Hechos 22

1<<Wawqikuna y taytakuna, kanan mayapäkamay>>.

2Hebreo idiömacho parlashqanta mayarmi lapan upälakurqan. Tsawraqa Pablo kayno nirqan: 3<<Ciliciapa capitalnin Tarsucho yuriq Israel runami kä. Kay Jerusalénchömi winashqä. Tayta Gamalielmi#Hech. 5.34-39. unay ayluntsikuna yachatsishqan leykunata yachatsimashqa. Tsaymi qamkunanöla Tayta Diosta lapan shonqüwan sirviyta munä.

4<<Diospa Nänin qatiraqkunata#22.4 Diospa Nänin qatiraqkunapaq parlarqa Jesucristuman yärakuqkunapaqmi parlaykan. ushakätsiyta munarmi warmitapis olqutapis prësu tsariykur carcilman wichqatsirqä. 5Tsayno rurashqäta mas mandaq cüra y lapan Israel mayor runakunapis musyanmi. Paykunapitami ordinta chaskirqä Damascuman aywar Jesúsman yärakuqkunata Jerusalénman prësu apaykamur castigatsinäpaq.#Hech. 8.3; 26.9-11.

Jesucristo parlapashqanta Pablo wilakushqan

Hechos 9.1-19; 26.12-18

6<<Damascuman yaykuykaptïmi pulan junaqno ciëlupita atski elaqpita chipchipyar noqaman chayamurqan. 7Tsawraqa pampaman tunir mayarqä kayno nimuqta: <Saulo, Saulo, ¿imanirtaq qatikachaykämanki?> 8Tsayta mayarmi kayno tapurqä: <¿Pitaq kanki, Tayta?> Tsawraqa nimarqan: <Noqaqa Nazaretpita kaq Jesúsmi kaykä. Noqatami qatikachaykämanki>.

9<<Noqawan aywaqkuna atskita rikar [pasaypa mantsakashqami rikakurqan]. Parlapämashqantaqa manami tantiyapäkurqantsu. 10Noqanami kayno nirqä: <¿Imatataq ruräman, tayta?> Tsaynami kayno nimarqan: <Sharkur Damascuman ayway. Tsaychönami imata ruranaykipaqpis wilashunki>. 11Atski chipchipyämuptin qaprayashqa rikakuptïmi noqawan aywaykaqkuna janchaylapa Damascuman pushamarqan.

12<<Tsaychömi Ananías jutiyuq runa tarqan. Paymi Moisés qelqashqan leykunata cumplir Tayta Dios munashqanno kawarqan. Damascucho taq Israel runakunaqa lapanmi paypaq ali kashqanta nipäkuq. 13Ananías rikamaq shamurmi kayno nimarqan: <Wawqi Saulo, rikayna>. Tsayno nimaptinmi jinan höra nawï aliyaptin payta rikarqä. 14Nirkurmi kayno nimarqan: <Unay ayluntsikuna adorashqan Tayta Diosmi akrashushqanki munashqanta ruranaykipaq, Jutsaynaq Kaqta#22.14 Jutsaynaq Kaqpaq nirqa Jesucristupaqmi niykan (Isa. 53.11). rikanaykipaq y parlamushqankunatapis mayanaykipaq. 15Kananqa paypa testïgun kar rikashqaykita y mayashqaykita pïmaytapis wilapanki. 16Jukla bautizakur Tayta Diosta manakuy jutsa rurashqaykikunapita perdonashunaykipaq>.

Mana Israel runakunaman Pabluta Tayta Dios kachashqan

17<<Damascupita Jerusalénman kutiykamurmi Tayta Diosta manakunäpaq templuman yaykurqä. Manakuykaptïmi revelacioncho 18Jesucristo yuriparkamar kayno nimarqan: <Jerusalénpita jukla yarquy. Kaychöqa noqapita wilakuptiki manami chaskishunkitsu>. 19Tsayno nimaptinmi kayno nirqä: <Tayta, ¿imanirtaq mana chaskikamanmantsu? Paykuna musyapäkunmi maytsay sinagögaman aywarpis qamman yärakuqkunata maqa maqarkur carcilman apashqäta. 20Wilakuqniki Estebanta wanutsiptinpis tsay runakunapa röpanta täpakurmi kushishqa tsaycho kaykarqä>.#Hech. 7.58. 21Tsayno niptïpis nimarqan: <Ayway. Qamta kachaykä karu markakunacho kaykaq mana Israel runakunamanmi> >>.

Comandantipa munaynincho Pablo kashqan

22Mana Israel runakunaman wilakuq aywananpaq nishqanta Pablo wilakuptinmi runakuna fiyupa rabyashpan kayno nipäkurqan: <<¡Tsay runa ama kawatsuntsu! ¡Jukla wanutsun!>>

23Tsawraqa fiyupa qaparashpan janan kaq röpantapis loqtiriykur alpatapis altupa matsipäkurqan.

24Tsayno ruraptinmi Pabluta cuartel rurinman yaykaykatsir soldädukunata comandanti kayno nirqan: <<Kay runata astapäkuy. Tsayraqmi wilamäshun imanir contran sharkapäkushqantapis>>.

25Castigananpaq pankaraykätsiptinnami capitanta Pablo kayno nirqan: <<Roma runa kaykaptï y autoridäkuna manaraq juzgamaptin ¿imanirtaq astamänaykipaq kamarikurkaykanki?>>

26Tsayno niptinmi comandantiman aywar capitán kayno nirqan: <<¡Imanirtaq astanäpaq nimashqanki! ¡Tsay runaqa Roma runashi!>>

27Tsayno niptinmi comandanti aywaykur Pabluta tapurqan kayno nir: <<¿Rasunpaku Roma runa kaykanki?>>

Niptinmi Pablo kayno nirqan: <<Rasunpami Roma runa kaykä>>.

28Tsawraqa comandanti kayno nirqan: <<Noqa Roma runa kanäpaqqa atska qellaytaraqmi pägashqä>>.

Pablunami kayno nirqan: <<Noqaqa yurishqäpita patsami Roma runa kä>>.

29Tsayno niptinmi Pabluta astananpaq kaykaq soldädukuna jukla kachariykurqan. Roma runa Pablo kashqanta musyarmi comandantipis pankatsishqanpita mantsakurqan.

Autoridäkuna juntakashqancho Pablo parlashqan

30Pablupa contran imanir runakuna sharkushqantapis musyayta munarmi tsaypita jukaqnin junaq mandaq cürakunata y lapan Sanedrín juezkunata tsay comandanti qayatsirqan. Nirkurmi paykuna juntakashqanman Pabluta apatsirqan.

Attualmente Selezionati:

Hechos 22: qvmB

Evidenzia

Copia

Confronta