Матай 3
3
Уснд кирсллһн
1-2Тер өдрмүдт уснд кирслдг Йохан ирәд, Йудьян көдәд Бурхна ном тархаҗ иигҗ келв:
– Теңгрин йосн өөрдв, тер учрар килнцтә җирһлән үлдәтн.
3Әәлдәч Эшья Йохана тускар кезәнә иигҗ келсмн: «Деед Эзнд хаалһинь белдтн, Терүнә җиминь ястн, – гиҗ хәәкрсн дун эҗго көдәд соңсгдв». 4Йохан бийнь болхла, темәнә ноосар гүрсн хувцта, хувцн деерән арсн бүстә бәәҗ, терүнә иддг хотнь царцахас болн зерлг зөгин бал бәәҗ. 5Тиигхд Ерусалимас, Йудьяс болн Йордана эргндк һазрас олн әмтн терүн тал ирсмн. 6Тедн эврәннь килнцән медүлҗ келәд, Йордана уснд Йоханар бийән кирслдг бәәҗ.
7Бийән уснд кирслхәр ирсн паршмудыг болн цадукмудыг үзчкәд, Йохан теднд иигҗ келв:
– Хойр көлтә моһас! Бурхна иргч цухлас зулҗ чадхит гиҗ кен таднд келв. 8Эврәннь җирһл-бәәдләрн килнцтә җирһлән үлдәсән үзүлтн! 9«Эцкимдн Абрахам», – гиһәд Бурхна цааҗас зулҗ чадхвидн гиҗ бичә сантн, юңгад гихлә, Бурхн эн чолудас чигн Абрахамд үрдүд төрүлҗ чадх гиҗ би таднд келҗәнәв. 10Модыг уңг күртл чавчх сүк белн бәәнә. Сән темс өгдго модыг Тер чавчад һалд хайна. 11Тадниг килнцтә җирһлән үлдәсиг үзүлхин төлә Би тадниг уснд кирслҗәнәв. Зуг мини ардас Ирҗ йовхнь нанас күчтә, Тер таднд Әрүн Сәкүс өгәд, тадниг һалд орулх. Би Терүнә буршмгднь һар күрх зөв угав. 12Тер буудяһан севглхәр күрзән авчксн белн. Тегәд эврәннь буудяһан хашадан хураҗ тәвәд, өвсинь болхла, унтрдго һалд хаяд шатах.
Исусиг уснд кирсллһн
13Тер цагт Һалильяс Исус Йордан һолын уснд бийән кирслхәр Йохан тал ирсмн. 14Йохан болхла Терүг зогсаҗ келв:
– Би Танар уснд кирслгдх зөвтәв, юңгад Та Нан тал ирсмт?
15– Тиим болтха, юңгад гихлә, бидн тиигҗ Бурхна неквриг күцәх зөвтәвидн, – гиҗ Исус хәрүднь келв.
Тиигхлә Йохан зөвән өгв. 16Исус уснд кирслгдәд һарв. Тер дарунь теңгр зааград, Бурхна Сәкүсн көглҗрһн мет Терүн деер бууҗ ирсинь Йохан үзв.
17– Энтн Мини Хәәртә Көвүн, Тер Намаг байрлулна! – гисн дун теңгрәс соңсгдв.
Attualmente Selezionati:
Матай 3: ХКО_ӘБ
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Институт перевода Библии, 2002-2023