Xo̱jo̱n Salmoo̱ 119
119
Soó eén Néná
1¡Achichíra̱ tsjaa̱ xota̱ xi ta̱nisién tsjie tjimájo̱ yojoo̱ ndi̱yà nínga tjimá,
kui xi ki̱a̱ ndyi̱fítji̱ngi Kjo̱a̱kitii̱ Néná!
2¡Achichíra̱ tsjaa̱ xota̱ xi tsꞌénkjátjosón ni xi tsíchji̱a̱ Néná,
kó ngayeje ini̱ma̱a̱ nga ndyi̱mongase Kui!
3Nga ja̱koxi̱ jmí ni xi ndajín tsꞌènjín kui xotaa̱,
ngatꞌa̱ ki̱a̱ tjimá ndi̱ya̱à Néná.
4Jí boá xi je akatíxomejne̱, tsi̱ꞌe̱ nga nda si̱ꞌankjatjosónjne̱ kjo̱a̱botíxomàa̱.
5¡Achichí mejénna nga ka̱ma ndi̱yà nínga kjótsoꞌbá an,
tsi̱ꞌe̱ nga sa̱ꞌinkjatjosón an ni xi tsó kjo̱a̱botíxomàa̱!
6Kósꞌe̱ kjiꞌá boá nga jmí kjo̱a̱soboá kꞌuiéjínna,
kjiꞌanga sa̱ꞌinsée̱n ngayeje kjo̱a̱botíxomáa̱.
7Ngayejení ini̱ma̱na nga sa̱ꞌintsjaà Jí,
kjiꞌanga ka̱mana ni xi tsó kjo̱a̱kiti kixi̱i̱,
8kó kuintꞌieꞌée̱n kjo̱a̱botíxomàa̱.
¡Ngo kjo̱a̱nda, ngata̱ ꞌbíjñímasínjínní!
9Kótsꞌèn ka̱maa̱ kui nda̱ xo̱ngo̱ò nga tsjie tsꞌén kjótsoꞌbá ndi̱ya̱à.
¡Ngototo kjiꞌanga sa̱ꞌínkjatjosón ni xi tsó ée̱n!
10Ngayejení ini̱ma̱na nga tsꞌénmongasee̱ Ji,
ngata̱ boeꞌéndièjín Ji kongaboaꞌáa̱ kjo̱a̱botíxomáa̱.
11Ngi̱jin ini̱ma̱na je tikónjinna ée̱n,
tsi̱ꞌe̱ nga sa̱ꞌinjéjín an kondra̱ tse̱.
12¡Ngatamachikonñé Ji Ne!
¡Takoyèní ni xi tsó kjo̱a̱botíxomàa̱!
13Ndso̱ꞌba án boá xi katsꞌenkjién án,
nga tsíchji̱a̱ ngayeje kjo̱a̱botíxoma xi je tsíchji̱a̱ ndso̱ꞌbe Ji.
14Achichí tsjá mana nga ki̱a̱ fitji̱ngi an ni xi je kandokjo̱e̱ Ji,
ꞌniú ngase tsja mana, ta̱bo̱a̱jiín ngayeje kjo̱a̱cho̱o̱n.
15Sa̱ꞌinkjó án ni xi akatíxome Ji,
kó skotsijen cha̱n cha̱a̱n ndi̱yàa̱.
16Achichí tsjá ka̱mana kjo̱a̱a̱ kjo̱a̱botíxomáa̱,
kó jmíni̱xtjin xchi̱yana ée̱n.
17Nda ti̱ꞌinje̱ Ji kui mosòo̱ xi̱ꞌbi̱, tsi̱ꞌe̱ nga kꞌuijñá ngase nga̱sondie,
kó sa̱ꞌínkjatjosón ée̱n.
18Chjéxꞌé Jí ndyikón án,
kó kꞌuindikón án ni xi fíndikónná xí tjiín kjo̱a̱kitìi̱.
19Ta̱ ngotjón tikón an kui nga̱sondiee̱,
ngata̱ ꞌbíjñíꞌmíjínní kjo̱a̱botíxomáa̱.
20Achichí ni xi kjimaa̱ ini̱ma̱na,
nga mejeén sku̱i̱e̱ kjo̱a̱botíxomáa̱ ngatsjéni̱xtjin.
21Jí boá xi niꞌínxchínje̱ Ji xota̱ xi nkꞌakoo̱n.
¡Ngatꞌíko̱jonii̱ kui xi ndyi̱tsꞌénkjii̱n yojoo̱ kjo̱a̱botíxomàa̱!
22Xín ti̱ꞌinkjeꞌeboeꞌéní kjo̱a̱mojnóchaá, ko̱jo kjo̱a̱niꞌánchꞌoó,
ngatꞌa̱ ngatsjéni̱xtjin nga tjítsꞌenkjatjosón ni xi je kandokjo̱e̱ Ji.
