Kejadian Uram 2
2
1Er Imtamnyi biryi imtam ab, tukwetam ab utotoa nirya liliboka sirya kiknibmou. 2Ani, uki tabaryi tum sirya berekmou ura, Er Imtamnyi biryi a uki tum asi kisal dakoka loubmou. 3Ura, Er Imtamnyi biryi uki ta tum wiboka Er Iya Erebdobnyi uki tum kibdeibmou. Ara, uki tabaryi tum ara Er Imtamnyi biryi utotoa kiknibde banmou ani, loubmou tum berekmou.
4Er Iya Erebdobnyi biryi yuma kobdob imtam ab, tukwetam ab kiknibmou deyok lilina ara ukuboka sirya kiknibmou.
5Yuma a kiknibmou talak ara mo ton kum dobkwetebmou talak ab, ninyi aryi wa ton iboka kouna ton kum koubmai talak ab ara utotoa ton betekoka ana kum kubmou. 6Eda, tukwetam aryi ito anaboka nunubmou uca, mo doum-douma kiboka tukwe asi mo tubmou. 7Er Imtamnyi Iya Erebdobnyi biryi yuma ninyi kiknibmou ara tukwe aryi dobtaleboka kiknibmou. Ura, lulungkwamwe ati, u bisik asi isin ubdongobmou. Ato kuboka Er isin ubdongobmou deyok aryi ninyi ara kamyoa kunungci, lulungnung.
Mutuk Eden dam asi ninyi yala yumanyi kiknibmouci, kaibmou deyok
2:8-25
8Er Imtamnyi Iya Erebdobnyi biryi utotoa nirya sirya kiknibmou ura, yaletam kuboka asi mutuk si Eden kiknibmou. Ura, a mutuk dam asi ninyi yuma kiknibmounyi kaibmou. 9Ura, Er Imtamnyi Iya Erebdobnyi biryi tukwetam co yala nirya amuma-amuma, du yina kum co babyi, ninyi kanyi nunungni co babyi betekoka abdeibmou. Ani, a mutuk dam asi kam iya kun co betekeibmou. Uca, ton co bitinyi dinyi ara du yina mem co betekeibmou. Ara, malyi dinyi ab, teleb dinyi ab liliboka bingna co koubdeibmou.
10Ani, a mutuk Eden dam sul kiboka lukluk enkwamwe ati, me tentok u doboka anabdeibmou. A me ara te kwalekoka dumbaryi kibmou. 11A me te kwalekmou ara yuma te kwalekmou me te si ara Pison. Ba, a me te aryi Hawila mutuk asi utotoa sul kiboka lukluk enkwamwe ati te kwalekoka binmou. 12A mutuk ara iya teleb dengna weik keil emas kuramwe. Ani, tonda tong teleb eboka tuktuka kurande co si ara damar bedolah ab, dengna weik keil si krisopras ab kuramwe. 13Ba, bitinyi dinyi me te kwalekmou me si ara Gihon. Ba, a me Gihon ara Kush mutuk nirya sul dokoka lukluk enkwamwe ati, Kush mutuk dam te kwalekoka binmou. 14Ba, winiryi dinyi me te kwalekoka binmou me si ara Tigris. A me Tigris te kwalekoka binmou ara yaletam kuboka mutuk si Asyur dam binmou. Ba, dumbaryi dinyi me te kwalekmou me si ara Efrat te kwalekoka binmou.
15Ura, Er Imtamnyi Iya Erebdobnyi biryi ninyi yumanyi bisi a mutuk Eden dam il doboka kalikde kunkwamwe ati, a mutuk dam kabdeibmou. 16Ura, a ninyi yumanyi bisi ato ebmou, “A mutuk dam kunmar co nirya du moubci ura, ur dakoka yironkwandum. 17Bok, malyi dinyi ab teleb dinyi ab bingni co du ara dakoka yina mem. A co du asi dakoka yibmaminyi ura, iya dibkwandim,” ebmou.
18Ura, Er Imtamnyi Iya Erebdobnyi biryi ato ebmou, “Sal er tentok kuna ara kikiman kum kubcei ati, er ab tonkwa kuronkwandingnyi ton kiknibkwan,” tenebmou. 19Ura, Er Iya Erebdobnyi biryi tukwe dobtaleboka kamyoa tukwetam kurande dinyi nirya ab, maka im dub langlang eryibarande dinyi nirya ab, yuk-yuk dinyi nirya kiknibmou. Sirya kiknibmou ura, Er Iya Erebdobnyi biryi yumanyi bisi boyandoka karebmou. Ba, yumanyi biryi dibdeboka anda kamyoa nirya, “A keica-a keica,” teneboka si dobmou. 20Ura, yumanyi biryi tukwetam kurande dinyi babyi, imtam kurande dinyi babyi nirya si dobmou. Uca, anda yuk-yuk dinyi kiknibmou keica nirya ara yumanyi ab, er uruna tonkwa kubmanto dinyi ton kikiman kum kubmou. 21Ura, Er Iya Erebdobnyi biryi ninyi yumanyi bisi wi nunu ebdeibmou ba, wi mablukmou. Ba, ninyi yumanyi wi mablukmou talak ara Er Imtamnyi Iya Erebdobnyi biryi yumanyi er yacok yok tentok dobdobmou ura, a olong ara tub aryi unubdongobmou. 22Ura, Er Imtam Erebdobnyi biryi sal yacok yok doboka ner kiknibmou. Ura, a ner boboka Adam dam boyanmou. 23Boyandoka karebmou ba, ninyi yumanyi si Adam biryi ato ebmou, “Yo, a dinyi ara ni yacok yok ab, ni tub ab aryi a kiknibmar ati, er si ara, ‘Ner,’ eboka si dobne,” ebmou. 24Ato kuboka kiknibmou deyok aryi sal yala nirya ara er nai ab, er kwin ab takloboka, sun dobingnyi ner asi kanyi deibdandoka, nong tentok ato kubkwanding. 25A talak ara ninyi yumanyi ab, er ner ab ara nong baning kunmarei bok, sun alyi dinyi ton bingdana kum kubmarei.
Attualmente Selezionati:
Kejadian Uram 2: MTG
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
@LAI 2007 (New Testament), @LAI2022 (Old and New Testament)