निर्गमन 5
5
फिरौन के स्याम्ही मूसा अर हारुन
1इसकै बाद मूसा अर हारुन नै जाकै फिरौन तै कह्या, “इस्राएल का परमेसवर यहोवा न्यू कहवै सै, ‘मेरे माणसां नै जाण दे, ताके वे जंगळ-बियाबान म्ह मेरै खात्तर त्यौहार मनावै।’” 2या बात सुणकै फिरौन नै कह्या, “यो यहोवा कौण सै के मै उसका वचन मानकै इस्राएलियाँ नै जाण दियुँ? मै यहोवा नै कोनी जाणदा अर मै इस्राएलियाँ नै न्ही जाण दियुँगा।” 3उननै कह्या, “इब्रियाँ के परमेसवर नै म्हारे तै मुलाकात करी सै; इस करकै हमनै जंगळ-बियाबान म्ह तीन दिन कै राह पै जाण दे, के अपणे परमेसवर यहोवा कै खात्तर बलिदान करां, इसा ना हो के वो म्हारै म्ह महामारी फैलावै या तलवार चलवावै।” 4फेर मिस्र देश के राजा फिरौन नै उनतै कह्या, “हे मूसा, हे हारुन, थम क्यूँ माणसां का काम छुड़ाणा चाहो सो? थम जाकै अपणे-अपणे काम करो।” 5अर फिरौन नै कह्या, “सुणो, इस देश म्ह वे माणस घणे होग्ये सैं, तो थम उननै उनकै मेहनत तै आराम दिलाणा चाहो सो!”
फिरौन कै जरिये लोगां ताहीं सजा
6फिरौन नै उस्से दिन उन मेहनत करवाण आळयां तै जो उन माणसां कै उप्पर थे, अर उनकै सरदारां तै यो हुकम दिया, 7“थम जो इब ताहीं ईट बणाण कै खात्तर माणसां नै पूळे दिया करया करदे वो आग्गै तै ना दियो; वे खुद ए जाकै अपणे खात्तर पूळे कठ्ठे करैं। 8फेर भी जितनी ईट इब ताहीं उननै बणाणी पड़ै थी उतणी ए आग्गै तै भी उनतै बणवाईयो, ईटां की गिणती ना घटाईयो; क्यूँके वे आलसी सैं; इस करकै वे न्यू कहकै चिल्लावै सैं, ‘हम जाकै अपणे परमेसवर कै खात्तर बलिदान करां।’ 9उन माणसां तै और भी मुश्किल काम करवाया जावै ताके वे उस म्ह मेहनत करदे रहवैं अर झूठ्ठी बात्तां पै ध्यान ना लगावै।”
10फेर माणसां तै मेहनत करवाण आळयां नै अर सरदारां नै बाहर जाकै उनतै कह्या, “फिरौन इस तरियां कहवै सै, ‘मै थमनै पूळे न्ही दियुँगा। 11थम ए जाकै जित्त किते पूळे मिलै ओड़ै तै उननै कठ्ठे कर-करकै ले आओ; पर थारा कोए भी काम घटाया न्ही जावैगा।’” 12इस करकै वे माणस सारे मिस्र देश म्ह तित्तर-भित्तर होए के पूळे कै बदलै खूँटी बटोरै। 13मेहनत करवाण आळे न्यू कह-कहकै उनतै तावळ करदे रहे के जिस तरियां थम पूळे पाकै करया करदे उस्से तरियां अपणा हरेक दिन का काम इब भी पूरा करो। 14अर इस्राएल के माणसां म्ह तै जिन सरदारां नै फिरौन के मेहनत करवाण आळयां नै उनका अधिकारी ठहराया था, उननै मार खाई, अर उनतै बुझ्झया गया, “के कारण सै के थमनै अपणी ठहराई होई ईटां की गिणती कै मुताबिक पैहल्या की ढाळ कल अर आज पूरी कोनी कराई?”
15फेर इस्राएलियाँ के सरदारां नै जाकै फिरौन के नाम की दुहाई न्यू कहकै दी, “तू अपणे दास्सां तै इसा बरताव क्यूँ करै सै? 16तेरे दास्सां तै पूळे तो दिये ए कोनी जान्दे अर वे म्हारे तै कहन्दे रहवै सैं, ‘ईट बणाओ, ईट बणाओ,’ अर तेरे दास्सां नै मार भी खाई सै; पर कसूर तेरे ए माणसां का सै।” 17फिरौन नै कह्या, “थम आलसी सो, बिलकुल आलसी; इस्से कारण कहो सो के म्हारै ताहीं यहोवा कै खात्तर बलिदान करण नै जाण दे। 18इब जाकै अपणा काम करो; अर पूळे थारे ताहीं न्ही दिये जावैंगे, पर ईटां की गिणती पूरी करणी पड़ैगी।” 19जिब इस्राएली सरदारां नै या बात सुणी के उनकी ईटां की गिणती न्ही घटैगी, अर हर-रोज उतणा ए काम पूरा करणा पड़ैगा, तो वे जाणगे के उनके संकट के दिन आ ग्ये सैं। 20जिब वे फिरौन कै स्याम्ही तै बाहर लिकड़ आये तो मूसा अर हारुन, जो उनतै मुलाकात करण कै खात्तर बाहर खड़े थे, उनतै मिले। 21फेर उननै मूसा अर हारुन तै कह्या, “यहोवा थारे पै निगांह करकै न्याय करै, क्यूँके थमनै म्हारै पै फिरौन अर उसकै कर्मचारियाँ की निगांह म्ह घृणित ठहराकै हमनै मारण खात्तर उनकै हाथ्थां म्ह तलवार दे दी सै।”
मूसा की परमेसवर तै शिकायत
22फेर मूसा नै यहोवा कै धोरै वापस जाकै कह्या, “हे प्रभु, तन्नै इस प्रजा कै गैल इसी बुराई क्यूँ करी? अर तन्नै मेरै ताहीं उरै क्यूँ भेज्या? 23जिब तै मै तेरे नाम तै फिरौन कै धोरै बात करण की खात्तर गया जिब तै उसनै इस प्रजा कै गैल बुरा ए बरताव करया सै, अर तन्नै अपणी प्रजा का कुछ भी छुटकारा न्ही करया।”
Attualmente Selezionati:
निर्गमन 5: BGC
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