23Ndatsi xota̱ xi tjiín xaá kꞌuíndo má nga an ku̱i̱chji̱a̱taꞌinna,
ta̱nga kui mosòo̱ xi̱ꞌbi̱, kjo̱a̱botíxomàa̱ boá xi bójinkon.
24Jo̱o̱n, achichí kjo̱a̱tsja tsjána ni xi je kandokjo̱e̱ Ji,
ngatꞌa̱ kuí boá xi botixómána ni xi tsꞌen an.
25Jè ngaskande nínga síndo xa̱a̱ tꞌanangii̱ tikón ini̱ma̱na,
ti̱ꞌinkꞌijñí nginí xikó tsó ée̱n.
26Jè kixiyaa Ji ndi̱yà xí tsoꞌbá an, kó Ji kiniꞌínsénní.
Ngo kjo̱a̱nda, takoyèní kjo̱a̱botíxomáa̱.
27Ti̱ꞌin Ji nga ka̱makjínna ndi̱ya̱à ni xi akatíxome Ji,
kó sa̱ꞌinkjó án ni xi fíndikónná xí niꞌín Ji.
28Ini̱ma̱na jè kjiꞌme ndasen.
¡Te̱ꞌéní ngaꞌniú, xikó tsó ée̱n!
29Xín ti̱ꞌinkjeꞌéní ndi̱ya̱à kjo̱a̱ndisoo̱,
kó te̱ꞌéní kjo̱a̱nda xi tjiín kjo̱a̱kitìi̱.
30An jè jaꞌajin an ndi̱ya̱à kjo̱a̱ꞌniátakoón,
jè katsjáa̱ko̱n an nga sa̱ꞌinkjatjosón an kjo̱a̱botíxomáa̱.
31Achichí kjimaꞌniátakón an ni xi je kandokjo̱e̱ Ji.
¡Ji Ne, ngata̱ boeꞌéndièjín Ji nga kjo̱a̱soboá kjo̱a̱ꞌa an!
32Konga má an nga kjuín án ndi̱ya̱à kjo̱a̱botíxomáa̱,
ngatꞌa̱ Jí boá xi kiniꞌíntiyé ngase Ji ini̱ma̱na.
33Ji Ne, takoyèní ndi̱ya̱à kjo̱a̱botíxomàa̱,
kó sa̱ꞌinkjatjosón an ngaskande nga kju̱i̱e̱tꞌaa̱.
34Ti̱ꞌin Ji nga ka̱makjínna, kó achichí ka̱mamejénna kjo̱a̱kitìi̱,
kó ngayejeni ini̱ma̱na nga sa̱ꞌinkjatjosón an.
35Ti̱ꞌin Ji nga ki̱a̱ kjótsoꞌbá an, ki̱a̱ ndi̱ya̱à kjo̱a̱botíxomáa̱,
ngatꞌa̱ kuí boá xi achichí kjo̱a̱tsja tsjána.
36Ti̱ꞌin Ji nga ini̱ma̱na, ta̱ ni xi kandokjo̱e̱ tsí Ji xi sa̱ꞌínmején,
kó jmí tsi kjo̱a̱xki̱ꞌá to̱o̱n.
37Xín ti̱ꞌinkjeꞌe Ji ndyikón án, tsi̱ꞌe̱ nga skotsíjenjiín ni xi jmí ni chjíjiín,
ti̱ꞌinkꞌijñíní ki̱a̱ ngi̱yaa̱ ndi̱yàa̱.
38Ti̱ꞌinkjatjosén Ji ni xi kiꞌmíyetjée̱n mosòo̱ xi̱ꞌbi̱,
kui ni xi kaseyetjée̱n xota̱ xi bendikoón Jí.
39Xín ti̱ꞌinkjeꞌéní kui kjo̱a̱soboá xi tsakjon an,
ngatꞌa̱ achichí nga nda ni xi botíxome Ji.
40Ngotꞌe̱ ꞌne̱, achichí mejénna skuie an kjo̱a̱botíxomáa̱,
ti̱ꞌinkꞌijñí nginí ngi̱yaa̱ kjo̱a̱kixi̱i̱.
41Ngatjandibániéna kjo̱a̱ni̱ma̱takóo̱n Ji Ne,
kó ꞌna̱xiéꞌéní xikó tsó én xí kiꞌmíyetjén Ji.
42Kó bo̱a̱ tsꞌén nga ka̱mana kuichjiáꞌa an kui xi skjánjo̱na,
ngatꞌa̱ ée̱n boá xi kamáꞌniátakón an.
43Nga jmíni̱xtjin chjeꞌéxíi̱n ndso̱ꞌba án én xí ja̱koxi̱i̱,
ngatꞌa̱ ni xi akatíxome boá, xi achichí ni xi kjimana nga tsꞌénkoyàa̱.
