मरकुस 7
7
रिती-रबाज़ा मनणैंओ सुआल
(मत्ती 15:1-9)
1एकी धैल़ै तै फरीसी और कई शास्त्री येरुशलेम नगरी का आऐ दै; तिंयां सोभ ज़ण्हैं हुऐ ईशू सेटा कठा। 2तिन्नैं भाल़ै ईशूए च़ेल्लै नधोऐ हाथै रोटी खांदै, मतलब तिन्नैं निं यहूदी रबाज़े साबै हाथ धोऐ आथी तै।
3किल्हैकि सारै यहूदी लोग खासकर फरीसी मणछ धोआ तै आपणैं पित्तरै खोज़ै दै रिती-रबाज़े साबै रोटी खाणैं का पैहलै हाथ ज़रूरी ताऊं तैणीं निं तिंयां रोटी खांदै तै।
4ओरी-पोरी हाटा का मोलै आणी दी च़िज़ा बी नांईं तै तिंयां रबाज़े साबै हाथ बाझ़ी धोऐ खांदै तै और एही आसा होर बी कई गल्ला ज़ेता तिंयां ज़रूरी मना तै; ज़िहअ बतिल्लू, गलास और भांडै धोणैं।
5तैहीता फरीसी और शास्त्री ईशू का पुछ़अ, “तेरै च़ेल्लै किल्है निं पित्तरे रिती-रबाज़ा मंदै? रोटी खाणैं का पैहलै म्हारै रबाज़े साबै हाथ धोई किल्है निं ईंयां रोटी खांदै?”
6ईशू बोलअ तिन्नां लै इहअ, “याशायाह गूरै आसा तम्हां कपटी मणछे बारै बधाना दी पैहलै ई ठीक बोलअ द, (याशायाह 29:13)
‘ईंयां लोग होठा का ता करा मेरअ अदर, पर इनो मन आसा मुखा दूर।
7 ईंयां करा मेरी भगती फज़ूल ई,
किल्हैकि ईंयां सखाऊआ होरी लोगा का मणछे रिती-रबाज़ धर्में शिक्षा बणांईं करै।’ # 7:7 याशायाह 29:13
8 “किल्हैकि तम्हैं मना परमेशरे हुकमा का ज़ादै मणछै बणांऐं दै रिती-रबाज़ा।”
9तेखअ बोलअ ईशू तिन्नां लै, “तम्हैं आपणैं रिती-रबाज़ा मनणें तैणीं भाल़ा किहै राम्बल़ै करै करा परमेशरे हुकमा दूर! 10ज़िहअ कि मुसा गूरै आसा बोलअ द इहअ ‘आपणैं आम्मां-बाप्पूओ करै अदर। ज़ुंण आपणैं आम्मां-बाप्पू लै बूरअ बोले तेऊ पाऐ मारी।’ (लुआह 20:12; बधान 5:16)
11 “पर तम्हैं बोला इहअ कि, ज़ै कुंण मणछ आपणैं आम्मां-बाप्पू लै इहअ बोले कि ज़ुंण किछ़ हाम्हां तम्हां लै दैणअ त सह हेरअ हाम्हैं परमेशरा लै सकल़्प करी दैई। ऐबै निं हाम्हैं थारी मज़त करी सकदै।
12 “इहअ करै निं तम्हैं तेऊ मणछा आपणैं आम्मां-बाप्पूए सेऊआ टैहल करनै दैंदै। 13इहअ करै ज़ुंण तम्हैं आपणैं रिती-रबाज़ आसा बणांऐं दै तेता करै छ़ाडा तम्हैं परमेशरो हुकम मनणअ और तम्हैं करा इहै कई काम।”
मणछा छ़ोत लाणैं आल़ी गल्ला
(मत्ती 15:10-20)
14तेखअ शादै ईशू तिंयां लोग आप्पू सेटा लै संघा बोलअ इहअ, “तम्हैं सोभ शूणां मेरी गल्ला और समझ़ा। 15एही निं किछ़ै च़ीज़ आथी ज़ुंण बागा का मणछे पेटै पेशी करै छ़ोत लाआ; पर ज़ुंण मणछे मना का बागै निखल़ा तेता करै लागा तेऊ छ़ोत।
16 “ज़ै कुंण समझ़णअ च़ाहे सह शूणैं मेरी एसा गल्ला धैन लाई कि मंऐं एभै किज़ै बोलअ।”
17ज़ांऊं ईशू लोगा जैंदरा का घरा लै नाठअ, ता तेऊए च़ेल्लै पुछ़अ तेऊ का एसा कथ्या खोज़णें बारै ज़ुंण तेऊ तेभै थोल़ी घल़ी पैहलै खोज़अ त।
18ईशू बोलअ तिन्नां लै, “तम्हैं बी अज़ी समझ़ै निं आथी? तम्हां का थोघ निं आथी कि ज़ुंण च़ीज़ बागा का मणछा भितरी डेओआ, तेता करै निं तेऊ छ़ोत लागदी? 19किल्हैकि तिंयां निं तेऊए मनैं डेऊंदी, तिंयां डेओआ तेऊए पेटा भितरा लै और दोती दिशा डेऊई करै निखल़ा बागा लै।” इहअ बोली करै की तेऊ सारी खाणैं पिणें च़िज़ा शुची।
