Va le Roma 6
6
A kufa hi tlhelo ga kuonha.
1Makunu hi taku yini ke? Hi ta simamisa kuonheni lezaku a tipswalo ti fela ku anza ke?
2Kokwihi! Hina lava hi fileko hi tlhelo ga kuonha, xana hi nga ha hanyisa kuyini lomu ka kona ke? Gal. 2:19; 1 Ped. 2:24
3Kutani a mu zi tivi nwina lezaku hina hontlhe hi nga bapatizelwa ka Kristu Jesu, hi lo bapatizelwa kufeni kakwe ke? 1 Kor. 15:29; Gal. 3:27
4Hikwalaho hi lahlilwe zinwe naye kufeni hi kubapatiza; lezaku kota lezi Kristu a nga vuxiwa hi ka vafileko hi kungangamela ka Dadani, hizalezo na hinawu hi fela ku famba hi mahanyela maswa. Tis. 19:13; Kol. 2:12; 3:10
5Hakuva loku hi tlhanganyisilwe zinwe naye hi ku fanana ka kufa kakwe, hi ta tlhanganyiswa naye kambe hi ku fanana ni kuvuka kakwe; Gal. 5:13
6na hi tiva lezaku a munhu wa hina wa kale i belelwe zinwe naye, kasi a miri wa kuonha wu fela ku hetiswa, lezaku hi nga havi tikhumbi ta kuonha, Gal. 2:20; Kol. 2:11
7Hakuva loyi a fileko i tirulwe kuonheni.
8Kanilezi loku hi file zinwe na Kristu, ha kholwa lezaku kambe hi ta hanya naye; Joh. 14:19; 2 Kor. 5:1; 2 Tim. 2:11
9na hi tiva lezaku lezi Kristu a vuxilweko hi ka vafileko a nga ta hafa kambe; a kufa a ka hi na ntamu hehla kakwe. Kuv. 1:18
10Hakuva a kufa loku a ngafa ha kona, i lofa kanwe hi tlhelo ga kuonha; kanilezi a kuhanya loku a hanyako ha kona, i hanyela Nungungulu.
11Hizalezo na nwinawu, ti wuleni lezaku mu file hi tlhelo ga kuonha, kanilezi mu hanyela Nungungulu ka Kristu Jesu. Gal. 2:19
A ku tlhatlheka kuonheni.
12Hikwalaho ngha mu nga vumeli a kuonha ku fuma mirini wa nwina wa kufa, lezaku mu ingisa a kunavela ka wona. Efe. 4:22
13Hambu ni ku nyikela a ziro za nwina kuonheni ziva matlhari ya kungalulami; kanilezi ti nyikeleni ka Nungungulu, khwatsi hi lava va humileko kufeni va hanya, ni ziro za nwina ziva matlhari ya kululama ya ku tirela Nungungulu.
14Hakuva a kuonha ku nga ta kuva ni ntamu hehla ka nwina; hakuva nwina a mu lahasi ka nayo, kanilezi mu lahasi ka tipswalo. Mika 7:19; Gal. 5:18
15Hi taku yini ke? Hi ta onha lezi hi nga hiko lahasi ka nayo, kanilezi hi lahasi ka tipswalo ke? Kokwihi! 1 Kor. 9:21
16Xana a mu zi tivi lezaku mu malanza ya nwinyi loyi mu ti nyikelako kakwe, mu maha malanza ya loyi mu mu ingisako, kutani ya kuonha loku ku yisako kufeni, hambu ya kuingisa loku ku yisako kululameni ke?
17A ku bongiwe Nungungulu, hakuva hambu lezi mu nga hi malanza ya kuonha, mu zi kotile a ku ingisa a gonzisela legi mu nga nyikiwa gona.
18Makunu na mu tlhatlhisilwe kuonheni, mu mahile malanza ya kululama. Lu. 1:74, 75; 1 Kor. 7:22; Gal. 5:1
19Nzi wula hi mawulawulela ya vanhu hi kota ya gome ga nyama ya nwina. Khwatsi hi lezi mu nga nyikela a ziro za nwina a kuva malanza ya kungahlazeki ni ya kubiha mu anza kubiheni, hizalezo makunu nyikelani a ziro za nwina a kuva malanza ya kululama lezaku muya kubasisweni.
20Hakuva laha mu nga hi malanza ya kuonha, mu wa tlhatlhekile hi tlhelo ga kululama.
21Kanilezi mu wa bhinzula yini xikhatini lexo ke? Ntsena a zilo lezi mu nga ni tingana ha zona makunu! hakuva a magumeso ya zona hi kufa.
22Kanilezi makunu na mu tlhatlhisilwe kuonheni, na mu hi malanza ya Nungungulu, mu bhinzule a kubasiswa, ni magumeso ya kona hi wutomi ga pinzukelwa.
23Hakuva a hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina. Gen. 2:17; 1 Ped. 1:4
Attualmente Selezionati:
Va le Roma 6: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.