44Kó bo̱a̱ tsꞌén nga ka̱mana sa̱ꞌinkjatjosón an kjo̱a̱kitìi̱ ndyiojón ndyiojón,
ta̱kjiꞌání, ko̱jo ngatsjéni̱xtjin,
45kó kotíjña̱ ndé án ngo ngi̱ya xi tiyá,
ngatꞌa̱ jè iskjitꞌoyà an ni xi akatíxome Ji.
46Ngindyi̱ko̱n já ree̱ kuichjiá an ni xi je kandokjo̱e̱ Ji,
kó soboájín ka̱mana.
47Achichí tsjá ka̱mana kjo̱a̱a̱ kjo̱a̱botíxomáa̱,
ngatꞌa̱ achichí tjóna.
48Skjininkꞌa an ndsa̱ án, kjo̱a̱a̱ ni xi botíxome Ji,
ngatꞌa̱ achichí tjóna kui nii̱,
kó sa̱ꞌinkjó án kjo̱a̱a̱ kjo̱a̱botíxomáa̱.
49Ngatjaꞌátsjiee̱n én xí katseꞌée̱ mosòo̱,
kui xi kiniꞌín Ji nga achichí ni xi kamána nga askoyáa̱.
50Kuí boá xi katsꞌéndajonna nga kisꞌijña ndasen an,
ngatꞌa̱ ni xi kaseyetjén Ji boá xi katsꞌénkꞌijñá nginína.
51Achichí je tsajnókiena xota̱ xi nkꞌakoo̱n,
ta̱nga tsꞌénmongatꞌaxínjáa̱n kjo̱a̱kitìi̱.
52Ji Ne, kjiꞌanga jaꞌátsjienna ni xi akatíxome Ji ni̱xtjin xchá jàn,
kasakona kjo̱a̱niꞌándajon.
53Achichí xtì mána kjo̱a̱a̱ xota̱ xi ndajiín,
kui xi ꞌbíndomasien kjo̱a̱kitìi̱.
54Kjo̱a̱botíxomáa̱ boá xi salmo̱na kamá,
ki̱a̱ nínga kistsoꞌbá an, ngi̱ndie nínga nanginajín.
55Ji Ne, kjiꞌanga jñoó foaꞌátsjienna Jaꞌée̱n,
kó mejénna sa̱ꞌinkjatjosón an kjo̱a̱kitìi̱.
56Kui nii̱ xi kamána, ngatꞌa̱ tjítsꞌenkjatjosón an ni xi akatíxome Ji.
57Ji Ne, Jí boá ngayeje ni xi tjínna án,
kó jè bo̱a̱kixian an nga sa̱ꞌinkjatjosón an ée̱n.
58Ngayejeni ini̱ma̱na nga ni̱ma̱ kixian an nga tsíꞌá an kjo̱a̱ndàa̱,
ngatamani̱ma̱a̱ an, xikó tsó ée̱n.
59Katsꞌenkjó cha̱n cha̱n an kjo̱a̱a̱ ndi̱yà nínga tsoꞌbá an,
kó ndsa̱kó án, ti̱ kijítji̱ngi nginí ni xi kandokjo̱e̱ Ji.
60Tsá sa̱ꞌin an, kó nde kꞌo̱ndíyájínna nga sa̱ꞌinkjatjosón an kjo̱a̱botíxomáa̱.
61Chja̱yaa̱ xota̱ xi ꞌniú ndajiín je jaꞌatjiyajonna,
ta̱nga kji̱e̱ tsꞌenchíyàjín an Kjo̱a̱kitìi̱.
62Nga ma masien ni̱xtji̱e̱n fostjíe̱n an, tsi̱ꞌe̱ nga tsjaa ndokꞌóchji̱ì,
ta̱ngatꞌanii̱ nga kixi̱ kjo̱a̱botíxomáa̱.
63Nda yaꞌa an ngayeje xota̱ xi Ji bendikoón,
ko̱jo xota̱ xi tsꞌénkjátjosón ni xi botíxome Ji.
64Ji Ne, kjo̱a̱ni̱ma̱takóo̱n je tjikítsieni ngayeje nga̱sondiee̱.
¡Takoyèní ni xi botíxome Ji!
65Ji Ne, nda kiniꞌínje̱ Ji kui mosòo̱ xi̱ꞌbi̱, xikó má tsó ée̱n.
66Takoyèní tsi̱ꞌe̱ nga kꞌuiéna kjo̱a̱kjíntakón ko̱jo nga ka̱makjínna,
ngatꞌa̱ kjo̱a̱botíxomáa̱ boá xi je kisꞌijinna.
67Ngindiee̱ nga ni̱ma̱kjo̱a̱ kiniꞌánkꞌijñána, ndajín kjiꞌi ni xi katsꞌén,
ta̱nga ngotꞌe̱ ꞌne̱, jè ntꞌieꞌée̱n ée̱n.
