निर्गमन 29
29
याजक पद खात्तर अभिषेक
1“उननै पवित्र करण खात्तर जो काम तन्नै उनतै करणा सै के वे मेरै खात्तर याजक का काम करैं वो यो सै: एक निष्कलंक बाछड़ा अर दो निष्कलंक मिंढ़े लिये, 2अर अखमीरी रोट्टी, अर तेल तै सणे होए मैदा के अखमीरी फुलके, अर तेल तै चोपड़ी होई अखमीरी पापड़ी भी लिये। ये सारे गेहूँ के मैदा के बणवाईये। 3इननै एक टोकरी म्ह धरकै उस टोकरी नै उस बाछड़ां अर उन दोन्नु मिंढयाँ सुधा धोरै ले आईये। 4फेर हारुन अर उसके बेट्याँ नै मिलापआळे तम्बू के दरबाजे कै धोरै ल्याकै पाणी तै नुहाईये। 5फेर उन पोशाकां नै लेकै हारुन तै अंगरखा अर एपोद का बागा पिहराईये, अर एपोद अर चपरास बाँधिये, अर एपोद का काढ्या होया पटका भी बाँधिये; 6अर उसकै सिर पै पगड़ी धरिये, अर पगड़ी पै पवित्र मुकुट नै धरिये। 7फेर अभिषेक का तेल ले उसकै सिर पै गेर कै उसका अभिषेक करिये। 8फेर उसके बेट्याँ नै धोरै ल्याकै उननै अंगरखे पिहराईये, 9अर उसकै यानिके हारुन अर उसकै बेट्याँ कै कमरबन्द बाँधिये अर उनकै सिर पै टोप्पी धरिये; जिसतै याजक#29:9 याजक याजक का ओद्दा सदा आण आळी पीढी का होया करदा कै ओद्दा पै सदा उनका हक रहवै। इस्से ढाळ हारुन अर उसके बेट्याँ की विधि करिये।”
10“फेर बाछड़ा नै मिलापआळे तम्बू कै स्याम्ही धोरै ले आणा। अर हारुन अर उसके बेट्टे बाछड़ा कै सिर पै अपणे-अपणे हाथ धरै, 11फेर उस बाछड़ा नै यहोवा कै स्याम्ही मिलापआळे तम्बू के दरबाजे पै बलिदान करिये, 12अर बाछड़ा कै लहू म्ह तै कुछ लेकै अपणी आन्गळी तै वेदी के सीन्गां पै लगाईये, अर बाकी सारे लहू नै वेदी कै पाये पै उण्डेल दिये, 13अर जिस चर्बी तै अंतड़ियाँ ढकी रहवै सैं, अर जो झिल्ली कळेजे कै उप्पर होवै सै, उननै अर दोन्नु गुर्देयां नै उनकै उप्पर की चर्बी सुधा लेकै सारया नै वेदी पै जळाईये। 14पर बाछड़ा का माँस, अर खाल, अर गोबर, छावणी तै बाहर आग म्ह जळा दिये; क्यूँके यो पापबलि होवैगा।”
15“फेर एक मिंढा लिये, अर हारुन अर उसके बेट्टे उसकै सिर पै अपणे-अपणे हाथ धरै, 16फेर उस मिंढ़े ताहीं बलि करिये, अर उसका लहू लेकै वेदी पै चौगरदे छिड़किये। 17अर उस मिंढ़े के टुकड़े-टुकड़े करकै काटिये, अर उसकी आंतड़ी अर पैरां नै धोकै उसकै टुकड्या अर सिर कै उप्पर धरिये, 18फेर उस पूरे मिंढ़े नै वेदी पै जळाईये; वो तो यहोवा कै खात्तर होमबलि होवैगा; वो सुखदायक सुगन्ध अर यहोवा कै खात्तर हवन होवैगा।”
19“फेर दुसरे मिंढ़े नै लिये; अर हारुन अर उसके बेट्टे उसकै सिर पै अपणे-अपणे हाथ धरै, 20फेर उस मिंढ़े नै बलि करकै, अर उसके लहू म्ह तै कुछ लेकै हारुन अर उसके बेट्याँ कै सोळे कान के सिरे पै, अर उनकै सोळे हाथ अर सोळे पैर कै अँगूठयाँ पै लगाईये, अर लहू नै वेदी पै चौगरदे छिड़क दिये। 21फेर वेदी पै कै लहू, अर अभिषेक के तेल, इन दोनुआं म्ह तै कुछ-कुछ लेकै हारुन अर उसकै पोशाकां पै, अर उसकै बेट्याँ अर उनकै पोशाकां पै भी छिड़क दिये; फेर वो अपणे पोशाकां सुधा अर उसके बेट्टे भी अपणे-अपणे पोशाकां सुधा पवित्र हो जावैंगे। 22फेर मिंढ़े नै विधि आळा जाणकै उस म्ह तै चर्बी अर मोट्टी पुन्झड़ नै, अर जिस चर्बी तै आंतड़ी ढकी रहवै सैं उसनै, अर कळेजे पै की झिल्ली नै, अर चर्बी सुधा दोन्नु गुर्देयां नै, अर सोळे पुट्ठे नै लिये, 23अर अखमीरी रोट्टी की टोकरी जो यहोवा कै आग्गै धरी होवैगी उस म्ह तै भी एक रोट्टी, अर तेल तै सणे होए मैदे का एक फुलका, अर एक पापड़ी लेकै, 24इन सारया नै हारुन अर उसके बेट्याँ कै हाथ्थां म्ह धरकै हिलाई जाण की भेंट ठहराकै यहोवा कै आग्गै हलाई जावै। 25फेर उन चिज्जां नै उनकै हाथ्थां तै लेकै होमबलि की वेदी पै जळा दिये, जिसतै वो यहोवा कै स्याम्ही सुखदायक सुगन्ध ठहरै; यो तो यहोवा कै खात्तर हवन होवैगा।”
