1 कुरुन्थियों 8
8
मूर्तियां जो छड्डी करी परमेश्वर जो आदर दैणा
मूर्तां जो चढ़ाये रा भोजन
1तुसा अपणी चीठ्ठी बिच मेरे का मूर्तां जो भेंट चढ़ाए री रोट्टी रे बारे बिच पूच्छेया थिया। असा सारे ही इस मामले रे बारे बिच थोड़ा-मता जाणदे। पर ज्ञान असा जो घमंडी बणाई दिंदा, जदकी प्यार असा जो बाकि लोक्कां तांइ मददगार बणाई दिंदा। 2तुसा इय्यां समजदे कि तुसा किच्छ जाणदे, पर हल्ले तांइ तुसा इस तरिक्के कने नी जाणदे जिस तरिक्के तुसा जो जाणदा चाएदा। 3परमेश्वर अपणे प्यार करणे वालेयां जो पैछाणदे। 4-6ता अवे मैं मूर्तां जो भेंट चढ़ाए री चीजां जो खाणे रे सवाल रा जवाब दैणा चाह्ंदा। मूर्तां रे सामणे चढ़ाए री चीजां रे बारे बिच असी जाणदे। मूर्तां कोई सच्ची परमेश्वर नी हिन, सिर्फ इक्क ही सच्चा परमेश्वर है। पर असा तांइ इक्क ही प्रभु हिन ते से असा रे पिता हिन, तिन्हा ने ही सारी चीजां जो बणाया ते असी तिन्हा तांइ ही जिन्दे, पर तां भी असा तांइ तां इक्क ही परमेश्वर हिन ते से असा रे पिता हिन। तिन्हा ने सब किच्छ बणाए रा है, ते तिन्हेरी वजह कने ही असी जिन्दे हिन। तिय्यां ही असा रे इक्क ही प्रभु हिन ते से मसीह यीशु हिन। तिन्हेरे जरिये ही सब किच्छ बणाया गेया ते तिन्हेरे जरिये ही असी जिया करदे हिन। 7पर किच्छ विश्वासी मणू हल्ले भी इस गल्ल जो नी समजदे कि मूर्तां बिच कोई ताकत नी है, किजोकी पैल्ले से मणू अप्पु भी तिन्हा मूर्तां री पूजा करदे थिये, पर अवे जां से मणू तिस रोट्टी जो खांदे जे मूर्तां जो भेंट चढ़ाए री हुंदी, तां तिन्हा जो इय्यां लगदा कि से मणू मूर्ति पूजा करेया करदे हिन। तां फिरी से मणू अपणे ही ख्यालां बिच परेशान हुंदे रैह्न्दे। अपणे दिल बिच तिन्हा जो इय्यां लगदा रैहन्दा कि तिन्हा ने मूर्ति जो चढ़ाए री रोट्टी खाई करी पाप कित्ते रा है। 8पर रोट्टी असा जो परमेश्वर रे नेड़े नी लाई सकदी। खाणे का मना करणे कने असी परमेश्वर जो घट खुस करणे वाला नी बणी जांदे। ते ना ही खाणे कने असी परमेश्वर जो जादा खुस करी सकदे। 9पर चुकन्ने रेयो! इय्यां ना हो कि तुसा रे इय्यां करणे री वजह कने कुसकी संगी विश्वासी रा मसीह यीशु बिच विश्वास कमजोर होई जाओ। 10पर जे अगर कोई मणू जे विश्वास बिच कमजोर है, तेरे जो इक्क मूर्ति जो भेंट चढ़ाए री चीज खांदे दिख्खे, ते ए जाणदे होए भी इय्यां करणा पाप है, पर तां भी तिसजो से चढ़ाए री रोट्टी खाणे री चुक्क मिली जाणी। 11इस तरिक्के कने तेरे जाणदे होए भी तेरा संगी विश्वासी जिसेरा विश्वास कमजोर है तिनिए मसीह बिच विश्वास करणा छड्डी दैणा, जिसेरे तांइ मसीह यीशु ने अपणी जान दित्ती थी। 12जां तुसा कुसकी संगी विश्वासी तांइ से कम्म करणे री वजह बणदे जे तिन्हेरी नजर बिच गलत है, तां तुसा मसीह रे खिलाफ पाप करदे। 13इस वजह कने अगर मूर्तां रे सामणे चढ़ाए री रोट्टी खाणा मेरे संगी विश्वासी रे मसीह यीशु बिच विश्वास करणे का हटणे री वजह बणदा तां मैं कदी कुसकी भी तरिक्के कने से रोट्टी नी खाणी, इय्यां ना हो कि मैं अपणे संगी विश्वासियां तांइ विश्वास का भटकणे री वजह बणी जां।
Attualmente Selezionati:
1 कुरुन्थियों 8: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.