68Achichí nda Ji xota̱, kó ni xi nda boá xi niꞌín Ji,
takoyèní kjo̱a̱botíxomáa̱.
69Xota̱ xi nkꞌakoo̱n, éndísó katsꞌénda kondra̱ tsa̱ꞌa̱n,
ta̱nga ngayejení ini̱ma̱na nga achichí mejénna tsꞌenkjatjosón an kjo̱a̱botíxomáa̱.
70Ini̱ma̱a̱ kui xotaa̱, jè kamákitikjo̱a̱ xikoó ndo̱ꞌo̱siényoó,
ta̱nga an achichí tsjá mana Kjo̱a̱kitìi̱.
71Nda kamána nga ni̱ma̱kjo̱a̱ kiniꞌánna,
ngatꞌa̱ bo̱a̱ tsꞌén kamána kjo̱a̱botíxomáa̱.
72Nda ngase mána Kjo̱a̱kiti xi chji̱a̱ ndso̱ꞌbe Ji,
ta̱bo̱a̱jiín kjín mi̱ to̱nsinié ko̱jo to̱ntiboa.
73Ndse̱ boá xi kiniꞌínkjìn Jí nga kiniꞌíndení,
ti̱ꞌin Ji nga ka̱makjínna, tsi̱ꞌe̱ nga skuie an kjo̱a̱botíxomàa̱.
74Xota̱ xi tsꞌéndíkoón, ngatamabena kó tsjá ngatamaa̱,
ngatꞌa̱ ée̱n boá xi ꞌniú tsꞌénkoyàa̱.
75Ji Ne, be án nga kixi̱ boá kjo̱a̱botíxomáa̱,
kuí ni nga kjiꞌanga kiniꞌíndasénní, ki̱a̱rií ni xi kiniꞌín Ji.
76Ngotꞌe̱ ꞌne̱, te̱ꞌéní kjo̱a̱ni̱ma̱takóo̱n, tsi̱ꞌe̱ nga sa̱ꞌíndajonna,
xikó tsꞌén je kiꞌmíyetjée̱n kui mosòo̱ xi̱ꞌbi̱.
77Nga sakóna kjo̱a̱ni̱ma̱takóo̱n, tsi̱ꞌe̱ nga kotíjña̱ ngase an,
ngatꞌa̱ kjo̱a̱kitìi̱ boá ni xi ꞌniú tsjá ngasena.
78Ti̱ꞌinkjeꞌe Ji kjo̱a̱soboá xota̱ xi nkꞌakoo̱n,
ngatꞌa̱ nde jmí kjo̱a̱jiín nga an ndyi̱chji̱a̱taꞌinna,
ta̱nga an, kjo̱a̱botíxomáa̱ boá xi kjójinkon an.
79An ngatamatikójo̱na xota̱ xi bendikoón Jí,
ko̱jo xi je be ni xi je kandokjo̱e̱ Ji.
80Kixi̱ ngatama ini̱ma̱na ngi̱jii̱n kjo̱a̱botíxomáa̱,
tsi̱ꞌe̱ nga soboájín ka̱mana.
81Jè mejeén kjiꞌme ini̱ma̱na nga tsꞌénkoyaa̱ kjo̱a̱ꞌnaxiéꞌáa̱,
ta̱nga ée̱n boá xi kjimaꞌniáko̱n an nga tsꞌénkoyàa̱.
82Jè mejeén kjiꞌbo ndiꞌí ndyikón án nga tsꞌénkoyaa̱ ni xi kiꞌmíyetjén Ji,
ngaskande kjiꞌání nga kji̱ndi̱bé niꞌíndajìnní.
83Jè kamáxchá án xikoó ngo ti̱ji̱ì tji̱xi̱ín xi jmí ni chjíjiín,
ta̱nga tjichíyajínna kjo̱a̱botíxomáa̱.
84Kótjín ni̱xtjin kꞌuijñá nga̱sondie kui mosòo̱ xi̱ꞌbi̱.
Kjiꞌání nga ko̱ti̱jée̱ xota̱ xi an ndyi̱mongatji̱ngina.
85Xota̱ xi nkꞌakoo̱n, je katsꞌénda ti̱xa̱ nínga mején nga kꞌo̱kayà an,
ta̱nga bo̱a̱jín ndyi̱tsꞌèn xikó tsó Kjo̱a̱kitìi̱.
86Ngayeje kjo̱a̱botíxomáa̱, ja̱koxi̱ boá,
nde jmí kjo̱a̱jiín kui xota̱ nga an ndyi̱mongatji̱ngina,
¡tasíke̱jení, ngo kjo̱a̱nda!
87Jè mejeén tsꞌatójó tꞌanangina,
ta̱nga an, ꞌbijñámasiénjín an ni xi akatíxome Ji.
