Henplais 13
13
Yuav Uacas Thiaj Haum Vajtswv Siab
1Ib leeg yuavtsum hlub ib leeg ib yam li kwvtij sibhlub. 2Ncontsoov hu tej qhua los so hauv nej tej tsev. Muaj qeeleej uas ua li ntawd, lawv tostxais tau cov timtswv ceebtsheej los lawv twb tsis paub. #Chiv 18:1-8; 19:1-3 3Ncontsoov cov uas raug kaw hauv tsev lojcuj, yam nkaus li nej twb nrog lawv raug kaw lawm thiab. Ncontsoov cov uas raug kev tsimtxom, ib yam li nej nrog lawv raug thiab.
4Cia txoj kev sibyuav ua ib yam uas sawvdaws saib taus, thiab ceev lub txaj pw kom dawbhuv. Vajtswv yuav rautxim rau cov uas ua kev nkauj kev nraug, thiab rau cov neeg uas deev luag pojniam luag txiv.
5Yuavtsum ceev nej lub neej kom dim ntawm txoj kev ntshaw nyiajtxiag, ciali txaussiab rau yam uas nej muaj, rauqhov Vajtswv hais tias, “Kuv yuav tsis tso koj; Kuv yuav tsis muab koj povtseg ib zaug li.” #2Kev 31:6, 8; Yaus 1:5 6Yogli ntawd, peb tsis txhob ntshai, peb ciali hais tias,
“Tus Tswv yog tus uas pab kuv,
kuv yuav tsis ntshai.
Leejtwg yuav ua licas tau rau kuv?” #Nnkauj 118:6
7Nej yuavtsum ncontsoov txog cov thawjcoj uas yav tas los lawv tau qhia Vajtswv Txojlus rau nej lawm. Ua tibzoo xav seb lawv ua lawv lub neej mus txog thaum xaus yog zoo licas, nej yuavtsum xyaum coj li lawv txoj kev ntseeg. 8Yexus Khetos yeej zooli qub, tsis hais naghmo, hnubno, thiab mus tag ibtxhis. 9Tsis txhob cia tej kev qhia uas txawv-txawv ntxias tau nej yuamkev. Yeej yog ib qhov zoo uas Vajtswv txhawb nej lub siab los ntawm Nws txoj hmoovhlub, tsis yog los ntawm tej kevcai nojhaus, vim tej kevcai ntawd yeej tsis muaj nujnqis dabtsi rau cov uas noj.
10Peb muaj ib lub thaj uas cov povthawj hlob uas ua haujlwm hauv lub tsevntaub ntawd tsis muaj cai noj tau tej khoom uas coj tuaj fij rau saum lub thaj ntawd. 11Cov Yudais tus tuam povthawj hlob nqa tej ntshav tsiaj mus theej txhoj hauv Chav Dawbhuv Kawg Nkaus, tiamsis nws muab cov tsiaj ntawd nqa mus hlawv sabnraud lub yeej. #Levi 16:27 12Twb yog vimli ntawd, Yexus thiaj raug kev txomnyem thiab tuag nyob rau sabnraud lub nroog, kom Nws thiaj ntxuav tau neeg tej kev txhaum los ntawm Nws cov ntshav. 13Yogli ntawd, peb ciali tawm mus cuag Nws sabnraud lub yeej thiab nrog Nws koom txoj kev txajmuag. 14Rauqhov hauv ntiajteb no yeej tsis muaj ib lub nroog rau peb nyob mus ibtxhis; peb tseem tabtom tos lub nroog uas yuav los tomntej no.
15Yogli ntawd, cia peb niajhnub qhuas Vajtswv los ntawm Yexus, uas yog qhov khoom fij los ntawm peb lub ncauj uas lees hais tias Nws yog tus Tswv. 16Yuavtsum ncontsoov ua qhov zoo thiab ib leeg pab ib leeg, rauqhov Vajtswv txaussiab heev rau tej khoom fij uas zooli ntawd.
17Nej yuavtsum mloog nej cov thawjcoj lus thiab ua rawsli lawv hais. Lawv tsis tau so li vim lawv txhawjxeeb txog nej, rauqhov lawv yuavtsum tau qhia lawv tej haujlwm rau Vajtswv. Yog nej mloog lawv lus, lawv yuav kajsiab lug ua haujlwm; yog tsis li ntawd, lawv yuav ua haujlwm nrog kev nyuajsiab, qhov ntawd yuav pab tsis tau nej kiag li.
18Nej yuavtsum niajhnub thov Vajtswv pab peb. Peb ruajsiab hais tias peb tej kev xav yeej meej kawg li lawm, rauqhov peb yeej ntshaw ua qhov zoo tas mus li xwb. 19Kuv thov nej kubsiab lug thov Vajtswv kom Nws yuav txib kuv rov tuaj saib nej sai-sai.
Thov Vajtswv Xaus
20-21Vajtswv twb tsa peb tus Tswv Yexus sawv hauv qhovtuag rovqab los lawm; Yexus yog tus Tswv Yug Yaj uas zoo kawg nkaus vim Nws cov ntshav#13:20-21: Nws cov ntshav; lossis Nws txoj kev tuag. yog lub cim nias rau Vajtswv tej lus cogtseg uas yuav nyob mus ibtxhis. Thov Vajtswv tus uas muaj txoj kev thajyeeb pub txhua yam zoo rau nej kom nej ua tau rawsli Vajtswv lub siab nyiam. Thiab thov Vajtswv ua haujlwm los ntawm Yexus Khetos rau hauv peb rawsli Nws lub siab nyiam. Thov kom Khetos tau ntsejmuag mus ibtxhis li! Amees.
Cov Lus Xaus
22Cov kwvtij, kuv thov kom nej ua siabntev mloog tej lus uas kuv sau tuaj ntuas nej no, rauqhov kuv tsuas sau luv-luv tuaj rau nej xwb. 23Kuv xav qhia rau nej paub tias peb tus kwv Timautes twb raug tso tawm hauv tsev lojcuj los lawm. Yog nws los txog sai, kuv yuav coj nws nrog kuv tuaj saib nej.
24Thov nej hais nojqab nyobzoo rau nej cov thawjcoj thiab cov ntseeg Vajtswv txhua tus. Cov ntseeg uas nyob hauv Italis xa kev nojqab nyobzoo tuaj rau nej thiab.
25Thov kom Vajtswv txoj hmoovhlub nrog nej sawvdaws nyob.
Attualmente Selezionati:
Henplais 13: MWW2022
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022 United Bible Societies. All rights reserved.