Genese 2
2
1KE ame umo thö drany me hmeledrany me ta je ûnyi hia thithö eû hnyin. 2Ke haba hnyi bong a seveniny Khong ame oumo anyin ta je huliwa waleji e ame ânyâ. 3Ke haba Khong ame hahnahicâ bong a seveniny, me okabâ e: anyin a e ame menâ hnyin, ûnyi hnyi anyin ta je huliwa hia thithö waleji Khong ame op me ânyâ. 4Walang je bongon ioiny drany me hmeledrany, waleji hnyi ûen adre op li ûnyi e, hnyi bong Iehova Khong ame ânyâ hmeledrany me drany. 5Ke tiga ba hnye-uten hnyei hnyi kânâ, ke tiga ca kû thö khölakiny hnyei: anyin a Iehova Khong ame tiga ca ota we ka hnyi hon kânâ, ke tiga ba at he ka belökâ kânâ; 6kʼ ame ölö thö hau ûnyi hnyi kânâ me okhubetâ hia hon kânâ. 7Ke haba Iehova Khong ame op at ge sesâiny kânâ, me menâ ka hnyi li hnyingöiny homenâiny möt; ke haba at ame wia me me hanu ae möt. 8Ke Iehova Khong ame belökâ ke hnyei hnyi ke keihen Edena e deiö; kʼ ame ip eling at waleji a hia but op. 9Ke Iehova Khong ame okûâ ûnyi hnyi kânâ ta je ûö hia thithö ae hmanenang at ka wâ, me so hnân han; me ûöiny möt minya hnyi wanben hnyei, me ûöiny wâhmakhmeto so me kong. 10Ke ame hi-ngölö ûheny hnyi Edena wagewe hnân he ka hû hnyei belök; kʼ ame vese but ûheny e me me je vheiny a vak. 11Haba ien at a bân, me, Pisona: wale at ame igigilö hia hnyei Havila, waleling ae hu gol; 12ke so but goliny hnyei e: e minya eling bedola me veto soama. 13Ke haba ien wagewe a loiny, me, Gihona: wale at ame igigilö hnyei Kuza. 14Ke haba ien wagewe a kuniny, me, Hidekela: wale ame he deiö Asuria ai. Ke Euferate wagewe a vakiny. 15Ke haba Iehova Khong ame hom at, me ip ju e hnyi hnyei Edena he ka belökâ me tuö. 16Ke Iehova Khong ame hûna ka at, ka habe, U me he ka han monu ûnyi hnyi ta je ûö hia thithö hnyi hna belök: 17ke haba ûöiny wâhmakhmetoâ so me kong, me, u me ca he ka han ûnyi hnyin: anyin a haba hnyi bong u me he ka han hnyin, e hnathu u me he ka mokcu. 18Haba Iehova Khong ame ha, ka habe, E ca so e he ka hake laba at; oge me he ka ânyâ hobi kâu ke ûhadruo ae ûcû kâu. 19Ke Iehova Khong ame op ûnyi hnyi kânâ ta je menoiny hnyot hia, me ta je meno hia ame gâ ethö; me hum ödra ka at me me wâ ia ien e ame he ka hwenyi ödra: ke haba ien ta je meno ae möt hia ame hwenyi iödra at, wale ien bi. 20Ke ame hwenyi ien ta je meno hia a vak can hnen at, me ta je meno ame gâ ethö, me ta je menoiny hnyot hia; ke adre tiga ca wâ hobi kâu at ke ûhadruo ae ûcû kâu. 21Ke Iehova Khong ame kunâ mokut hnying ka hnyi hon at, me e ame mokut; me e ame hom but ke jeien hvaken, kʼ ame hlöng hmetu ju hwaban ge utiöiny: 22ke haba jehvak wale Iehova Khong ame hia but hom ûnyi ge at, me ame op me me momo but, me su thö e ka at. 23Ke haingen at, ka habe, Walang jö hanen je jeiök, me utiö hanen vik: adre me he ka hwenyi ien, me, Momo, anyin adre hom ûnyi ge baga. 24Waleling me me he at ka hna kamen me hinyen, me kece ka âiân; kʼ ame he ka khaca thibi unyidru. 25Ke ödru lo ödru me he thu, wale liamâiân, kʼ ödru me ca hmehma bi.
Attualmente Selezionati:
Genese 2: IAAI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
maintained by the British and Foreign Bible Society