88Ti̱ꞌinkꞌijñí nginí xikó kjiꞌi kjo̱a̱ni̱ma̱takóo̱n,
kó sa̱ꞌinkjatjosón an ni xi je kandokjo̱e̱ Ji.
89Ji Ne, ée̱n ngatsjéni̱xtjin nga kꞌuijñá xikoó ndiꞌakꞌajmii̱.
90Kjo̱a̱ꞌniátakóo̱n, ta̱kjiꞌání nga tikón,
Jí boá xi ꞌniú ikꞌíjñí Ji tꞌanangii̱, kó to̱kó tikón ngaskande ngotꞌe̱.
91Ngayeje nii̱ to̱kó tjíndo ngaskande ngotꞌe̱, ta̱ngatꞌanii̱ kjo̱a̱ xi katseꞌé Ji,
ngatꞌa̱ ngayeje kui nii̱ xi xáa̱ boá xi ndyi̱tsꞌèn.
92Tsi tsjájín kamána kjo̱a̱kitìi̱,
jera̱ kꞌien ndasen an tsobo̱a̱.
93Jmí ni̱xtjin xchi̱yana ni xi akatíxome Ji,
ngatꞌa̱ kuí boá kui nii̱ xi kiniꞌínkjìn Jí nga kiniꞌínkjaꞌáꞌyéní.
94ꞌNa̱xiéꞌéní, ngatꞌa̱ Jí tse̱ an,
ngatꞌa̱ jè iskjitꞌoyà an ni xi akatíxome Ji.
95Xota̱ xi ꞌniú ndajiín, je ndyi̱kondana nga mejeén sa̱ꞌínkꞌiénna,
ta̱nga an mejénna nga ka̱makjínna ni xi je kandokjo̱e̱ Ji.
96Jè kamábe an nga maa̱ fe ngayeje ni xi ndatsꞌèn kamándaa̱,
ta̱nga kjo̱a̱botíxomáa̱ jmíni̱xtjin kju̱i̱e̱.
97¡Ji Ne, Achichí tjóna kjo̱a̱kitìi̱!
¡Nga ngo ni̱xtjii̱n nga kui kjitꞌoyá án!
98Kjo̱a̱botíxomáa̱ boá xi kjínkón ngase katsꞌénna, ta̱bo̱a̱jiín kondra̱na,
ngatꞌa̱ ngatsjéni̱xtjin nga síndojinna.
99ꞌNiú ngase makjínna, ta̱bo̱a̱jiín ngayeje mostro̱na,
ngatꞌa̱ ni xi je kandokjo̱e̱ Ji boá xi tsꞌénkjó síkijí an.
100Nda ngase makjínna, ta̱bo̱a̱jiín xota̱ xi xchaá,
ngatꞌa̱ tjítsꞌenkjatjosón án ni xi akatíxome Ji.
101Jè íjñá masien an ngayeje ndi̱yà xí ndajiín,
ngatꞌa̱ mejénna nga sa̱ꞌinkjatjosón an ée̱n.
102Kji̱e̱ ꞌbijñámasiénjín an kjo̱a̱botíxomàa̱,
ngatꞌa̱ Jí boá xi akakoyéní.
103¡Achichí ixi maa̱ ndso̱ꞌba án ée̱n,
jo̱o̱n, ixi ngase ta̱bo̱a̱jiín ntsjieén!
104Kjo̱a̱botíxomáa̱ boá xi katsjána kjo̱a̱kjíntakón,
kuíni nga chꞌóna ngayeje ndi̱ya̱à kjo̱a̱ndisoo̱.
105Ée̱n boá xi ndiꞌíxò kjimaa̱ ndsa̱ko án,
kó kuí boá xi tsꞌentsíjee̱n ndi̱yàna.
106Jè katsja an ndso̱ꞌba án, kó sa̱ꞌinkjatjosón an ni xi je kixian an,
nga kuintꞌieꞌée̱n kjo̱a̱botíxoma kixi̱i̱.
107Achichí ꞌniú ndasen tikón an.
¡Ji Ne, ti̱ꞌinkꞌijñí nginí, xikó tsó ée̱n!
108Ji Ne, ti̱ꞌinjo̱ꞌo Ji chji̱e̱ xi ngayejee̱ ini̱ma̱na nga tsꞌéntsjaá ndso̱ꞌba án,
kó takoyèní ni xi botíxome Ji.
109Ngatsjéni̱xtin nga tjín xí mejeén nga ni xi ndajín sa̱ꞌínjo̱na,
ta̱nga tjítsꞌenchíyájín an kjo̱a̱kitìi̱.
110Xota̱ xi ꞌniú ndajiín chja̱ya̱ índona,
ta̱nga jmí tsi tjítsꞌenkjìi̱n yojona ni xi akatíxome Ji.