20तेखअ इहअ बी बोलअ ईशू, “ज़ुंण मणछे भितरा का निखल़ा तेता करै लागा मणछा छ़ोत। 21किल्हैकि भितरा का मतलब ज़ुंण मणछे मना का बूरै बच़ार निखल़ा ज़ुंण मणछा,
“कंज़रैई, च़ोरी, हत्या, पराई बेटल़ी संघै डेऊणअ, 22मांण, निक्की सोठ, कपट, धोखअ दैणअ, होरी बेटल़ी लै कंज़री सोठ, निंदा करनी, ज़ीद, झ़ुठअ बोल़णअ, घमंड और ऐडी गल्ला बाखा निंयां। 23ईंयां सारी बूरी गल्ला निखल़ा भितरा का और एता ई करै लागा मणछा छ़ोत।”
कनानी बेटल़ीओ बिश्वास
(मत्ती 15:21-28)
24ईशू लागअ तेखअ गलील लाक्कै का हांढदअ और तेखअ पुजअ सह सूर सैदा लाक्कै। तिधी एकी घरै पुजी करै च़ाहअ त ईशू इहअ कि मेरअ थोघ निं लोल़ी होरी कोही का लागअ कि इधी आसा; पर लोगा का गअ थोघ लागी।
25तिधी गई तेभी एक बेटल़ी एछी; तेसरी होछ़ी शोहरी दी त भूत शाचअ द, सह आई ईशूए बारै शूणीं करै तिधी और सह पल़ी ईशूए च़रणैं। 26सह आसा ती यूनानी और सिरीया लाक्के सुरूफिनीकी नगरी का। तेसा की ईशू सेटा अरज़ कि मेरी शोहरी आसा भूत शाचअ द तेऊ भूता काढ तेसा का पोर्ही।
27ईशू बोलअ तेसा बेटल़ी लै, “पैहलै दै लान्हैं रज़ी लणै, किल्हैकि अह निं ठीक हणअ कि ज़ुंण रोटी लान्हैं लै आसा डाही दी बणांईं; तेता कुंण कुत्तै आजू शोटे” (किल्हैकि यहूदी लोग समझ़ा तै आप्पू छ़ाडी होरी लोगा कुत्तै ज़िहै)।
28तेसा बोलअ ईशू लै, “अह गल्ल आसा ठीक, पर हे प्रभू; कुत्तै बी हआ लान्हैं खोल़ै शोटै दै ठोर म्हारा न्हैल़ै लागै दै।”
29तेखअ बोलअ ईशू तेसा लै, “तंऐं दैनअ ठीक ज़बाब! तूह डेऊ ऐबै आपणैं घरा लै, भूत गअ तेरी शोहरी का निखल़ी।” 30तेसा भाल़अ आपणैं घरै पुजी करै कि भूत गअ तेसा शोहरी का निखल़ी शोहरी ती राम्बल़ी गई दी हई।
टौणैं और हकलै मणछो ठीक हणअ
31तेखअ नाठअ ईशू सूर और सैदा लाक्कै का दिकापुलिस बाती हांढदी गलील समुंदरा सेटा। 32ता, लोगै आणअ ईशू सेटा लै एक टौणअ और सह करा त गल्ला बी थाभल़ी, संघा की तिन्नैं लोगै ईशू सेटा एही अरज़ कि एऊ छ़ुंह आपणैं हाथा करै ताकि सह राम्बल़अ होए।
33ईशू निंयं सह मणछ लोगे जेल्ह-मरेल्ही जैंदरा का दूर ज़िहअ। तेऊ पाई आपणीं गुंठी तेऊए कानै। तेखअ आपणीं गुंठी दी धख ज़िहअ थूक लाई करै छ़ुंईं तेऊए ज़िभ।
34तेखअ सरगा बाखा लै भाल़ी प्राथणां करदी लाम्मअ शाह काढी करै बोलअ तेऊ मणछा लै आपणीं बोली दी, “इप्फतह” मतलब, “खुल्ह” 35तेऊए काना का लागअ तेभी राम्बल़अ शुण्हदअ ता तेऊए ज़िभ बी हुई ठीक और सह लागअ गल्ला करदअ।
36ईशू बोलअ तिन्नां लोगा लै इहअ कि एसा गल्ला निं कोही का खोज़ी। तेऊ किअ तिन्नां लै नांईं पर तिन्नैं खोज़ी तिंयां गल्ला सारै दी। 37तिंयां लागै रहैन हई करै बोलदै, “ज़ुंण बी तेऊ किअ सह किअ बधिया; सह दैआ टौणैं लै शुणने और टाट्टै लै दैआ बोल़णें शगती।”
Attualmente Selezionati:
मरकुस 7: OSJNT
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
This work is licensed under Creative Commons Attribution-ShareAlike 4.0 License.
