DLAŊ LEVIRA 24
24
Gaɗta kay pindilla tiniɗ hu Mbutluɓ ma Tokkara
1Yawe di Moiz ana, 2«Di suu Israelna asi taaraŋ mbul cono ma yoori wili ma jivina aya, kay a li kiɗikka ni ana pindil taa dew li tini njeŋge tew tew hu Mbutluɓ ma Tokka na gak gak, 3Fok gojoli ma cak ii lina ki kurufuna, hu Mbutluɓ ma Tokka. Aaron tin ku ndaɗta ni jivi kay ndaɗ ŋgal ha fiɗigi gak gak fo lina fok Yawe, ha ni na dindin. Gaɗ ndaɗta ha kagi ni na gak gak basara u basara. 4Ha kay va ma tin pindilla ni, nam tin pindilla bolowra ta ŋgal ha fok Yawe na gak gakka ha may.
Fu ma ɦam maŋ Lonna
5«Aŋ yow fuɗta gi komnjoɗiina doogo yam mba'. Komnjoɗiina dew ni yow fuɗta kelew karkiya.#Kal. 25.30 6Aŋ njaaram kay tabulla mini u lorra, cukum zaaram mba' karkiya karkiya fok Yawe. 7Aŋ tol mbul ma his jivina kay komnjoɗiina dew dew bel u mbul namma hin ŋgalam hu li ma ŋgal mbul ma his jivina a gi humba ni nam tok. 8Hu buu ma vi Lonna halaŋŋi njaa komnjoɗii namma fok Yawe ha ni na gak gak, suu Israelna ɦam ay ni asiya. Ni galam mayra dindinda. 9Komnjoɗii namma hin ki ni maŋ gi Aaron u goryomu, asi tammi hu li ma teteɗna, kay ni va ma teteɗ ma asi tlam ay ki hu li ma ŋgal ɓivun ma teteɗna maŋ Yawena. Dla ndaɗta hin ha ni na gak gak.»#Mat. 12.4; Mark 2.26; Luk 6.4
Daŋgayna kay sa ma ŋgel gaɗtana
10«Goo ma vi goora Israella bummi sa ma Egiptena mba ki zina duk suu Israelna, buu maa dew ni honira ndi duk tasi u sa ma Israelna. 11Nam ma goŋ goora Israellana ŋgul sem Lona, asi vam ay mbaaram maŋ Moiz, sem sum ana Selomit. Ndaɗ ni goŋ Dibrira hu njaf suu vi Danna. 12Asi gam daŋgayna golom jivi coco a juɓmi boy ma Yawe hin damma ay kam u tambana.»
13Yawe hin di Moiz ana, 14«Kal sa ma ŋgul namma ha ki doŋ kaana, suu may suu humum vunum nam ŋgulna halaŋ tin kosi kamu, suu tokkina halaŋ gikim u gogoyra.
15«Aŋ hin ɓak suu Israelna ana, lini sana ŋgul Loommawa ni nam hin zii nek coom ndaɗta ni u tamba. 16Ko ndaɗta na sa ma pan sem Yawena cam ki ciiya. Suu tokina halaŋ gikim ki u gogoyra, lini sa namma ni sa ma Israelna ɗowba ni ŋgay ma cuki dukusi lay. Ni asi cam kiyo kay nam pan sem Lona.
17«Lini sana ci ndaram sa warna ki wa ni, asi cam tamba ki may.#Kal. 21.12 18Sa ma ci yoo ma vi ndaramma kina ni warakam ma iirina balam mamma.
19«Lini sana dak ndaramma wa ni, asi dakam ki ko nam dak ndarammara na may. 20Kussa ni kusum ki may, co iira ni coom irim ki may. Siina ni toom siim ki may. Li ma sana dak ndaramma huna ni tinim dak ndaɗta egemmi na may.#Kal. 21.23-25; Gaɗ. 19.21; Mat. 5.38
21«Sa ma ci yoona kina warakam ki maŋ malamma. Sa ma ci sa warna kina cam ki may. 22Agi lagi ni u gaɗta dewra kay sa ma Israelna ni na lay, kay sa ma cuki dukugi ŋgaynana ni ko ndaɗta na lay. Kay an Yawe, anni Loogina.»#Ndu. 15.16
23Moiz ɓak suu Israelna ni ko ndaɗta na. Asi hin kal sa ma ŋgul Lonna ha ki doŋ kaana, gikim ki u gogoyra. Ŋgoo dagan suu Israelna li u dlara Yawe daɗ ay maŋ Moizza.
Attualmente Selezionati:
DLAŊ LEVIRA 24: BMS
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible Moussey © Bible Society of Chad, 2002.