111Xikoó tsi ni xi an ikꞌíjñána kjimana ni xi je kandokjo̱e̱ Ji,
ngatꞌa̱ kuí boá xi kjo̱a̱tsjaa̱ ini̱ma̱na kjima.
112Ini̱ma̱na je katsjaákon nga sa̱ꞌinkjatjosón kjo̱a̱botíxomáa̱
ngatsjéni̱xtjin, ngaskande nga kju̱i̱e̱tꞌaa̱.
113Chꞌóna xota̱ xi jókje̱e̱n, ta̱nga achichí tjóna kjo̱a̱kitìi̱.
114Jí boá xi ngi̱ndie nínga botíjña̱ꞌma an, ko̱jo Jí boá xi chínní,
ée̱n boá xi tsꞌénkoyàa̱.
115Ti̱xiónboaꞌájnú jún xota̱ xi ꞌniú ndajín,
tsi̱ꞌe̱ nga sa̱ꞌinkjatjosón an kjo̱a̱botíxomaa̱ Néna.
116Te̱ꞌéní ngaꞌniú, xikó tsó ée̱n, kó kotíjña̱ ngase an nga̱sondie,
kó ngata̱ boeꞌéndièjín Ji nga kjo̱a̱soboá ka̱ma kjo̱a̱chiyána.
117Te̱ꞌéní ngaꞌniú, kó jmí ni ka̱májínna,
kó ngatsjéni̱xtjin nga kꞌuindikón án kjo̱a̱botíxomáa̱.
118Chꞌoóri Ji ngayeje xota̱ xi xín tsꞌénkjáꞌa kjo̱a̱botíxomáa̱,
ngatꞌa̱ ni xi ꞌbínda kui, ta̱kjo̱a̱ndaní bo̱a̱.
119Xota̱ xi ꞌniú ndajiín kui nga̱sondiee̱, ikꞌínde tꞌaxín Ji xikó maá ni xi jmí ni chjíjiín,
kuíni nga achichí tjóna ni xi je kandokjo̱e̱ Ji.
120Fotsié má yojona nga tsakjon maá Jí,
kó ni xi botíjé Jí, achichí tsakjon má an nga.
121Ni xi kjo̱a̱kixi̱ ko̱jo ni xi kixi̱ boá xi tjítsꞌen an,
ngata̱ boeꞌéndièjín Ji nga ngi̱ya tsja xota̱ xi ndajín tsꞌénjo̱na kꞌo̱ka an.
122Ti̱ꞌin Ji nga ngatsjéni̱xtjin nga nda ko̱e̱je̱e̱ kui mosòo̱ xi̱ꞌbi̱,
kó nga jmí ni xi ndajín sa̱ꞌínjo̱jínna xota̱ xi nkꞌakoo̱n.
123Jè tjichájá ndyikón án nga ndyi̱koyaa̱ nga ko̱ꞌna̱xiéꞌéní,
ko̱jo kjo̱a̱a̱ nga kjo̱tjosón kjo̱a̱kixi̱ xi kiꞌmíyetjén Ji.
124Bo̱a̱ ti̱ꞌinje̱ Ji kui mosòo̱ xi̱ꞌbi̱, xikó kjiꞌi kjo̱a̱ni̱ma̱takón xi tjiín,
kó takoyèní kjo̱a̱botíxomàa̱.
125Mosòo̱ má an, te̱ꞌéndièní nga ka̱makjínna,
kó skuié an ni xi je kandokjo̱e̱ Ji.
126Ji Ne, jè chi̱bo̱a̱a̱ nga je si̱ꞌin Ji ngo ni,
ngatꞌa̱ jè ngiti̱ ndyi̱tsꞌénchjíjiín kjo̱a̱kitìi̱.
127Kuíni nga achichí tjóna kjo̱a̱botíxomàa̱,
tjó ngasena ta̱bo̱a̱jiín to̱nsinié xi kui soboá soboaá.
128Kuíni nga kixi̱ mana ngayeje kjo̱a̱botíxomáa̱,
ta̱bo̱a̱jiín ngayeje ni xi ngasee̱,
kó jè kamáchꞌona ndi̱ya̱à ni xi ndisoo̱.
129¡Achichí fíndikónna ni xi je kandokjo̱e̱ Ji!
Kuíni nga ngi̱jin ini̱ma̱na tjíndojinni.
130Kjiꞌanga tjíꞌmíyá cha̱n cha̱n ée̱n, tsꞌentsíjenna,
kó makjiín ngayeje xota̱ xi ta̱chiboaa̱.
131Iskjíxꞌá án ndso̱ꞌba án, kó jeꞌetsꞌíꞌónna,
ngatꞌa̱ kamámejénna kjo̱a̱botíxomàa̱.
132Tsitsíjin nginíní, kó te̱ꞌéní kjo̱a̱ndàa̱,
xikó tsꞌén je kamángaá nga niꞌínje̱ Ji xota̱ xi tjoó Jaꞌée̱n.
