1 Va le Korinte 4
4
A ntiro wa vapostoli.
1Ngha na vanhu va wula ha hina lezaku hi malanza ya Kristu, ni tinekwa ta mifihlakalo ya Nungungulu. Lu. 12:42
2Tlhatakumbiri ku laveka ka tinekwa lezaku ti kumeka na ti tsumbekile.
3Kanilezi xilo xi tsongwani ka mina a kuva nzi lamuliwa hi nwina, hambu ku lamuliwa hi vanhu; na mina a nzi ti lamuli a wutsumbu ga mina.
4Hakuva a nzi ti woni na nzi hi ni nanzu wa nchumu; ahembalezoke a nzi hlayelwi loyi a lulamileko hi kota ya lezo: kanilezi loyi a nzi lamulako hi Hosi.
5Hikwalaho mu nga lamuli nchumu hi xihatla, yi kala yita Hosi; leyi yi ta nga humesa kubaseni a zilo zi fihlilweko za munyama, yi wonekelisa a makungo ya timbilu; zonake munwe ni munwani i ta kuma hi ka Nungungulu a kudzunziwa loku ku mu ringeneko. Mat. 7:1; Rom. 2:29; 2 Kor. 5:10; Kuv. 20:12
6Makunu vamakabye, lezi nzi zi wulawulile ha mina na Apolose hi kota ya nwina, lezaku mu gonza ha hina, mu nga hunzeleti lezi zi tsalilweko; kasi ku nga hi kona wa nwina a ti kukumukisako hehla ka munwani hi ku yimela munwani mugonzisi. Rom. 12:3
7Hakuva himani a ku mahako a kuva chukwana? Xini lexi u nga naxo lexi u nga nyikiwangiko ke? Kanilezi loku wena u lo xi amukela, u dzunzekela yini a ku khwatsi a ku lo xi amukela ke? Joh. 3:27; 1 Ped. 4:10
8Nweno mu sina mu xurile, nweno mu sina mu fuyile, mu fumile hi handle ka hina. Ina, nzi ngha na mu fuma, kasi hinawu hi fela ku fuma na nwina. Kuv. 3:17
9Hakuva nza alakanya nziku Nungungulu i vekile hina vapostoli a kuva nzhako ka vontlhe, khwatsi hi vanhu va yimiselweko kufa; hakuva hi mahilwe mabhemba ka misava, ni ka tingelosi, ni ka vanhu. Tis. 44:22; 2 Kor. 4:11; Maheb. 10:33
10Hina hi zipumbu hi kota ya Kristu, kanilezi nwina mu tlharihile ka Kristu; hina hi na ni gome, kanilezi nwina mu na ni ntamu; nwina ma dumiswa, kanilezi hina ha kanyiswa. Miti. 26:24; 2 Kor. 13:9
11Kala ni lezi hi na ni ndlala ni tora, hi na ni wuna, ha biwa, hi vatsenzeleki; Miti. 23:2
12ha ti karata hi ku tira hi mandla ya hina; loku hi rukatelwa hi tlhela hi katekisa; loku hi xaniswa, hina ha timisela; Mat. 5:44; Miti. 18:3; 1 Tim. 4:10; 1 Ped. 2:23
13loku hi panzwa wuxezi, hina ha khongotela. Hina hi mahilwe ku khwatsi hi chaka ga misava, hi fenze ya zilo zontlhe kala lezi.
14A nzi tsali lezi aku nzi mu chela tingana, kanilezi kasi ku mu luleka kotisa vanana va mina va ranzekako.
15Hakuva hambu loku mu ngava ni zana ga mazana ya vagonzisi ka Kristu, a mu na vadadani vanyingi, hakuva hi mina nzi nga mu beleka ka Kristu Jesu hi ivangeli. Rom. 15:20; Jak. 1:18
16Hikwalaho nza mu khongotela nziku, mahani vapimanyisi va mina. Xip. 11:1
17Hi kota ya lezo nzi rumele Timote ka nwina, loyi a nga nwananga a ranzekileko ni ku tsumbeka Hosini; i ta mu alakanyisa hi mafambela ya mina ka Kristu, khwatsi hi lezi nzi gonzisisako zona mabandleni wontihe. Miti. 19:22; 1 Tim. 1:2
18Makunu vanwani va ti kukumukisile, a ku khwatsi nzi wa nga ha tata ka nwina.
19Kanilezi, nzi tata ka nwina lokuloku, loku a Hosi yi zi ranza; zonake nzi nga ta tiva a kuwulawula ka lava va ti kukumukisako, kanilezi a ntamu wabye. Miti. 19:21; 2 Kor. 1:15
20Hakuva a mufumo wa Nungungulu a hi wa kuwulawula, kanilezi ngwa ntamu. 1 Tes. 1:5
21Xana mu ranza yini ke? A kuva nzita ka nwina nzi hi ni nhonga, kutani hi liranzo ni moya wa kurula ke?
Attualmente Selezionati:
1 Va le Korinte 4: TSC72
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Tshwa Bible © Bible Society in Mozambique, 1972, 2007.