2 कुरुन्थियों 4
4
मिट्टी रे भाडेंया बिच धन
1इधेरे तांइ जां असा रे पर इदेयी दया होई कि असा जो परमेश्वर रा बसेख सुनाणे री सेवा मिल्ली तां असी हिम्मत नी हारदे। 2पर असा ने शरम रे ते गुप्त कम्मां जो छड्डी दित्तेया, अते न चलाकी कने चलदे, अते ना परमेश्वर रे वचन बिच हेराफेरी करदे, पर परमेश्वर रे सामणे असी सिर्फ सच बोलदे, ते असी लोक्कां रे विवेक बिच ए बिठाई दिंदे कि जे असी बोल्लेया करदे हिन से सच है। 3जे सुब बसेख असी लोक्कां जो सुणांदे, से तिन्हा लोक्कां का लुके रा है जे हमेसा री मौत रे रस्ते पर हिन। 4शैतान, जे इस दुनिया रे लोक्कां रा शासक है, तिनिये मसीह यीशु बिच विश्वास ना करणे वाले लोक्कां री समझ जो मंद करी रख्खे रा है, ताकि से मणू सुब बसेख री महिमामय रौसनी जो नी दिख्खी सके। से मणू मसीह यीशु रे इस महिमा रे बसेख जो नी समजदे जे परमेश्वर रे प्रतीरुप हिन। 5दिख्खो, असी लोक्कां बिच जाई-जाई करी अपणे बारे बिच प्रचार नी करेया करदे हिन। असी मसीह यीशु रा प्रचार करेया करदे हिन, ते मसीह रे खातिर असी तुसा रे सेवक हिन। 6किजोकी परमेश्वर ने ही बोल्ले रा है,
“न्याहरे बिच रौसनी चमके।”
ते से ही असा रे दिल बिच चमकी, ताकि असी मसीह बिच परमेश्वर री महिमा जो दिख्खी सकण। 7असी मिट्टी रे भांडेया सांई हिन जिन्हा बिच इस धन्न जो जमा करी के रख्खेया गे रा है, किजोकी ए असीम ताकत असा रे पास्से का नी पर परमेश्वर रे पास्से का है। 8असी चौं पास्से का तकलिफां ता भोगदे, पर असी खतरे बिच नी पैंदे। असी घबराये रे ता हिन, पर निरास नी हिन। 9सताए ता जान्दे, पर छड्डे नी जांदे, झुकाये तां जांदे, पर नास नी होये हिन 10असी हर बेल्ले मसीह यीशु री तकलिफां ते मरणे रे अनुभव जो अपणे सरीर बिच महसूस करदे ताकि मणू मसीह यीशु रे जिन्दगी जो असा रे कम्मां रे जरिये जाणी सकण। 11हाँ, असी हमेसा मौत रे खतरे बिच रैहन्दे किजोकी असी मसीह यीशु रा सुब बसेख सुणांदे ताकि मसीह यीशु री जिन्दगी असा रे कम्मां रे जरिये लोक्कां पर ज़ाहिर हो। 12तां असी मौत रे खतरे बिच रैहन्दे पर इसेरा नतीज्जा ए होया कि तुसा जो हमेसा रा जीवन मिल्लेया।
13पर असी प्रचार करणा जारी रखदे किजो असा बिच तैसा ही विश्वास है जैसा तिस भजनकार बिच थिया जां तिनिये ए लिख्खेया,
“मैं परमेश्वर पर विश्वास कित्तेया, इधेरे तांइ मैं बोल्लेया,
इधेरे तांइ असी भी विश्वास करदे ते बोलदे।”
14अते ए जाणदे कि जिनिये प्रभु यीशु जो मरे रे लोक्कां बिच का जिंदा कित्तेया, तिन्हा ने ही असा जो भी तिय्यां ही जिंदा करणा, ते परमेश्वर ने असा जो तुसा कने कठ्ठे करी के लेई आणा ते असी तिन्हेरी मौजुदगी बिच हाजिर रैह्ण। 15जे किच्छ असा कने घटे रा है, से तुसा रे फायदे तांइ ही हिन ताकि जिय्यां परमेश्वर रा अनुग्रह जादा का जादा लोक्कां जो मसीह बिच लेई आया करदा है तिस कने मते लोक्कां ने परमेश्वर रा तिन्हेरी महिमा तांइ शुकर करणा। 16इधेरे तांइ असी हिम्मत नी हारदे, हालांकि असा रा सरीर मुकेया करदा है पर असा अंदर असा री आत्मा हर रोज नौई हुंदी जांदी। 17किजोकी असा री मुसीबतां छोटी हिन ते तिन्हा ने जादा हाण तांइ नी रैह्णा किजोकी तिन्हेरे अंजाम “हमेसा री महिमा” होणा, जे तिस हर कुसकी चीज का बड्डी भी है, जिसेरे बारे बिच असी कदी सोच्ची भी नी सकदे। 18अते असा तां दिख्खी री चीजां जो नी पर अण-दिख्खी चीजां जो दिखदे रैह्न्दे, किजोकी दिख्खी री चीजां थोड़े ही रोज री हिन, पर अणदिख्खी चीजां हमेसा बणी रेह्न्दी।
Attualmente Selezionati:
2 कुरुन्थियों 4: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.