133ꞌNiú ti̱ꞌinkꞌijñí Ji ndi̱yàna xikó tsó ée̱n,
kó nga ngojín ni xi ndajín xi botixómána an.
134Xín ti̱ꞌinkjeꞌéní ni xi ndajín xi tsꞌénjo̱na xota̱ nga̱sondiee̱,
kó bo̱a̱ tsꞌén nga sa̱ꞌinkjatjosón an ni xi akatíxome Ji.
135Nda ti̱ꞌinje̱ Ji kui mosòo̱ xi̱ꞌbi̱ nga stsitsíjìi̱n,
kó takoyèní kjo̱a̱botíxomàa̱.
136Ja̱kamá ndáfoaa̱ ndejèꞌ má kamá ndándyíkón nga askjandá an,
ngatꞌa̱ xotaa̱ katsꞌénkjatjosónjín kjo̱a̱kitìi̱.
137Kixi̱ Jí Ne, kó kixi̱ boá ni xi botíxome Ji.
138Kixi̱ ko̱jo má maꞌniátakón boá ni xi kandokjo̱e̱ Ji, xi jè katseꞌéjne̱.
139Kjo̱a̱chi̱ni̱na tjítsꞌenkjiéna,
ngatꞌa̱ kondra̱na je kichiyaá ée̱n.
140Achichí ꞌniú tsjie ée̱n,
kó kui mosòo̱ xi̱ꞌbi̱ achichí ꞌniú tjoó.
141Chichí án, kó niꞌánchꞌóna,
ta̱nga kji̱e̱ tsꞌenchíyàjín an ni xi akatíxome Ji.
142Kjo̱a̱kixi̱ xi tjiín, kjo̱a̱kixi̱ boá ngatsjéni̱xtjin,
kó kjo̱a̱kitìi̱, ni xi ja̱koxi̱ boá.
143Kjo̱a̱ni̱ma̱a̱ ko̱jo kjo̱a̱ndasee̱n jè jachótji̱ngina,
ta̱nga kjo̱a̱botíxomàa̱ boá xi kjo̱a̱tsjana.
144Ni xi je kandokjo̱e̱ Ji ngatsjéni̱xtjin nga tjiín kjo̱a̱kixi̱,
¡te̱ꞌéndièní nga nda ka̱makjínna, kó kotíjña̱ ngase an nga̱sondie!
145Ngayejení ini̱ma̱na nga ꞌniú tsꞌénchji̱a̱a̱ Ji,
¡ti̱ꞌinsénní Jí Ne!
Kó sa̱ꞌinkjatjosón an kjo̱a̱botíxomáa̱.
146Jí boá xi ꞌniú tsꞌénchji̱a̱a̱.
¡ꞌNa̱xiéꞌéní, ngo kjo̱a̱nda!
Kó skotsijen cha̱n cha̱a̱n ni xi kandokjo̱e̱ ji.
147Achichí ta̱jñó jastjíe̱n an, kó Ji tsíchji̱a̱a̱,
achichí ni xi kjimana nga tsꞌénkoyàa̱ ée̱n.
148Ngindiee̱ nga ka̱majñó, ndyikón án je síndonda nga ko̱e̱ꞌéńjñájiín,
ngatꞌa̱ ée̱n tjítsꞌenkjó án.
149Ndaꞌyé Ji nda̱na xikó kjiꞌi kjo̱a̱ni̱ma̱takón xi tjiín,
Ji Ne, ti̱ꞌinkꞌijñí nginí xikó kjiꞌi kjo̱a̱kixi̱i̱.
150Xota̱ xi ndyi̱mongatji̱ngina, je ndyi̱tsꞌèntíñaa̱ yojoo̱ ni xi ndajiín,
kó ndyi̱tsꞌénkjii̱n yojoo̱ Kjo̱a̱kitìi̱.
151Ta̱nga Ji Ne, achichí tiña tindyin Ji,
kó ja̱koxi̱ boá ngayeje kjo̱a̱botíxomàa̱.
152Jè tsienii̱ nga je kamákjínna ni xi je kandokjo̱e̱ Ji,
kui ni xi ꞌniú ikꞌíjñí Ji ngatsjéni̱xtjin.
153Tsitsíjìi̱n kjo̱a̱ni̱ma̱ xi tsꞌénfoaꞌatio an, kó ti̱ꞌindéní,
ngatꞌa̱ kji̱e̱ tsꞌenchíyàjín an kjo̱a̱kitìi̱.
154Tasíke̱jení kjo̱a̱a̱ kjo̱a̱ xi tsa̱ꞌa̱n, kó ꞌna̱xiéꞌéní,
ti̱ꞌinkꞌijñí nginí ta̱ngatꞌanii̱ ée̱n.
