उत्पत्ति 2
2
सातुआ दिन-रामो रा दिन
1ईंयाँ सर्ग ओर तरतिया री सारिया चीजा रा बनाणा पूरा ऊआ। 2यहोवा परमेशरे आपणा काम, जो से करो था, सातुए दिने पूरा कित्तेया। तेबे तिने आपणे सारे कित्ते रे कामो ते सातुए दिने राम कित्तेया।#2:2 इब्रानी 4:4 3ओर परमेशरे सातुए दिनो खे आशीष दित्ती ओर पवित्र ठराया, कऊँकि तेस दिने तिने आपणी सारी सृष्टिया खे बनाणे रे सारे कामो ते राम कित्तेया। 4सर्ग ओर तरती परमेशरे ईंयाँ बणाए कि जेबे सेयो बणे, मतलब जेस दिने परमेशरे सर्ग ओर तरती बणाए 5तदुओ तक कोई बी पौधा जमीना पाँदे नि था ओर ना ई तरतिया पाँदे कोई छोटा पौधा जम्मी रा था, कऊँकि परमेशर यहोवा तरतिया पाँदे पाणी नि बरसाई राखेया था ओर जमीना पाँदे जिम्मीदारा करने खे कोई बी माणूं नि था। 6तेबे बी पाल़ा तरतिया ते उठो था, जेते की सारी जमीन सींजी जाओ थी।
माणूं बनाणे री शुरूआत
7तेबे परमेशरे आदमी जमीना री माट्टिए की बणाया ओर तेसरी नासा रे जिन्दगिया रा साआ पाया। तेबे आदमी जिऊँदा प्राणी बणीगा।#2:7 1 कुरि. 15:45 8तेबे परमेशरे अदन प्रदेशो रे पूर्वो रे कनारे एक बगीचा लगाया ओर तेती आदमी, जो तिने बणाया था, राखेया। 9परमेशरे जमीना ते सब प्रकारा रे डाल़, जो देखणे खे बांके ओर जिना रे फल़ खाणे खे अच्छे ए, जमाए ओर तिने बगीचे बीचे जिन्दगिया रा डाल़ ओर खरे ओर बुरे ज्ञानो रा डाल़ बी लगाया।#2:9 प्रका. 2:7; 22:14 10तेस बगीचे खे सींजणे खे एक बऊत बड़ी नदी अदन प्रदेशो ते निकल़ी ओर तेथा ते आगे बह्यी की चार नदिया बणीगिया।#2:10 प्रका. 22:2 11पईली नदिया रा नाओं पीशोन ए, जेसे हवीला नाओं रा सारा देश जिदे सूईना मिलोआ, केरी राखेया। 12तेते प्रदेशो रा सूईना खरा ए, तेती मोती ओर सुलैमानी पात्थर बी मिलोए। 13दूजी नदिया रा नाओं गीहोन ए, ये सेईए, जेसे कूशो#2:13 कूशो इजी खे इथोपिया बी बोलोए रा सारा देश केरी राखेया। 14तीजिया नदिया रा नाओं हिद्देकेल ए, ये सेईए, जो अश्शूरो रे पूर्वो री तरफा खे बह्ओई। चौथी नदिया रा नाओं फरात ए। 15तेबे परमेशरे आदमी#2:15 आदमी आदमिए खे इब्रानी पाषा रे आदम बोलेया अदनो रे बगीचे रे राखी ता, ताकि से तिदे काम करो ओर तिजी री देख-भाल़ करो। 16ओर परमेशर यहोवा आदमिए खे ये आज्ञा दित्ती, “तूँ बगीचे रे सारे डाल़ा रे फल़़ बिना टोके खाई सकेया, 17पर खरे ओर बुरे ज्ञानो रा जो डाल़ ए, तिजी रा फल़़ तैं कदी नि खाणा, जेस दिने तूँ तिजी रा फल़़ खाएगा, तेस दिने ई तूँ जरूर मरी जाणा।”
18तेबे परमेशर यहोवा बोलेया, “आदमिए रा कल्ला रणा ठीक निए, तेसखे मां एड़ा जोड़ीदार बनाणा, जेस साथे से मेल खाओ।”#2:18 1 कुरि. 11:9 19ओर परमेशर यहोवा जमीना पाँदले सारिया जातिया रे बणो रे डांगर ओर सर्गो रे सब प्रकारा रे पंछिया खे बणाई की आदमिए गे ली आया, कि देखूँ कि से तिना रे क्या नाओं राखोआ ओर जेस-जेस जिऊँदे प्राणिए रा जो-जो नाओं आदमिए राखेया, सेई तेसरा नाओं ऊईगा। 20ईंयाँ आदमिए सबी जातिया रे करेलू डांगर ओर सर्गो रे पंछी ओर सबी जातिया रे बणो रे जानवरा रे नाओं राखे, पर आदमिए खे कोई एड़ा जोड़ीदार नि मिलेया जो तेस साथे मेल खाओ। 21तेबे परमेशर यहोवा आदमी पारी नींजा दे पाईता ओर जेबे से सईगा, तेबे तिने तेसरी एक पसली निकयाल़ी की तेतेरिया जगा दे मास परीता।#2:21 1 कुरि. 11:8 22ओर परमेशर यहोवा तेसा पसलिया खे, जो तिने आदमिए ते निकयाल़ी थी, जवाणस बणाई ती ओर तेसा खे आदमिए गे ली आया।#2:22 1 तीमु. 2:13 23तेबे आदमिए बोलेया, “एबे ये मेरी आड्डिया री आड्डी ओर मेरे मासो रा मास ए, एसा खे जवाणस बोलेया जाणा, कऊँकि ये मर्दो ते निकयाल़ी राखी।” 24इजी बजअ ते मर्द आपणे माए-बाओ खे छाडी की आपणियां लाड़िया साथे मिलेया रा रणा ओर सेयो एक तन बणे रे रणे।#2:24 मत्ती 19:5, मर. 10:7, 8, इफि. 5:31 25आदमी ओर तेसरी लाड़ी दोनो नांगे थे, पर तिना खे शर्म नि आओ थी।
Attualmente Selezionati:
उत्पत्ति 2: BGH
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
This work is licensed under Creative Commons Attribution-ShareAlike 4.0 License.
