यहेजकेल 5
5
यहेजकेल का अपणे बाळ मुँण्डवाणा
1परमेसवर नै दोबारा मेरे तै कह्या “हे माणस की सन्तान, एक पैन्नी तलवार ले, अर उसनै नाई के उस्तरे के काम म्ह ल्याकै अपणे सिर अर दाढ़ी के बाळ मुँण्ड गेर; फेर तोल्लण का तराजू लेकै बाळां के तीन बराबर हिस्से कर। 2जिब यरुशलेम नगर के घिरण के दिन पूरे हों, फेर नगर के भित्तर एक तिहाई आग म्ह डालकै जळाणा; अर एक तिहाई लेकै च्यांरु ओड़ तलवार तै मारणा#5:2 एक तिहाई लेकै च्यांरु ओड़ तलवार तै मारणा शहर कै बीच म्ह जळाया गया तीसरा हिस्सा उन माणसां ताहीं दर्शाया सै जो घेराबन्दी के दौरान शहर के भित्तर मरगे।; अर एक तिहाई नै हवा म्ह उड़ाणा, अर मै तलवार खींचकै उसपै वार करुँगा। 3फेर इन म्ह तै थोड़े-से बाळ लेकै अपणे कपड़े की कूण पै बाँधिये। 4फेर उन म्ह तै भी थोड़े-से लेकै आग कै बीच म्ह डालणा के वे आग म्ह जळ जावै; फेर उसे म्ह तै एक लौ भड़क कै सारे इस्राएलियाँ म्ह फैल जावैगी।”
5“प्रभु यहोवा न्यू कहवै सै: यरुशलेम इसाए सै; मन्नै उस ताहीं गैरजात्तां कै बीच म्ह ठहराया, अर वो च्यांरु ओड़ देशां तै घिरया सै। 6यरुशलेम नै मेरे नियमां कै बिरुध्द काम करकै गैरजात्तां तै घणी बुराई करी, अर मेरे नियमां के बिरुध्द च्यांरु ओड़ के देशां के माणसां तै घणी बुराई करी सै; क्यूँके उननै मेरे नियमां ताहीं निकम्मा जाणया, अर वे मेरे नियमां पै न्ही चाल्ले। 7इस कारण प्रभु यहोवा न्यू कहवै सै, थम जो अपणे च्यांरु ओड़ की जात्तां#5:7 अपणे च्यांरु ओड़ की जात्तां उरै नफरत की बात यो सै के इस्राएली अपणे एकमात्र सच्चे परमेसवर के उतने भी स्वामी-भक्ति न्ही रहे जितने के गैर जात अपणे झूठ्ठे देवत्यां कै खात्तर रही थी। तै घणा सोर सराबा मचान्दे, अर ना मेरी विधियाँ पै चाल्दे, ना मेरे नियमां नै मान्दे अर अपणे च्यांरु ओड़ की जात्तां के नियमां कै मुताबिक भी न्ही करया, 8इस कारण प्रभु यहोवा न्यू कहवै सै: देख, मै खुद तेरै खिलाफ सूं; अर गैरजात्तां के देखदे मै तेरे बीच न्याय के काम करुँगा। 9तेरे सारे घिनोणे काम्मां कै कारण मै तेरे बीच इसा करुँगा, जिसा ना इब ताहीं करया सै, अर ना भविष्य म्ह फेर कदे करुँगा। 10इस करकै माँ-बाप खाणे खात्तर इतणे बेचैन हो जावांगे के वे अपणे बच्चां नै खा जावैंगे अर बच्चे अपणे माँ-बाप नै खा जावांगे; अर मै तेरे ताहीं सजा देऊँगा, 11अर तेरे सारे बचे होया नै च्यांरु ओड़ तित्तर-बितर करुँगा। इस करकै प्रभु यहोवा की या वाणी सै, के मेरे जीवन की कसम, इस करकै के तन्नै मेरे पवित्रस्थान#5:11 मन्दर ताहीं अपणी सारी घिनोणी मूरतां अर सारे घिनोणे काम्मां तै अशुद्ध करया सै, मै तेरे ताहीं घटाऊँगा, अर तेरे पै दया की नजर न्ही करुँगा, अर तेरै पै कुछ भी कोमलता ना करुँगा। 12थारे म्ह तै एक तिहाई लोग उरैए यरुशलेम नगर म्ह मरैगें, अर तेरे बीच भूख तै मर मिटैगी; एक तिहाई तेरे लोवै-धोरै तलवार तै मारी जावैगी; अर एक तिहाई नै मै च्यांरु ओड़ तित्तर-बितर करुँगा अर तलवार खींचकै उनकै पाच्छै चलाऊँगा।”
13“इस तरियां तै मेरा छो शान्त होवैगा, अर अपणी जळजळाहट उनपै पूरी तरियां तै भड़काकै मै शान्ति पाऊँगा; अर जिब मै अपणी जळजळाहट उनपै पूरी तरियां तै भड़का चुकूँ, फेर यहूदा अर यरुशलेम के लोग जाण लेवैंगे के मन्नै यहोवा ए नै जळण म्ह आकै यो कह्या सै। 14मै तेरे ताहीं तेरे च्यांरु ओड़ की जात्तां कै बीच, सारे आण-जाण आळयां के देखदे होए उजाड़ूँगा, अर तेरी बदनाम्मी कराऊँगा। 15इस ताहीं जिब मै तेरे ताहीं छो अर जळजळाहट अर छो दुआण आळी घुड़कियाँ कै गैल सजा देऊँगा, फेर तेरे च्यांरु ओड़ की जात्तां के स्याम्ही बदनाम्मी, मजाक, शिक्षा अर अचम्भा होवैगा, क्यूँके मन्नै यहोवा नै यो कह्या सै। 16यो उस बखत होवैगा, जिब मै उन माणसां नै नाश करण कै खात्तर थारे पै काळ के तीखे तीर चलाकै, थारे बिचाळै काळ बढ़ाऊँगा, अर थारे अन्नरूपी आधार नै दूर करुँगा। 17अर मै थारे बीच काळ अर दुष्ट जन्तु भेज्जूँगा जो थमनै बे-ऊलाद करैंगे; अर मरी अर खून-खराब्बा थारै बीच चाल्दा रहवैगा; अर मै थारे पै दुश्मन की तलवार चलवाऊँगा, मन्नै यहोवा नै ए यो कह्या सै।”
Attualmente Selezionati:
यहेजकेल 5: BGC
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
