GENESIS 4
4
Kain leh Abel
1Churawhchun, Adam chu a nupi hen nu leh pa anna theih le, pum lâwng lo hen a hawng um rawh. Fapa a ring le, “LALPA ṭangpi hen fapa ka nei rawh,” a ti. A min ah Kain ti hen a sak. 2A nehnûn ah fapa dang Abel a ring nawlh. Abel chu dawrâ vêngtu asi le, Kain lam chu phâisen tuahtu asi.
3Hun zeimaw zat nûnah Kain nih chun LALPA rangah a phâisen ah mi thlâi zeimaw zat a pêk. 4Abel nih chun a dawrâ rual lakah a suak masa chem mi a lâk le, a thah le, a mehtît a ṭha chem mi LALPA rangah a pêk. Abel leh a thilpêk nih chun LALPA a lawmhtir. 5Kain leh a thilpêk lam chu a lawmh lo. Kain chu thungâi a thinthawk le, a râng. 6Chun, LALPA nih Kain sinah, “Zei rangah na thin a thawk? Zei rangah kha nih thinthawk mêl an puttir? 7Thil dik ti le chu na nihsuak ding mi; khawmsele thilsual na ti ruangah sualnâk nih na inkhâr bul ah an bawh ko. Chu sualnâk nih chun na tlûnah thuneih a duh le, chu chu na neh ding asi,” a ti.
8Kain nih a unaupa Abel sinah, “Phâisen ah kan kal lai,” a ti. Phâisen leiah an kal rawh chun a naupa leiah Kain chu â her le, a thah rawh.
9LALPA nih Kain rangah, “Na unaupa Abel zeiah a um?” ti hen a deih.
“Ka theih loh, ka unaupa zauhkhenhtu ma kasi?” ti hen a sâng.
10Churawhchun, LALPA nih a sinah, “Zei rangah hi thil ṭihnungkâi hi na ti? Na unaupa thisen nih tual thawk hen aw-hâu bang hen phû lam ding hen hawng ka auh. 11Siatbarh na si rawh le, tual na nâwn kho lai lo rawh. Na thah liauah tual nih a kâ âng hen a bawh mi hâwi hen na unaupa thisen nih a chinh. 12Tual ah thlâi chîng ding tum khawm le, tual nih zeikhawm a nan suah piak lai loh. Tual ah umnâk nei lo hen mi rawkrawl na si lai,” a ti.
13Churawhchun, Kain nih LALPA sinah, “Hi rêpnâk hi tuar ding hen ka rangah a fâk tuktarâi. 14Hi ram leh na mâika mi hi na hawng ka nar ving chun tual ah hin in nei lo hen mi rawkrawl ka hawng si lai le, an hawng ka muhtu zawng nih an hawng ka thah lai,” a ti.
15LALPA nih a sâng le, “Thah lai le a! Âutal nih a nan thah chun a leh sarih hen phû lam asi lai,” a ti. Churawhchun, LALPA nih a muhtu zawng nih thah lo ding hen Kain a singsiah rawh. 16Chun Kain chu LALPA mâika ah mi chu a kal le, “Vâinâk” ram an ti mi mun ah a um rawh, chu chu Eden saklei asi.
Kain Thlâk Tla
17Kain leh a nupi nih fa an nei le, a min ah Enok an sak. Chun, Kain nih khuapi a siam le, a fapa ti san hen min a phuah. 18Enok nih fapa Irad a nei, Irad nih fapa Mehujael a nei, chun Mehujael nih fapa Methusael a nei; Methusael nih fapa Lamek a nei.
19Lamek nih nupi panih a nei le, Adah leh Zillah an si. 20Adah nih Jabal a ring, anih chu puanin ah umtu leh ran vulhtu tla thlâktu asi. 21A unaupa min chu Jubal asi le, anih chu tumphung leikâng ṭingṭang leh theikhang tumtu thlâktu asi. 22Zillah nih Tubal Kain a ring le, anih chu dâr leh thîr ruakhâu chi kip siamtu tla thlâktu asi. Tubal Kain farnu chu Naamah asi.
23Lamek nih a nupi tla sinah,
“Adah leh Zillah, ka thusim ngâi u;
tlangvâl pakhat nih hawng ka vuak le, ka thah.
24Kain thah ruangah lehrûl a lehsarih hen sam asi chun
kei hawng ka thahtu chu
a leh vei sâwmsarih pasarih hen sam asi lai,” a ti
Seth leh Enos
25Adam leh a nupi nih fapa dang an nei. Evi nih, “Kain nih a thah mi Abel ruangrûl ah Pathian nih fapa hawng ka pêk,” a ti. Churawhchun, a min ah Seth#4.25 SETH: Hebrai ah hi min umzia chu ‘pêk’ tinâk asi. ti hen a sak. 26Seth nih fapa a nei le, a min ah Enos a sak. Chu thawk chun mi tla nih sawnhnâk ah LALPA min thenhlimh lam anna dawmh rawh.
Attualmente Selezionati:
GENESIS 4: BCLBV
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bawm Common Language Bible © Bangladesh Bible Society, 2004. All rights reserved.