26“फेर हारुन के विधि का जो मिंढा होवैगा उसकी छात्ती नै लेकै हिलाई जाण की भेंट कै खात्तर यहोवा कै आग्गै हिलाईये; अर वो तेरा हिस्सा ठहरैगा। 27अर हारुन अर उसकै बेट्याँ की विधि का जो मिंढा होवैगा, उस म्ह तै हिलाई जाण की भेंट आळी छात्ती जो हलाई जावैगी, अर ठाए जाण का भेंट आळा पुट्ठा जो ठाया जावैगा, इन दोन्नु नै पवित्र ठहराईये। 28अर ये सदा की विधि की रीति पै इस्राएलियाँ की ओड़ तै हारुन अर उसके बेट्याँ का हिस्सा ठहरै, क्यूँके ये ठाए जाण की भेंट ठहरी सैं; अर या इस्राएलियाँ की ओड़ तै उनकै मेलबलियां म्ह तै यहोवा कै खात्तर ठाए जाण की भेंट होवैगी।”
29“हारुन की जो पवित्र पोशाक होवैंगी वो उसकै बाद उसकै बेट्टे पोत्ते औरां नै भी मिलदी रहवै, जिसतै उननै पहरे होए उनका अभिषेक अर विधि करी जावै। 30उसके बेट्याँ कै जो उसकी जगहां पै याजक होवैगा, वो जिब पवित्र स्थान म्ह सेवा-पाणी करण नै मिलापआळे तम्बू म्ह पैहला आवै, तो उन पोशाकां नै सात दिन तक पहरे रहवै।”
31“फेर याजक की विधि का जो मिंढा होवैगा उसनै लेकै उसका माँस किसे पवित्र स्थान म्ह पकाईये; 32फेर हारुन अपणे बेट्याँ समेत उस मिंढ़े का माँस अर टोकरी की रोट्टी, दोनुआं नै मिलापआळे तम्बू के दरबाजे पै खावैं। 33जिन पदार्थां तै उनकी विधि अर उननै पवित्र करण कै खात्तर प्रायश्चित करया जावैगा उननै तो वे खावैं, पर दूसरा कोए उननै खाण न्ही पावै, क्यूँके वे पवित्र होवैंगे। 34अर जै विधि आळा माँस या रोट्टी म्ह तै कुछ सबेरै तक बच्या रहवै, तो उस बचे होए नै आग म्ह जळा दियो, उसनै खाणा न्ही; क्यूँके वो पवित्र होवैगा।”
35“मन्नै तेरे ताहीं जो-जो हुकम दिये सैं, उन सारया कै मुताबिक तू हारुन अर उसकै बेट्याँ खात्तर सात दिन तक उन ताहीं नियुक्त करण की विधि करदे रहणा, 36यानिके पापबलि का एक बाछड़ा प्रायश्चित कै खात्तर हरेक दिन चढ़ाईये। अर वेदी नै भी प्रायश्चित करण कै बखत शुद्ध करिये, अर उसनै पवित्र करण खात्तर उसका अभिषेक करिये। 37सात दिन तक वेदी कै खात्तर प्रायश्चित करकै उसनै पवित्र करिये, फेर वेदी परमपवित्र ठहरैगी; अर जो कुछ उसतै छू जावैगा वो भी पवित्र हो जावैगा।”
हर रोज की भेंट
38“जो तन्नै वेदी पै रोज चढ़ाणा होवैगा वो यो सै; यानिके हर दिन एक-एक साल कै दो भेड़ के बच्चे। 39एक भेड़ के बच्चे नै तो तड़कै ए कै बखत, अर दुसरे भेड़ के बच्चे नै साँझ कै बखत चढ़ाईये। 40अर एक भेड़ के बच्चे कै गैल हीन की चौथाई#29:40 हीन की चौथाई लगभग 1 किलोग्राम जैतून का तेल कूटकै लिकाड़े होए तेल तै सण्या होया एपा का दसमां हिस्सा मैदा, अर अर्घ कै खात्तर ए चौथाई दाखमधु दिये। 41अर दुसरे भेड़ के बच्चे नै साँझ कै बखत चढ़ाईये, अर उसकै गेल्या तड़कै ए की रीति कै मुताबिक अन्नबलि अर अर्घ दोन्नु दिये, जिसतै वो सुखदायक सुगन्ध अर यहोवा कै खात्तर हवन ठहरै। 42थारी पीढ़ी तै पीढ़ी म्ह यहोवा कै आग्गै मिलापआळे तम्बू के दरबाजे पै सदा इसे तरियां ए होमबलि होया करै; या वा जगहां सै जिस म्ह मै थमनै मिल्या करुँगा अर थारे तै बात करुँगा। 43मै इस्राएलियाँ नै ओड़ै मिल्या करुँगा, अर वो तम्बू मेरे तेज तै पवित्र करया जावैगा। 44इस तरियां तै मै मिलापआळे तम्बू अर वेदी नै पवित्र करुँगा, अर हारुन अर उसकै बेट्याँ नै भी पवित्र करुँगा ताके वे मेरै खात्तर याजक का काम करैं। 45अर मै इस्राएलियाँ कै बिचाळै निवास करुँगा, अर उनका परमेसवर ठहरूँगा। 46फेर वे जाण लेवैगें के मै यहोवा उनका परमेसवर सूं, जो उननै मिस्र देश तै इस करकै लिकाड़ ले आया, के उनकै बिचाळै निवास करुँ; मै ए उनका परमेसवर यहोवा सूं।”
Attualmente Selezionati:
निर्गमन 29: BGC
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
