1 Samuel 3
3
Dios yiyaĝana ñe'me Samuel
1Joñe'me nejoqolec jo'ne lenaĝat Samuel t'onataĝaneuo'o joñe'me Dios, queda'me uo'oe jogaa'me namajoĝonaĝaco jo'ne ja 'nalo'te jo'ne yanema joñe'me Elí. Qa'a ca'li gaa'me noloqo'ote qoueta't da'me 'uo ga'me 'laqatac ñe'me Jaliaĝanec ta'le dojapegue' ga'me jiyaĝaua. Nataq'aen yataqata ja lama'y gaa'me jiyaĝa'u ta'le 'uo joga'me lauanaĝanaĝa'j.
2Ñe'me Elí male ja yataqachiñe yauanac, ja jalcote qaya'ague da'me lec'atenaĝanaĝac. Mane'e joca'li 'uo jo'me pi'yaq da'me uetaue ga'me 'lemec qama'le t'ochetac. 3Samuel nataq'aen t'ochetac ca'li, uetaue joga'me netamenaĝaiqui joñe'me Jaliaĝanec, jo'ne nataq'aen uetaue jaga'me lae't daa'me Dios lamajoĝonaĝaco. Maliaĝa edetañgui jaga'me necoyadaĝanaqate jo'ne uetaue joga'me emec ja 'nalegue. 4Joñe'me Jaliaĝanec male yiyaĝatapega ñe'me, enaac:
«¡Samuel!»
Joñe'me 'yateguet:
«Jaa'a, jayem 'uo.»
5Qama'le chiyaqañe, yec'ate'uo joga'me uetaue joñe'me Elí, qama'le eetac:
«¿Toqoch'e jayem aviyaĝataque?»
Qama'le ñe'me Elí 'yateguet:
«Ja am 'te jiyaĝataque. Jamo, yitaĝa oviiñe.»
Qama'le ñe'me Samuel 'viyelaq, yitaĝa viiñe. 6Qalaĝaja ñe'me Jaliaĝanec yitaĝa yiyaĝana:
«¡Samuel!»
Ñe'me Samuel ñejeguem, chiyaqañe, yec'ate'uo joga'me uetaue joñe'me Elí, enaac:
«¿Toqoch'e jayem aviyaĝataque?»
Qama'le ñe'me Elí 'yateguet:
«Ja am 'te jiyaĝataque. Jamo, yitaĝa oviiñe.»
7Samuel maliaĝa ja yateton joñe'me Jaliaĝanec, qa'a joñe'me maliaĝa qaya joga'me yaloĝona, nataq'aen jona'li t'onataĝanoue da'me nejiyaĝauayaĝac joñe'me.
8Qama'le ñe'me Jaliaĝanec yitaĝa da'me 'viyelaĝalegue da'me yiyaĝana, qama'le Samuel yitaĝa ñejeguem, yec'ata joñe'me Elí qama'le yitaĝa enaac:
«¿Toqoch'e jayem aviyaĝataque?»
Elí male yetaden queda'me naqaeñe joñe'me Dios jo'ne yiyaĝatapega joñe'me nejoqolec, 9qama'le yitaĝa dojapegue', enaac:
«Jamo, yitaĝa oviiñe. Qom yitaĝa am yiyaĝatapega joñe'me Jaliaĝanec, qama'le a'uateguet: “Auoje, jayem mach'e anejoĝonec, am ñaquiaĝana”.»
Qama'le ñe'me Samuel yitaĝa 'viyelaĝa joga'me mach'e uetapegoue qama'le viiñe.
10Qama'le male yovita joñe'me Jaliaĝanec, nelochi'ña ñe'me, qama'le yitaĝa yiyaĝatapega, ena'am joga'me 'uaechiñe:
«¡Samuel! ¡Samuel!»
Samuel 'yateguet, enaac:
«Auoje, jayem mach'e anejoĝonec, am ñaquiaĝana.»
11Joñe'me Jaliaĝanec male 'uo joga'me 'yaĝatem:
«Di'me Israel, 'uo jo' qomle joga'me ja'uo, qama'le jogaa'me jo'ne domachita da'me dojo', chayovida'a yema yec'o'n jogaa'me lequetela laco. 12Qom yovita joga'me nolo', jen yepaquichigui joñe'me Elí da'me joote janem ca'li da'me 'yaqatac, queda'me jen yem da'me loiquiaqa' jogaa'me loeco jo'ne napacalo'te jogaa'me lec'oqo'te, qama'le ja yitaĝa ja'uo joda'me yichoĝodenataĝanaĝac jo'ne janema. 13Qa'a yajouaĝat da'me ja no'en jogaa'me yauote, jo'ne joote yayaten ñe'me Elí: jogaa'me lec'oqo'te ja jayem 'te 'nonaĝachedigui, qama'le ñe'me ja noqotenalo. 14Chane'eja yataqachiñe jen yepaquichigui da'me 'yaqatac jo'ne joote janem ñe'me Elí, queda'me yajouaĝat da'me ja no'en jo'ne yauotedac, qama'le ja yitaĝa ja'uo da'me lapalaqa'te daa'me loeco. Male ja jaconegueta jogaa'me lajaqaje'j jo'ne te'me yauote.»
15Qama'le yem da'me dojo', Samuel male viiñe chayovida'aguet nete'. Qama'le neloye, ñejeguem, 'youatedegue jogaa'me jo'mi joga'me tamenaĝaiqui jo'ne 'lachaqa' ñe'me Jaliaĝanec. Qama'le ñe'me Samuel t'oiyapega ta'le 'yaĝatem ñe'me Elí da'me dojo' jo'ne qoyaloĝona nataq'aen domachiya. 16Qalaĝaja ñe'me Elí paja'a yiyaĝana, enaac:
«¡Samuel, am yalec!»
'Yateguet ñe'me Samuel:
«¿Jach'e ga'me auouetaque?»
17Joñe'me Elí male yenat:
«¿Jach'e ga'me jo'ne am 'yaĝatem ñe'me Dios? Am ñachoĝodenot queda'me qaya'te jayem auoĝochi'ñejop. ¡Joñe'me Dios am yanem qomle joga'me adachoĝodec, qom te'me jayem auoĝochi'ñejop joga'me am 'yaĝatem!»
18Joñe'me Samuel male yema 'yaĝatem ñe'me Elí ga'me jo'ne joote ue'tajop ñe'me, qama'le ñe'me Elí neten, enaac:
«¡Qa'a joñe'me jo'ne mach'e Jaliaĝanec, 'noota qom ya'uo joga'me jo'ne 'yamaqaten!»
19Samuel nichiquetajeguem da'me 'loyaĝac, qama'le ñe'me Jaliaĝanec lecochiya, nataq'aen en yepaquichigui yema joga'me jo'ne joote 'yaĝatem joñe'me. 20Yema di'me Israel, chayovida'a di'me Dan nataq'aen loiquiaqa' di'me Beerseba, queda'me male qoyayaten joñe'me Samuel yataqatelegue 'laqatanaĝanaĝanec joñe'me Jaliaĝanec. 21Qama'le joñe'me Jaliaĝanec yitaĝa naloĝoneguet ca'li ua'a di'me Siló, ca'li da'me daja' jo'ne yaloĝona nale ñe'me Samuel joga'me 'laqataĝanaĝac.
Attualmente Selezionati:
1 Samuel 3: TDO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Biblia en Toba del Oeste © Sociedad Bíblica Argentina, 2014, 2019.