NDUMBA 6
6
Gaɗta kay sa ma min a li tam ki teteɗna
1Yawe di Moiz ana, 2«Aŋ ɓak suu Israelna dasi ana, lini sa njufna ɗowba cara yi va kam wa a li tam ki teteɗe, min a ɦal tam ki maŋ Yawe, ko Nazir na, 3sa namma mba doo tamu, ci suumaɗi, ci tlesuu yanaɗi lay, ci sum veŋŋaɗi, ka ti vuɗ gugutlu ma ŋgolommaɗi, ti ma sooynaɗi lay.#Luk 1.15 4Hu buu ma nam ŋgaam a li tam ki teteɗna halaŋŋi, nam ka ti va ma asi lam u vuɗ gugutluna dukŋaɗi, lini u irim ɗowba u ɓolokom lay ka tiɗi. 5Hu buu ma nam ŋgaam a li tam ki teteɗna ni ka tin vel kay yambi lay, ta ta daɓ buu ma nam ɦal tam ki maŋ Yawena ki tuwa. Nam ki ni teteɗ, nam ndak hin tlimiɗ yam ɗuf ko ndaɗ minda na.
6«Hu buu ma nam ɦal tam ki maŋ Yawena halaŋŋi, nam ka tin tam eg sa ma miɗiɗi. 7Lini maɗ bum ɗowba sum lay, maɗ wayamma u wayamba lay, nam ka tuɗ ha eg maɗasi a mbuɗ tam ki njenjeɗi, kay nam ɦal tam ki ni maŋ Loomma. 8Hu buu ma nam ɦal tam ki maŋ Lonana, nam ki ni teteɗ maŋ Yawe.
9«Lini sa ma egem tok miɗ wa ni nam mbuɗ ki ni njenjee, nam mba kaa yam kiyo, ta ta buuna kiɗisiya nam hin mbuɗ ki balamam teteɗ ni tuwa. 10Hu buu ma kalavandina ni nam mbaa gugukka ay mba' maŋ fun Mbutluɓ ma Tokka, lini guk gaɓiina ɗowba guk palatta. 11Mul ma li ɓivunna ŋgaɗ dew a li ɓivun ma bulum cora kina, ta hiniŋga a li ɓivun ma ŋgalam kina may. Sa Nazirna li ɓivun ma mbus cora kina, kayra nam ŋgen tam ay eg sa ma miɗinara. Hu buu namma gaw ni, sa namma mbuɗ tam ki teteɗ. 12Buu namma nam hoŋ ɦal tam maŋ Yawe ni wili gadla olo, kay buu ma nam ŋgaam namma, nam ɦal go timii ma basaɗam dewna ay a li ɓivun ma min duk ɦoŋga. Buu ma jak ki jewna nam ka ndumum oloɗi kay ana ɦalla nam ɦal tam ndaɗta mbuɗ ay ki ni njenjee.»
13Gola ni gaɗta kay sa Nazirna, hu li ma nam daɓ buu mam ma nam ŋgaamma kina. Asi mbaaram ay fun Mbutluɓ ma Tokka.#Sun. 21.23-24 14Nam yow tlesuu nam a ɦasi maŋ Yawena ay um may, vi timii ma ŋgul ka egembi ma basaɗam dewna ay a li ɓivun ma ŋgalam kina, vi timii tamara basaɗaɗ dew ta ŋgul ka egeɗɗira a li ɓivun ma bulum cora kina, vi gamla ma bay ŋgulla egemma a li ɓivun ma heɓpa may. 15Tli goo kaalamba u komnjoɗi ma bay kuffa dukumma u vaŋgasa ma gam u mbulnana, u ɦalla ɦawara zeɗ zeɗta, ni tlesuu mbulna kasina halaŋ. 16Mul ma li ɓivunna mbaarasi fok Yawe, nam li ɓivun ma bulum cora kina u ɓivun ma ŋgalam kina. 17Gamla timiina nam ɦam maŋ Yawe a li ɓivun ma heɓpa u komnjoɗi ma hu goo kaalambana may u sum veŋŋa may. 18Sa ma ɦal tam maŋ Bu Suuna namma kaa yam ki fun Mbbutluɓ ma tokka, nam yow tlimiɗ yam ndaɗta cukuɗ duk kura hu givin ma togolla, kura ka vi kolo u ɓivun ma heɓpara. 19Mul ma li ɓivunna tli bik timii ma zali ma li ɓivun ma heɓpa dew, tli komnjoɗi dew, tli vaŋgasa ma zali u mbulnana dew may, ɦasi hu duk ko sa ma li tam ki teteɗna, ŋgoo dagan hu li ma nam kaa yam ay kina. 20Mul ma li ɓivunna tuɗ tle asina fok Yawe u tamba u geŋeɗta geŋeɗ tam fok Yawera. Ni tlesuu ki teteɗna hin ki ni maŋ mul ma li ɓivunna, ŋgoo dagan nam hin tli dikŋa u gayna takasi na olo, Ŋgoo tle asina ni sa ma ɦal tam ki namma mba ci sum veŋŋa ki may. 21Gola ni gaɗta kay sa ma yi va ki kamu ɦal tam ki maŋ Lonana, nam mba ɦal tlena ay maŋ Yawe ni ko wandara na. Tlesuu nam a ɦasi dagan u min mamba ko nam suu tamba nana ka ndumi dukgi. Nam mba li dlara suu ɦal tasi maŋ Lona laɗta ki halaŋ u vi vun ma nam vamma.
Yal paɗvunna vi muli suu li ɓivunna
22Yawe di Moiz ana, 23«Tuɗ di gi Aaron u goryomu dasi ana, Gola agi hin paɗ vunugi ki kay suu Israelna ni ko ndal wanda na.
24Ko Yawe paɗ vunum ki kagiya,
ko nam gologiya.
25Ko Yawe gologi u jivira,
ko nam vagi u oo mamba.
26Ko Yawe takagi jivi mamba,
ko nam ɦagi heɓpa.
27Hu li ma mul ma li ɓivunna yan sen wa na kay suu Israelna ni, an u tanda hin paɗ vunun ki kasiya.»
Attualmente Selezionati:
NDUMBA 6: BMS
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible Moussey © Bible Society of Chad, 2002.