མད་ཐཱའི་འཕྲིན་བཟང་གི་ངོ་སྤྲོད་མདོར་བསྡུས།
ཁ་བྱང་དང་ལོ་རྒྱུས་རྒྱབ་ལྗོངས།
མད་ཐཱའི་འཕྲིན་བཟང་ཞེས་པའི་མིང་འདི་འཕྲིན་བཟང་གཞན་དག་ལས་ལོགས་སུ་བཀར་ནས་བཏགས་ཤིང་། སྤྱིར་དམ་པའི་གསུང་རབ་ལ་འཕྲིན་བཟང་གཅིག་མ་གཏོགས་མེད་ནའང་། དེའི་བྱུང་རིམ་ལ་རྣམ་པ་བཞི་ཡོད། དེ་བས་བདག་ཅག་ལ་མད་ཐཱས་ཡི་གེར་བཀོད་པའི་དཀོན་མཆོག་གི་འཕྲིན་བཟང་བྱུང་བ་ཡིན། མད་ཐཱ་ཞེས་བྱ་བ་ནི་གཙོ་བོ་ཡ་ཝཱེའི་གནང་སྦྱིན་ཞེས་པའི་དོན་ལ་འཇུག
ཡི་གེར་འགོད་མཁན་དང་འགོད༌དུས།
དམ་པའི་གསུང་རབ་ཀྱི་འཕྲིན་བཟང་བཞི་པོ་ཡི་གེར་འགོད་མཁན་གཞུང་དངོས་སུ་བརྗོད་མེད་ནའང་། སྔ་རབས་ཆོས་ཚོགས་ཀྱི་ཕ་ཡབ་རྣམས་ཀྱིས་འཕྲིན་བཟང་འདི་ཡི་གེར་འགོད་མཁན་ནི་མིང་གཞན་ལ་ལེ་ཝི་ཞེས་འབོད་པའི་མད་ཐཱ་ཡིན་པར་བཞེད་ཅིང་། ཁོང་ནི་ཁྲལ་བསྡུ་མཁན་ཞིག་ཡིན་ལ། སྤྱི་ལོ་70ལོར་ཡེ་རུ་སཱ་ལེམ་ལ་གཏོར་བཤིག་ཐེབས་པ་དང་། འཕྲིན་བཟང་འདི་དུས་དེའི་སྔོན་དུ་བཀོད་པ་ཡིན།
བརྗོད་སྙིང་དང་གསུང༌འཕྲིན།
སྐབས་དེར་ཡ་ཧུ་དཱ་མི་རིགས་ཀྱིས་རང་གི་སྐྱབས་མགོན་ཕེབས་འོང་བར་སྒུག་ཅིང་། སྐྱབས་མགོན་དེ་ནི་མཱ་ཤི་ཀ་ཞེས་བྱ་བ་ཡིན། མད་ཐཱའི་དམིགས་ཡུལ་ནི་ཀློག་པ་པོ་ཡ་ཧུ་དཱ་པ་རྣམས་ལ་ཡེ་ཤུ་ནི་སྐྱབས་མགོན་མཱ་ཤི་ཀ་ཡིན་པར་བདེན་དཔང་བྱེད་པ་དེ་ཡིན། མད་ཐཱ་ཡིས་དུས་རྒྱུན་དུ་ཞལ་ཆད་རྙིང་པའི་ལུང་དྲངས་པར་མ་ཟད། ནམ་མཁའི་རྒྱལ་སྲིད་ཅེས་པ་མང་དུ་གླེང་ཡོད། མད་ཐཱའི་འཕྲིན་བཟང་ཡོངས་རྫོགས་བཀའ་མཆིད་ཆེན་པོ་ལྔ་ཡིས་གྲུབ་པ་སྟེ། ༼1༽ ལེའུ་ལྔ་པ་ནས་བདུན་པའི་བར། ༼2༽ ལེའུ་བཅུ་པ། ༼3༽ ལེའུ་བཅུ་གསུམ་པ། ༼4༽ ལེའུ་བཅོ་བརྒྱད་པ། ༼5༽ ལེའུ་ཉེར་བཞི་པ་ནས་ཉེར་ལྔ་ཡི་བར།
འཆར༌ཟིན།
1. སྐྱབས་མགོན་ཡེ་ཤུའི་གདུང་རྒྱུད་དང་ཁོང་སྐུ་འཁྲུངས་པའི་སྐོར། ༼1:1-2:23༽
2. སྐྱབས་མགོན་ཡེ་ཤུ་ལ་ཁྲུས་གསོལ་ཐོབ་པ་དང་ཉམས་ཚོད་བླངས་པ། ༼3:1-4:11༽
3. སྐྱབས་མགོན་ཡེ་ཤུས་ག་ལིལ་ཡུལ་ནས་ཆོས་བསྒྲགས༌པ། ༼4:12-14:12༽
4. སྐྱབས་མགོན་ཡེ་ཤུ་ག་ལིལ་ཡུལ་དང་ཁ་བྲལ་བའི༌དུས། ༼14:13-17:21༽
5. སྐྱབས་མགོན་ཡེ་ཤུས་ག་ལིལ་ཡུལ་ནས་མཐའ་མཇུག་གི་ཆོས་བསྒྲགས༌པ། ༼17:22-18:35༽
6. སྐྱབས་མགོན་ཡེ་ཤུས་ཡ་ཧུ་དཱ་ཡུལ་དང་ཡོར་དན་གཙང་པོའི་ཕར་ཕྱོགས་ནས་ཆོས་བསྒྲགས༌པ། ༼19:1-20:34༽
7. སྐྱབས་མགོན་ཡེ་ཤུ་ཁོང་ཉིད་ཡེ་རུ་སཱ་ལེམ་དུ་ཆོས་བསྒྲག་པར་ཕེབས་པ༌དང༌། མཐར་ཤིང་རྒྱ་གྲམ་གྱི་སྟེང་དུ་བརྡབས༌པ། ༼21:1-27:66༽
8. སྐྱབས་མགོན་ཡེ་ཤུ་སླར་གསོན༌པ། ༼28:1-20༽
