमेसा बेकसूर रेयो 17मते साल्लां बाद मैं अपणे लोक्कां जो दान दैणा, ते परमेश्वर जो भेंट चढ़ाणे तांइ यरुशलेम सहर बिच आया थिया। 18तिन्हा ने मेरे जो मन्दिर अन्दर, सुच्चे होणे री रीति पूरी करदे बेल्ले बगैर भीड़ रे ते बगैर शोर मचांदे, तित्ते भेंट चढांदे दिख्खेया, पर एशिया प्रदेश रे किच्‍छ यहूदी तित्ते थिये जे मेरे पर इल्जाम लाणा चाह्‍ंदे थिये, तिन्हेरे जो जरुरी थिया 19कि अगर मेरे खिलाफ तिन्हा का कोई गल्ल हो तां इत्ते तेरे सामणे आई करी मेरे पर इल्जाम लाण, 20या ए अप्पु ही दसन कि जिस बेल्ले मैं महासभा रे सामणे खड़ित्ते रा थिया, तां तिन्हा ने मेरे अन्दर कुण जह्णी गलती दिख्खी? 21इस इक्क गल्ल जो छड्डी करी जे मैं तिन्हेरे बिच खड़ी करी लेर मारी करी बोल्ली थी: परमेश्वर रे जरिए मुर्देयां रे फिरी जिन्दे होई जाणे रे बारे अन्दर अज्ज मेरा तुसा सामणे मुकद्दमा होया करदा है। 22फेलिक्स ने, जेड़ा इस पंथ#24:22 यीशु री शिक्षा पर चलणे वाले लोक। री गल्लां ठीक करी जाणदा थिया, तिन्हा जो ए बोल्ली करी टाली दित्तेया, जां पलटन रे सरदार ने लूसियास आणा, तां तुसा री गल्ल रा हिसाब-किताब करणा। 23ते हाकिम जो हुकम दित्तेया कि पौलुस जो अपणी गिरफ्त बिच रख्खे पर तिसजो थोड़ी अजादी देई रख्खे ते तिसेरे मित्रां बिच का कुसकी जो भी तिसेरी सेवा करणे का मत रोकदा।

फेलिक्स ते द्रुसिल्ला रे सामणे पौलुस

24थोड़े रोज्जा बाद फेलिक्स राज्यपाल अपणी लाड़ी द्रुसिल्ला जो, जेड़ी यहूदी जनानी थी, कैसरिया कस्बे बिच कन्ने लेई करी आया ते पौलुस जो सदुआई करी तिस भरोसे रे बारे अन्दर जे मसीह यीशु पर है, तिसका सूणेया। 25जां पौलुस ने परमेश्वर री धार्मिकता, ते सबर, ते लोक्कां रा हिसाब-किताब करणे रे बारे बिच बोल्लेया करदा थिया, तां फेलिक्स ने डरी करी जवाब दित्तेया, अब्बे ता चली जा, मौक्का दिख्खी करी मैं तिज्जो फिरी सद्दी लिन्गा। 26तिसजो पौलुस का किच्‍छ पैसे मिलणे री भी आस थी, इधेरे तांइ से तिसजो घड़ी-घड़ी सद्दी करी तिस कने गल्लां करदा रैहन्दा थिया। 27पर जिस बेल्ले दो साल होई गे, तां पुरकियुस फेस्तुस, फेलिक्स री जगाह् पर राज्यपाल बणी करी आया ते फेलिक्स यहूदियां जो खुस करणे री चाह्‍त अन्दर पौलुस जो कैद अन्दर ही छड्डी गेया।

Attualmente Selezionati:

प्रेरितां रे कम्म 24: CDHNT

Evidenzia

Copia

Confronta