155Xota̱ xi ndajiín kjin síndonii̱ kjo̱a̱ꞌnaxiéꞌáa̱,
ngatꞌa̱ kjitꞌoyàjín ni xi tsó kjo̱a̱botíxomáa̱.
156¡Ji Ne, achichí tsie kjo̱a̱ni̱ma̱takón tjiín!
¡Ti̱ꞌinkꞌijñí nginí ta̱ngatꞌanii̱ kjo̱a̱kixi̱i̱!
157Achichí má kondra̱ xi tjimátji̱ngina,
ta̱nga xínjín tjítsꞌenkjaꞌa an ni xi je kandokjo̱e̱ Ji.
158Be án xota̱ xi botiñáná, kó achichí chꞌóna kuí,
ngatꞌa̱ tsꞌénkjátjosónjín ée̱n.
159¡Tsitsíjìi̱n kókjiꞌi tjóna ni xi akatíxome Ji!
¡Ti̱ꞌinkꞌijñí nginí Ji Ne, ta̱ngatꞌanii̱ kjo̱a̱ni̱ma̱takóo̱n!
160Ngayeje ée̱n, ni xi ja̱koxi̱i̱ boá xi yaꞌanii̱,
kó ngatsjéni̱xtjin nga tikón kjo̱a̱kixi̱ xi akatíxome Ji.
161Xota̱ xi tjiín xaá, nde jmí kjo̱a̱jiín nga an ndyi̱mongatji̱ngina,
ta̱nga ini̱ma̱na fotsié má nga ntꞌié ée̱n.
162Achichí kjo̱a̱tsja tsjána ée̱n,
xikó maá xota̱ xi achichí ni to̱nsinié kasakoo̱.
163Achichí ꞌniú chꞌóna kjo̱a̱ndisoo̱,
ta̱nga achichí tjóna Kjo̱a̱kitìi̱.
164Yito ndi̱yà nga ngo ni̱xtjii̱n nga tsꞌéntsjaà Jí,
ta̱ngatꞌanii̱ nga kixi̱ kjo̱a̱botíxomáa̱.
165Xota̱ xi tjoó Kjo̱a̱kitìi̱, achichí kjo̱a̱xió ꞌbeé,
kó jmíjiín kui ngo ndi̱jo̱ xi sti̱ngí.
166Ji Ne, jè askoyá an tsi̱ꞌe̱ nga ko̱ꞌna̱xiéꞌéní,
kó bo̱a̱ tjítsꞌen an xikó tsó kjo̱a̱botíxomáa̱.
167Ini̱ma̱na tjítsꞌénkjátjosón ni xi je kandokjo̱e̱ Ji,
kó achichí ꞌniú tjoó kui nii̱.
168Jè askotsijen cha̱n cha̱a̱n kjo̱a̱botíxomáa̱, ko̱jo ni xi je kandokjo̱e̱ Ji,
ngatꞌa̱ ngayeje ndi̱yàna ngindyikin Ji tikón.
169Mejénna nga ngindyikin Ji kjo̱chó nga ni̱ma̱ tꞌíxián an nga tsꞌénchji̱a̱a̱ Ji Ne,
te̱ꞌéndièní nga ka̱makjínna xikó tsó ée̱n.
170Mejénna nga ngindyikin Ji kjo̱chó nga tsꞌénchji̱a̱a̱ Ji,
ti̱ꞌindéní xikó tsó ée̱n.
171ꞌNiú ngatsꞌèntsjaà ndso̱ꞌba án,
ngatꞌa̱ Jí boá xi bokoyéní kjo̱a̱botíxomáa̱.
172Najén án boá xi ku̱i̱chji̱a̱ ée̱n,
ngatꞌa̱ kixi̱ boá ngayeje kjo̱a̱botíxomàa̱.
173Tꞌíjñinde Ji ndse̱ tsi̱ꞌe̱ nga ko̱síko̱jona,
ngatꞌa̱ ni xi akatíxome boá xi je jaꞌajin an.
174Achichí mejénna kjo̱a̱ꞌnaxiéꞌáa̱ Ji Ne,
kó Kjo̱a̱kitìi̱ boá xi kjo̱a̱tsjana.
175¡Ngatꞌíjñá ngase nga̱sondie ini̱ma̱na, kó Jí ngatsꞌèntsjaà,
kó ngatasikójona ni xi Ji akatíxome Ji!
176Jè kistsoꞌbá án xikoó ngo cho̱tsa̱nga̱ xi kichajá.
¡Ti̱ndyi̱sé ji kui mosòo̱ xi̱ꞌbi̱, ngatꞌa̱ kji̱e̱ chíyájiín kjo̱a̱botíxomàa̱!
Attualmente Selezionati:
Xo̱jo̱n Salmoo̱ 119: MAIX
Evidenzia
Condividi
Confronta
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014