गिनती 9
9
फसह का त्यौहार
1इस्राएलियाँ कै मिस्र देश तै लिकड़ण के दुसरे साल के पैहले महिन्ने म्ह यहोवा नै सीनै के जंगळ-बियाबान म्ह मूसा तै कह्या,
2“इस्राएली फसह नाम के त्यौहार नै उसकै सही बखत पै मनाया करैं। 3यानिके इस्से महिन्ने के चौदहवें दिन ताहीं साँझ कै बखत थम उसनै सारी विधि अर नियमां कै मुताबिक मानियो।” 4फेर मूसा नै इस्राएल के माणसां तै फसह मानण कै खात्तर कह दिया। 5अर उननै पैहले महिन्ने कै चौदहवें दिन ताहीं साँझ कै बखत सीनै के जंगळ-बियाबान म्ह फसह ताहीं मनाया; अर जो-जो हुकम यहोवा नै मूसा तै दिये थे उस्से कै मुताबिक इस्राएल के माणसां नै करया। 6पर कुछ लोग एक माणस की लाश कै जरिये अशुद्ध होण कै कारण उस दिन फसह नै ना मना सके; वे उस्से दिन मूसा अर हारुन कै धोरै जाकै मूसा तै कहण लाग्गे, 7“हम एक माणस की लाश के कारण अशुद्ध सां; पर हम क्यूँ रुके रहवां, अर इस्राएलियाँ के गेल्या यहोवा का चढ़ावा सही बखत पै क्यूँ ना चढ़ावां?” 8मूसा नै उनतै कह्या, “रुक्के रहो, मै सुण ल्यूँ के यहोवा थारै बारै म्ह के हुकम देवै सै।”
9यहोवा नै मूसा तै कह्या, 10“इस्राएलियाँ तै कह के चाहे थम चाहे थारी पीढ़ी म्ह तै कोए भी किसे लाश कै कारण अशुद्ध हो, या दूर के सफर पै हो, तोभी वो यहोवा कै खात्तर फसह नै मान्ने। 11वे उसनै दुसरे महिन्ने कै चौदहवें दिन ताहीं साँझ कै बखत मनावै; अर फसह के बलिपशु के माँस नै अखमीरी रोट्टी अर कड़वे सागपात कै गेल्या खावैं। 12अर उस म्ह तै कुछ भी सबेरै ताहीं ना राक्खै, अर ना उसकी कोए हाड्डी तोड़ै; वे फसह के त्यौहार नै सारी विधियाँ कै मुताबिक मनावै। 13पर जो माणस शुद्ध हो अर सफर पै ना हो, पर फसह कै त्यौहार नै ना मान्नै, वो माणस अपणे माणसां म्ह तै नाश करया जावै, उस माणस नै यहोवा का चढ़ावा सही बखत पै न्ही ल्याण कै कारण अपणे पाप का बोझ ठाणा पड़ैगा। 14जै कोए परदेशी थारै गेल्या रहकै चाहवै के यहोवा कै खात्तर फसह मनावै, तो वो उस्से विधि अर नियम कै मुताबिक उस ताहीं मान्नै; देशी अर परदेशी दोनुआ कै खात्तर थारी एक ए विधि हो।”
बाद्दळ अर आग
15जिस दिन निवास जो, गवाही का तम्बू भी कुह्वावै सै, खड्या करया गया, उस दिन बाद्दळ उसपै छाग्या; अर साँझ नै वो निवास पै आग की ढाळ दिख्या अर तड़कैए ताहीं दिखदा रह्या। 16हरेक दिन इसा होया करै था; यानिके दिन म्ह बाद्दळ छाया रहन्दा, अर रात म्ह आग दिखाई दिया करदी। 17अर जिब-जिब वो बाद्दळ तम्बू पै तै उठ जावै था फेर इस्राएली चल दिया करै थे; अर जिस जगहां पै बाद्दळ ठैहर ज्या था उड़ैए इस्राएली अपणे डेरे खड़े करया करैं थे। 18यहोवा के हुकम तै इस्राएली कूच करया करै थे, अर यहोवा के ए हुकम तै वे डेरे भी खड़े करया करैं थे; अर जितने दिन तक वो बाद्दळ निवास पै ठहरै था, उतने दिन ताहीं वे डेरे गेरे पड़े रहवैं थे। 19जिब बाद्दळ घणे दिन निवास पै छाया रहन्दा, फेर भी इस्राएली यहोवा के हुकम मान्दे, अर चाल्या न्ही करैं थे। 20अर कदे-कदे वो बाद्दळ थोड़े-से दिन ताहीं निवास पै रहन्दा, अर फेर भी वे यहोवा के हुकम तै डेरे गेरे पड़े रहवैं थे; अर फेर यहोवा के हुकम तै ए वे चाल्या करया करैं थे। 21अर कदे-कदे बाद्दळ सिर्फ साँझ तै तड़कैए ताहीं रहन्दा; अर जिब वो तड़कैए उठ जावै था फेर वे चल दिया करैं थे, अर जै वो रात-दिन बराबर रहन्दा, तो जिब बाद्दळ उठ जान्दा, फेर जद ए वे चाल्या करया करैं थे। 22वो बाद्दळ चाहे दो दिन, चाहे एक महिन्ने, चाहे साल भर, जिब तक निवास पै ठहरे रहन्दा, तब ताहीं इस्राएली अपणे डेरयां म्ह रहन्दे अर चाल्या न्ही करैं थे; पर जिब वो उठ जावै था फेर वे चाल्या करदे। 23यहोवा कै हुकम तै वे अपणे डेरे खड़े करदे, अर यहोवा कै ए हुकम तै वे चाल्या करैं थे; जो हुकम यहोवा मूसा कै जरिये देवै था, उसनै वे मान्या करैं थे।
Attualmente Selezionati:
गिनती 9: BGC
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.