2 कुरुन्थियों 10
10
पौलुस इक्क सच्चा प्रेरित
पौलुस रा हक्क
1मैं पौलुस, तुसा का मसीह यीशु री दयालुता ते निमतेपन कने बिनती करदा, हालांकि मेरे जो इस गल्ल रा एहसास है कि तुसा लोक्कां जो ए लगदा कि मैं आमणे-सामणे गल्ल करणे बिच डरपोक है, ते सिर्फ चीठ्ठी लिख्खी करी गल्लां समझाणे बिच बड़ी हिम्मत रखदा। 2मैं तुसा रे छंदे करदा कि जां मैं तुसा का आं, तां मेरे जो तिन्हा लोक्कां कने कड़ाई कने गल्ल ना करणा पये, जे ए सोचदे कि असी दुनियावी तौर-तरिक्के रे हिसाब कने चलदे। 3हालांकि असी इस दुनिया बिच रैहन्दे, पर असी इस दुनिया रे बाकि लोक्कां सांई लड़दे-झगड़दे नी। 4असी इन्सानी विचारां ते झूठ्ठी बैह्सबाजी जो नास करणे तांइ दुनियावी हथियारां रा नी, बल्कि परमेश्वर रे ताकतवर हथियारां रा इस्तेमाल करदे।
5असी इन्सानी बैह्सबाजी ते घमंड री वजह कने आणे वाली हर इक्क बाधा जो तोड़ी दिंदे जे लोक्कां जो परमेश्वर जो जानणे का दुर रखदी। ते असी तिन्हेरे हर इक्क चाहत जो काबू बिच करी के, तिन्हा जो मसीह यीशु री गल्ल मनणे वाले बणांदे। 6ते जां से पूरी तरिक्के कने मसीह रे हुकम मनणे वाले बणी जांदे, तां असी तैयार रैहन्दे कि मसीह यीशु रे हुकमां जो ना मनणे वाले जो सजा दिंदे।
7तुसा बाहरी दिखावट पर ध्यान दिंदे। जे अगर कुसकी मणू जो अप्पु पर ए भरोस्सा हो, कि से मसीह यीशु रा है, तां से ए भी जाणी लेयो कि जिय्यां से मसीह यीशु रा है, तिय्यां ही असी भी मसीह यीशु रे हिन। 8किजोकी अगर मैं तिस हक रे बारे बिच होर भी गर्व करां, जे प्रभु ने असा जो तुसा रे विश्वास जो घटाणे तांइ नी पर तुसा रे विश्वास जो बधाणे तांइ दित्ते रा है, तां मैं शर्मिंदा नी होणा। 9मैं अपणी चीठ्ठियां रे जरिये तुसा जो डराणे री कोसीस नी है करेया करदा। 10किजोकी तुसा बिच का मते जणे बोलदे, कि मेरी चीठ्ठियां तां बड़ी कड़क ते जोरदार हिन, पर जिस बेल्ले मैं आमणे-सामणे मिलदा, तां कमजोर ते गल्ल-बात करणे बिच बेकार लगदा। 11जे इय्यां बोलदे, से ए समजी रख्खे कि जिय्यां पिठ्ठी पीच्छे चीठ्ठियां बिच असा रे बसेख हिन, तिय्यां ही तुसा सामणे असा रे कम्म भी होणे। 12किजोकी असा जो ए हिम्मत नी है कि असी अप्पु जो तिन्हा बिच का किच्छ इदेय जणेया कने गिणन या तिन्हा बिच अप्पु जो मिलाण, जे अपणी तारिफ अप्पु करदे, ते अपणे आप जो अप्पु-मिते नाप्पी-तोल्ली करी इक्क-दूज्जे कने बराबरी करी के बेवकूफ ठेहरदे। 13असी तां तिस कम्म री सीमा का बाहर कदी भी गर्व नी करणा जे कम्म परमेश्वर ने असा जो दित्ते रा है, पर तिस्सी सीमा तक जे परमेश्वर ने असा तांइ ठैहराई दित्ते री है, ते तिस बिच तुसा भी आई गेरे हिन, ते तिन्हा कम्मां री सीमा बिच ही गर्व भी करणा। 14जां असी पैल्ली वरी तुसा का पूज्जे, तां असी गर्व करणे बिच तिस सीमा जो नी टप्पेया, जित्ते परमेश्वर ने असा जो कम्म करणे तांइ नी ठैहराया थिया। तिन्हा ने असा जो तुसा रे इलाक्के बिच कम्म करणे तांइ ठैहराया थिया, ते असी तुसा जो मसीह रा सुब बसेख दसणे वाले पैल्ले मणू थिये। 15असी सीमा का बाहर दूज्जेयां री मैहनत पर गर्व नी करदे, पर असा जो आस है कि जिस तरिक्के कने तुसा रा विश्वास बदधा जाणा तिस तरिक्के कने असी अपणी सीमा रे हिसाब कने तुसा री वजह कने होर भी जादा लोक्कां जो मसीह रा सुब बसेख सूणाई सकणा। 16ताकि असी तुसा रे इलाके री सीमा का अग्गे बधी करी, होर इलाक्केयां बिच भी सुब बसेख सुनाण, ते ए ही नी कि असी दूज्जेयां री सीमा रे अन्दर बणे-बणाए कम्मां पर गर्व करण। 17पर जिय्यां कि पवित्रशास्त्र बिच लिख्खे रा है,
“जे अगर कोई गर्व करो, से प्रभु पर ही गर्व करो।”
18किजोकी जे अपणी तारिफ करदा, से नी, पर जिसेरी तारिफ प्रभु करदे, से ही प्रभु री नजरां बिच सही है।
Attualmente Selezionati:
2 कुरुन्थियों 10: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.