2 Corintios 3
3
Corintucho taq wawqi panikuna recomendación cartano kashqan
1Tsayno niptï ama yarpapäkuytsu chaskikamänaykipaq kashqala parlashqäta. Tsaynöpis ama yarpapäkuytsu chaskikamänaykipaq recomendación cartataraq nistapäkushqäta. Wakin runakuna recomendación cartata puritsiptinpis qamkuna chaskikamänaykipaqqa manami nistapäkütsu. Tsaynöpis juk markaman chayaptï chaskikamänanpaq manami qamkunapita recomendación cartata nistapäkütsu. 2Tsaypa trukanqa kikikikunami shonqücho qelqaraykaq recomendación cartä karkaykanki. Tsay cartataqa pïmaypis liyinmi.#3.2 Tsayno nirmi Pablo nirqan: Recomendación cartä mana kaptinpis wilakushqäpita Jesucristuta chaskikushqaykita musyarmi pïmaypis tantiyapäkun apóstol kashqäta. 3Tsaynöpami runakuna tantiyakurkaykan wilakushqäta chaskikur Jesucristo qelqashqan carta kashqaykita. Tsay cartataqa manami tintawantsu qelqashqa, sinöqa imayyaqpis kawaq Tayta Diospa Espïritunwanmi. Tsaynöpis manami läja rumimantsu#Éxo. 24.12. qelqashqa, sinöqa shonquykimanmi.#Jer. 31.33; Eze. 11.19; 36.26.
4Tsayno karkaykashqaykita musyapäkü Jesucristo salvamashqanpita Tayta Diosman yärakurmi. 5Wilakärinäpaq manami yachaq kashqämantsu atiënikärï, sinöqa Tayta Diosmanmi. 6Paymi noqakunata yanapaman mushuq pactupita#Jer. 31.31. wilakärinäpaq. Tsay mushuq pactuqa manami leykunapa munaynincho kawanantsipaqtsu niykämantsi, sinöqa Espíritu Santu tantiyatsimashqantsino kawanantsipaqmi. Leykunapa munaynincho kawarqa wanushqanömi kawantsi.#Rom. 7.1-6. Espíritu Santupa munaynincho kawarmi itsanqa mana ushakaq kawayta tarintsi.
Moisés qelqashqan leykunapita Jesucristupa wilakuynin mas ali kashqan
7Läja rumicho qelqaraykaq leykuna runakunata salvananpaq mana kaykaptinpis tsay leykunata Israel runakunaman Moisés chayatsiptin qaqlan fiyupami chipchipyarqan.#Éxo. 34.29. Tsay chipchipyashqan elqaqla kaykarpis fiyupami chipchipyarqan. Tsaymi Moiséspa qaqlanta rikayta mana kamäpakurqantsu. 8Moisés apamushqan leykunapis tsayno kushikuypaq kaykaptinqa ¿manaku Espíritu Santu apamushqan wilakuy mas kushikuypaq kaykan? 9Mana salvakunantsipaq kaykarpis tsay leykuna ali kaykaptinqa salvamänantsipaq kaq wilakuy mas alimi kaykan. 10Tsay leykunaqa Espíritu Santu apamushqan wilakuyman manami tinkuntsu. 11Tsaymi ushakänanpaq kaq leykuna kushikuypaq kaptinpis Jesucristupa mana ushakaq wilakuyninqa mas kushikuypaq kaykan.
12Tsayta musyarmi mana mantsakuypa wilakärï. 13Manami Moisésnötsu Diospa wilakuyninta wilakärï. Payqa qaqlanta tsapakurqan chipchipyaynin elqaykashqanta Israel runakuna mana rikananpaqmi.#Éxo. 34.33. Tsaynöpami leykuna ushakänanpaq kashqanta mana tantiyapäkurqantsu.
14Moiséspa qaqlan tsaparashqannömi Israel runakunapa yarpayninkunapis tsapakashqano kaykan. Tsaymi punta kaq pactuta liyir kananyaqpis mana tantiyapäkuntsu ushakaqla kashqanta. Jesucristuta chaskikurraqmi tantiyapäkunqa. 15Moisés qelqashqan leykunata liyirpis manami kananyaqpis tantiyapäkuntsu. 16Señornintsita chaskikurmi itsanqa tantiyakärinqana.
17Señornintsiqa Espíritu Santumi kaykan. Paypa Espïritunta chaskikurmi librina kaykantsi. 18Librina karmi Señornintsita rikaqno kaykantsi. Tsaymi runakuna rikamashpantsi kikin Señornintsita rikaqno karkaykan. Tsaynöpis Señornintsiqa Espíritu karmi waran waran yanapaykämantsi kikin kashqanno noqantsipis kanantsipaq.#Rom. 8.29; Gál. 4.19; Fil. 3.10.
Attualmente Selezionati:
2 Corintios 3: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.