Матай 2
2
Дорд үзгәс ирсн цецн улс
1-2Херод гидг хан бәәсн цагт Йудьян Бетлехемд Исус төрҗ һархла, дорд үзгәс Ерусалимд цецн улс ирәд:
– Төрҗ һарсн Йудья улсин Хан альд бәәнә? Дорд үзгт бидн терүнә одынь үзләвидн, терүнд сөгдхәр ирләвидн, – гиҗ тедн келцхәв.
3Энүг соңсад Херод хан икәр үүмв. Энүнлә хамдан Ерусалимд кесг әмтн бас үүмҗ көндрв. 4Цуг Йудьян гелңгүдиг болн закана багшнриг Херод цуглулҗ авад:
– Христос альд төрх зөвтәв? – гиҗ теднәс сурв.
5-6Тедн хәрүднь иигҗ келцхәв:
– Йудьян Бетлехем гидг хотнд, юңгад гихлә, әәлдәчәр дамҗулад: «Йудьян ик хотдудас чи, Бетлехем, Йудьян һазр, бичкн бишич. Юңгад гихлә, Мини Израилин улсиг дахулҗ йовх Залач чамас төрҗ һархмн», – гиҗ бичәтә.
7Тиигхлә Херод нууцар цецн әмтиг дуудҗ авад, одн һарч ирсн цагиг теднәс медҗ авв. 8Тедниг Бетлехем тал илгәһәд:
– Одад, Нилхин тускар кинән кевәр медҗ автн, олҗ авсн цагтан нанд келҗ өгтн, би бас йовад Терүнд сөгднәв, – гив.
9-10Хаана келсиг соңсчкад, эдн һарад йовв. Дорд үзгт үзсн одыг тедн үзәд йир икәр байрлв, тернь теднә өмннь үзгдәд йовв, аш сүүлднь Нилх бәәсн һазрт ирҗ деернь зогсв. 11Герт орҗ ирчкәд, Марийиг Нилхтәһинь үзәд, тедн өвдглҗ унад, Нилх Көвүнд сөгдв. Эврәннь хаалһин уутан секәд, Терүнд алтн, саңгин идә, мирр#Мирр – каңкнсн үнртә салм. белглҗ өгв. 12Цааранднь тедн талдан хаалһар йовад, эврәннь орн нутгурн хәрцхәв. Юңгад гихлә, Бурхн тедниг Херод тал бичә одтн, гиҗ зүүднднь саглсн бәәҗ.
Египет нутгур зулҗ йовлһн
13Тедн һарч йовсна хөөн Йосипин зүүднднь Бурхна элч үзгдәд:
– Бос, Нилхиг эктәһинь авад, Египет нутгур зулҗ йовтн, нанас зәңг автлан тенд бәәтн; юңгад гихлә, Херод Нилхиг алхар седх, – гив.
14-15Тер сөөһәр Йосип босад Нилхиг эктәһинь авад, Египет тал һарч йовв, Херодыг өңгртл тедн тенд бәәв. Әәлдәчәр дамҗулҗ келсн Бурхна үгнь күцхин төлә цуг эн тоот учрв. Әәлдәч: «Би Эврәннь Көвүһән Египетәс дуудлав», – гиҗ келсмн.
Бичкдүдиг аллһн
16Тер цагт Херод цецн әмтнд меклгдсән медчкәд цухлтҗ уурлад, Бетлехемд болн терүнә эргнд бәәсн шиңкән һарсн бичкдүдиг, нилхәс авн хө мөстә күртл алтха гиҗ зәрлг өгнә. Нилхдин насинь тер цецн әмтнәс медҗ авсмн. 17-18Еремья гидг әәлдәчәр дамҗулад келсн тоотнь учрв: «Рамад ик орклһн, уульлһн, һашута хәәкрлһн соңсгдна. Рахел геесн үрдүдтән зовҗ уульҗана. Күн терүг тогтнулҗ чадш уга, юңгад гихлә, үрднь үкҗ одв».
Египетәс хәрҗ ирлһн
19-20Херодыг үкснә хөөн Бурхна элч Египетд бәәсн Йосипин зүүднднь үзгдәд:
– Бос, Нилхиг эктәһинь авад, Израилин һазрур йов, юңгад гихлә, Нилхин әмнднь күрхәр седцхәснь үкҗ одцхав, – гив.
21Тер босад, Нилхиг эктәһинь авад, Израилин һазрт ирв. 22-23Йудьяд Херодын хөөн Архела гидг көвүнь хаана ширәд суусинь соңсчкад, Йосип тиигәрән одхдан әәв. Тер зүүдндән ил зәңг авад, Һалильян һазрт ирәд, Назарет гидг хотнд бәәршлв. Тиигәд «Назаретин күн гиҗ Тер нерәдгдх», гисн әәлдәчәр дамҗулҗ келсн тоот күцтхә гиҗ, цуг эн учрв.
Attualmente Selezionati:
Матай 2: ХКО_ӘБ
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Институт перевода Библии, 2002-2023