2 कुरुन्थियों 1
1
पौलुस रा परमेश्वर जो शुकर करणा
1मैं पौलुस परमेश्वर री मर्जी कने मसीह यीशु रा प्रेरित है। ते असा रे विश्वासी भ्याल तीमुथियुस कने कुरिन्थुस सहर बिच परमेश्वर री कलीसिया जो ते अखाया प्रदेश रे परमेश्वर रे सारे लोक्कां जो ए चीठ्ठी लिख्खेया करदा है। 2असा रे स्वर्ग बिच रैह्णे वाले पिता परमेश्वर अते प्रभु मसीह यीशु रे पास्से का तुसा सारेयां जो अनुग्रह अते सांती मिलदी रे।
परमेश्वर रा धन्यवाद करणा
3असा रे प्रभु यीशु मसीह रे पिता ते परमेश्वर रा शुकर करदे, जे दया रा पिता है, ते हमेसा असा जो तसल्ली दिंदे। 4से असा री हर मुसीबत बिच असा जो तसल्ली दिंदे, ताकि असी भी तिन्हा लोक्कां जो तसल्ली देई सकण जे मुसीबत बिच हिन, जिय्यां परमेश्वर ने असा जो तसल्ली दित्ती। 5किजोकी असी जिन्ना जादा मसीह यीशु तांइ जुल्म सैह्ंदे, परमेश्वर तिन्ना ही जादा मसीह यीशु रे जरिये असा जो तसल्ली दिंदे। 6असी इस उम्मीद बिच जुल्म सहन करदे कि जिय्यां परमेश्वर ने असा जो तसल्ली दित्ती, तिय्यां ही तिन्हा ने तुसा जो भी तसल्ली दैणी। से तसल्ली मिलणे री वजह कने तुसा भी बड़े सबर कने तिन्हा जुल्म जो सेइ लैणा जिन्हा जो असी भी सहन करेया करदे हिन। 7तुसा तांइ असा जो पूरी उम्मीद है, किजोकी असी जाणदे कि जिय्यां तुसा असा रे जुल्म बिच साझी हुन्दे, तिय्यां ही असा री तिस आस बिच भी तुसा साझी होणा जे परमेश्वर ने असा जो दैणी। 8ओ मेरे संगी विश्वासियों, असी ए चांह्दे कि तुसा तिन्हा जुल्मां रे बारे बिच जाणो, जे असा जो एशिया प्रदेश बिच झेलणा पे, तित्ते असी असा री सैह्णे री ताकत का केई जादा तकलीफ बिच फसी गे थिये, इत्ते तक कि असा रे जिन्दे बचणे री भी कोई उम्मीद नी बची थी। 9बल्कि असी ए मन्नी लेया थिया कि अवे असा जो मारी दित्ता जाणा, पर आखिरकार असी अप्पु रा भरोसा छड्डी करी परमेश्वर पर ही पूरे तरिक्के कने भरोस्सा रख्खेया जे मरे रे लोक्कां जो भी जिन्दा करी दिंदे। 10तिन्हा ने असा जो मौत रे बड़े बड्डे खतरे का बचाया, ते अग्गे भी बचाणा। असा ने तिन्हा पर आस रख्खे री है, कि तिन्हा ने असा जो बचांदे रैह्णा। 11तुसा जो भी प्रार्थना करी असा री मदद करणा चाएदी, ताकि मते मणू असा रे पास्से का तिन्हा आशीषां तांइ परमेश्वर रा शुकर करण जे परमेश्वर ने असा जो मती प्रार्थनां जो सुणी करी दित्ते री हिन।
परमेश्वर रे मणूआं तांइ इक्क प्रेरित रा कम्म
पौलुस रा सफर योजना बिच बदलाव
12किजोकी असी अपणे विवेक री इस गवाई पर असी पूरी बुड़ख कने बोलदे कि असी अपणे हर काम्म-काज बिच परमेश्वर री दित्ते री पवित्रता ते सच्चाई कने जिन्दगी जिन्दे, खासतौर पर जां असी तुसा कने थिये। असी अपणी इन्सानी समझ पर नी पर परमेश्वर रे अनुग्रह पर निर्भर रैहन्दे। 13-14असी तुसा जो से ही लिखदे जे तुसा पढ़ी ते समजी सकदे। हालांकि अब्बे तुसा असा री गल्लां जो पूरे तरिक्के कने नी समजी पांदे, पर असा जो आस है कि तुसा असा री गल्लां जो पूरे तरिक्के कने समझणा। ताकि मसीह यीशु रे हटणे रे बेल्ले तुसा असा पर तिन्ना ही गर्व करी सको, जिन्ना असा जो तुसा पर है।
सफर बिच बदलाव
15अवे जां मैं जाणदा कि तुसा घट-बध ही समजी पाया करदे हिन, इधेरे तांइ मैं तुसा का आणा चाह्ंदा ताकि मेरा तुसा का दुबारा आणे री वजह कने तुसा जो दुगणी आशीष मिल्ले। 16अते मैं ए सोच्चेया कि मकिदुनिया प्रदेश जो जांदे बेल्ले तुसा कने मिली करी जां, अते फिरी मकिदुनिया प्रदेश का हटदे बेल्ले तुसा का दुबारा आ, अते तुसा मेरे जो यहूदियां प्रदेश बिच पुजणे तिकर मेरी किच्छ मदद करो। 17मेरा मन पूरे तरिक्के कने तैयार थिया कि ए ही योजना होणी। मैं तुसा कदी “हाँ” ते कदी “ना” नी थिया बोलदा। मैं दुनिया रे लोक्कां#1:17 दुनिया रे लोक्कां अभक्त लोक सांई योजना नी बणांदा। 18जिय्यां परमेश्वर विश्वासयोग्य हिन, तिय्यां ही असा री गल्लां हमेसा ही सच हुंदी। 19किजोकी मैं पौलुस, सिलवानुस ते तीमुथियुस ने, परमेश्वर रे पुत्तर मसीह यीशु रा सुब बसेख रा प्रचार तुसा लोक्कां बिच कित्तेया, ते मसीह यीशु बिच कदी “हाँ” ते कदी “ना” नी थिया, पर तिस बिच हमेसा सिर्फ “हाँ” ही “हाँ” है। 20परमेश्वर रे कित्ते रे सारे वादे मसीह यीशु बिच पूरे होए रे हिन। इधेरे तांइ असी “आमीन” बोलदे जिसेरा मतलब है “हाँ” ताकि असा रे जरिये परमेश्वर री महिमा हो। 21परमेश्वर ही हिन जे असा जो तुसा कने मसीह यीशु तांइ मजबूत करदे, ते लोक्कां जो मसीह यीशु रा सुब बसेख दसणे तांइ असा जो चुणे रा है। 22जिन्हा ने असा पर मौहर भी लाई ते अमानत रे तौर पर असा जो पवित्रात्मा जो दित्ता। 23परमेश्वर मेरे गवाह हिन कि मैं सच बोल्लेया करदा है कि दूज्जी वरी कुरिन्थुस सहर बिच इधेरे तांइ नी आया किजोकी मैं तुसा जो तुसा री गलतियां री वजह कने बकणा नी चाह्ंदा थिया। 24ए गल्ल नी है कि असी तुसा रे विश्वास पर काबू पाणा चाह्ंदे बल्कि तुसा री खुसी बिच तुसा रे कने कम्म करणे वाले हिन किजोकी तुसा विश्वास मजबूत हिन।
Attualmente Selezionati:
2 कुरुन्थियों 1: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.