1 Corintios 16
16
Ofrendata shuntananpaq nishqan
1Jerusaléncho kaq wawqi panikunapaq ofrendata shuntarqa#Rom. 15.25-26; 2Cor. 8—9. Galacia provinciacho wawqi panikunata yätsishqänöla qamkunapis shuntapäkuy. 2Semäna arur gänashqaykipita cada domingu cada ünuyki aykalatapis churapäkunki. Ama noqa chayamuptïraqqa shuntarkaykankitsu. 3Shuntashqayki ofrendata Jerusalénman apananpaq wawqikunata akrapäkuy. Chaykamurnami paykunapaq cartata rurashaq Jerusalénman apaptin wawqi panikuna chaskikärinanpaq. 4Kamakaptinqa noqapis paykunawanmi aywashaq.
May maypa aywananpaq Pablo wilashqan
5Qamkuna kaqman kutimur Macedonia provinciaparaqmi tumamushaq.#Hech. 19.21. 6Chaykamurqa capazmi tamya killa pasananyaq qamkunawan qoyäshaq. Tsaypitanami wakin markakunamanpis aywanäpaq yanapamanki. 7Manami pasädalaqa qamkunata watukuyta munätsu, sinöqa Tayta Dios munaptin qamkuna kaqcho täshaqraqmi.
8Éfesuchömi itsanqa Pentecostés fiesta chayamunanyaq täshaq. 9Atska runakuna conträ sharkuptinpis Tayta Dios yanapaykämanmi kay markakunacho ali wilakuyninta wilakunäpaq. Tsayno wilakuptïmi Jesucristuta chaskikurkaykan.#Hech. 19.8-10.
10Wawqintsi Timoteo qamkuna kaqman chayamuptin kushishqa chaskikäriy. Paypis noqanömi Jesucristupa wilakuyninta wilakuykan.#1Cor. 4.17. 11Paytaqa manakaqman ama churapäkuytsu. Ali kutimunanpaq yanapaykulay. Noqakunapis kaycho kaq wawqi panikunawan payta shuyarpaykämi.
12Qamkuna kaqman wakin wawqikuna shamuptinmi Apolustapis ruwakurqä qamkunaman shamunanpaq. Tsayno ruwakuykaptïpis manami shamuyta kamäpakuntsu. Nirkurraqmi capaz shamunqapaq.
Carta ushanan
13Imapitapis alcäbula kapäkuy. Imano nakarpis Tayta Diosman yärakäriy. Imatapis mana mantsakuypa Tayta Dios munashqanno kawapäkuy. 14Pïmaywanpis kuyanakur shumaq kawapäkuy.
15Wawqi panikuna, musyapäkunkimi Acaya provinciacho wawqintsi Estéfanas aylunkunawan#1Cor. 1.16. Jesucristuta puntata chaskikärishqanta. Paykunami wawqi panikunata imachöpis yanaparkaykan. 16Tsaymi qamkunata ruwakü paykunata cäsukärinaykipaq. Tsaynöla lapantapis paykunano yanapashuqnikikunata y yachatsishuqnikikunata cäsukäriy.
17Estéfanas, Fortunato y Acaico qamkuna kaqpita watukamaq chayamuptin lapaykita rikaqnöraqmi kushikushqä. 18Qamkunata shakyätsishushqaykinölami noqakunatapis shakyätsimashqa. Paykunata y paykunano kaqkunata shumaq respitapäkunki.
19Asia provinciacho kaykaq wawqi panikunapis qamkunapaq salüdunta apatsikamunmi. Tsaynöpis Aquila y Priscila#Hech. 18.2. y wayincho juntakaq wawqi panikunapis qamkunapaq salüdunta apatsikamunmi. 20Lapan wawqi panikunami salüduta apatsikamun. Jukniki juknikipis qaqlaykicho mutsanakushpayki winchinakäriy.
21Noqa Pablo kikïmi kay salüdütaqa qelqaykämü.
22Pipis Jesucristuta mana kuyaq kaqtaqa Tayta Dios castiganqami. ¡Señor Jesucristo, juklana kutikalämuy!
23Señor Jesucristo yanapaykuläshunki imaypis ali kawapäkunaykipaq. 24Jesucristuman yärakuq mayï kaptikimi lapaykita kuyä. [Amén.]
Attualmente Selezionati:
1 Corintios 16: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.