1 कुरुन्थियों 6
6
मसीह यीशु रे लोक्कां बिच मुकद्दमे होणे
1जे अगर कुसकी इक्क विश्वासी रा दूए विश्वासी कने कोई झगड़ा होई जाओ तां से अविश्वासी हाकिम का ना जाए पर से अपणे फैसले तांइ कलीसिया रे दूए विश्वासी लोक्कां का जाए। 2तुसा जो पता ही है कि परमेश्वर रे लोक्कां ने दुनिया रे लोक्कां रा हिसाब-किताब करणा। इधेरे तांइ तुसा हल्की का हल्की लड़ाई रा हिसाब-किताब करणे रे जोग्गे हिन। 3तुसा जो पता ही है कि असा ने शैतान रे दूतां रा भी हिसाब-किताब करणा इधेरे तांइ असी छोटी-मोटी दुनियावी परेसानी रा भी फैसला करी सकदे। 4जे अगर तुसा जो इदेइ छोट्टी-मोटी परेसानी रा फैसला करणा पेयो तां तुसा इदेइ गल्लां जो तिन्हा लोक्कां सामणे लेई करी नी जाणा चाएदा जे मसीह यीशु बिच विश्वास नी करदे। 5तुसा लोक्कां जो शर्म आणा चाएदी! जरुर तुसा लोक्कां बिच कोई इक्क जणा होणा ही जे संगी विश्वासियां रे झगड़े सुलझाई सके। 6पर तिसेरे बजाए इक्क विश्वासी अपणे दूए विश्वासी भाई रे खिलाफ कचेरी बिच कुसकी अविश्वासी मणू का अपणी परेसानी सुलझाणे तांइ जांदे। 7पर जां कोई विश्वासी अपणे दूए विश्वासी भाई जो कुसकी मुद्दे तांइ कचेरी बिच लेई जांदे, तां इक्क विश्वासी होणे रे नात्ते जिय्यां असा जो अप्पु-मिते रैह्णा चाएदा, असी तिय्यां रैह्णे बिच नाकाम रैह्ंदे। खरा ता ए ही होणा कि तुसा अपणे दूए विश्वासी भाई री गलती जो सहन करी लेया करो। जे अगर दूए विश्वासी भाई ने तुसा का धोख्खे कने किच्छ लेई लित्ते रा हो, तां तिसेरे खिलाफ किच्छ भी मत करो। 8पर तुसा तां अप्पु ही अपणे विश्वासी भ्यालां कने गलत करदे ते तिन्हा जो धोख्खा दिंदे। 9तुसा जो ठीक तरिक्के कने पता है धोख्खा दैणे वाले लोक्कां ने कदी परमेश्वर रे राज रे वारिस नी बणना। गलतफहमी बिच मत रेयो किजोकी व्यभिचारी, मूर्तां री पूजा करणे वाले, परस्त्रीगामी, लुच्चे, विकृत समलैंगिक रिस्ता, 10चोरी करणे वाले, लालची, शराब्बि, गालां दैणे वाले, धोख्खा-धड़ी करणे वाले मणू कदी भी परमेश्वर रे राज रे वारिस नी होई सकदे। 11ते तुसा बिच का मते जणे पैल्ले इदेय ही थिये, पर तुसा प्रभु यीशु मसीह ते परमेश्वर रे आत्मा ने तुसा रे पाप साफ कित्ते गे ते तुसा पवित्र ते धार्मिक भी ठैहराया।
सरीर ते आत्मा बिच परमेश्वर री महिमा
12तुसा बिच का किच्छ मणू बोलदे कि असी जे मर्जी चाए से करी सकदे, पर मैं तुसा जो बोलदा कि हर किच्छ असा तांइ खरा नी है। इधेरे तांइ मैं कुसकी भी चीज रे वस बिच नी होणा चाह्ंदा। 13तुसा मणू बोलदे कि रोट्टी पेट तांइ जरुरी है ते पेट रोट्टी तांइ जरुरी। ए गल्ल सही ता है पर इक्क दिन परमेश्वर ने इन्हा दोन्नां जो मुकाई दैणा।#6:13 किजोकी परमेश्वर ने विश्वासियां जो स्वर्ग बिच नौए सरीर दैणे, तिस बेल्ले असा जो रोट्टी री जरुरत नी पैणी। पर कोई भी मणू ए नी बोल्ली सकदा कि असा रे सरीर व्यभिचार तांइ बणे रे हिन। असा रे सरीर प्रभु रे हिन ते असा जो अपणे शरीरां जो प्रभु री इच्छा पूरी करणे तांइ इस्तेमाल करणा चाएदा। 14परमेश्वर ने अपणी ताकत कने असा जो मुर्देयां बिच का जिन्दा करी दैणा जिय्यां कि तिन्हा ने मसीह यीशु जो भी मुर्देयां बिच का फिरी जिन्दा कित्तेया थिया। 15तुसा जो पता ही है कि तुसा रे सरीर मसीह यीशु रे अंग हिन। मैं मसीह यीशु रे अंग जो लेई करी तिन्हा जो वेश्या रे अंग नी बणाई सकदा। इय्यां कदी भी नी होई सकदा। 16तुसा जो ता पता ही है कि जे अगर कोई मणू वेश्या कने नाजायज़ रिस्ता बणांदा तां से तिस कने इक्क तन होई जान्दा, किजोकी पवित्रशास्त्र बिच लिख्खे रा है,
“तिन्हा दोन्नां ने इक्क तन होई जाणा।”
17ते जे मणू प्रभु कने रिस्ता बणाई करी रखदा, तां तिस मणू प्रभु कने इक्क आत्मा होई जांदा। 18व्यभिचार का बची रेयो, किजोकी होर जिन्ने भी पाप मणू करदा से कने सरीर पर इदेया असर नी पांदे जदेया असर व्यभिचार करणे कने पैंदा। किजोकी व्यभिचार करणे वाला अपणे ही सरीर रे खिलाफ ही पाप करदा। 19तुसा जो पता ही है कि तुसा रा सरीर इक्क मन्दिर सांई है, जिस बिच पवित्रात्मा वास करदा जे तुसा जो परमेश्वर रे पास्से का मिल्ले रा है, ते तुसा रा अप्पु पर कोई हक नी है किजोकी तुसा परमेश्वर रे हिन। 20किजोकी प्रभु ने सुली पर कुर्बानी देई करी तुसा री कीमत चुकाए री है। इधेरे तांइ अपणे सरीर कने ठीक कम्म करी के परमेश्वर री महिमा करो।
Attualmente Selezionati:
1 कुरुन्थियों 6: CDHNT
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.