URA TIN AYRA 3
3
Lona dik sana ki u caamba hu sene Edenna
1Tlesuu iiri suu Yawe Lona lasina halaŋŋi guyna susi u mbeleŋŋa, nam joɓ cara ana, «Na ni, Lona doorogi ki gasi ana agi ti vuɗ gu ma hu senena canaɗi su?»#Wira 12.9; 20.2 2Cara hoŋ di guyna ana, «Vuɗ guguni suu hu senena ni ami tasiya. 3Na may vuɗ gu ma coli hu senena duk gayrana Lona di ana, Agi tambi lay, ŋgenembi lay, kay ana agi mba miɗɗi.» 4Guyna hoŋ dira ana, «Ni ka gasiɗi, agi ka miɗɗi. 5Lona wi ana falira agi tam wa ni irigi hin mal kiyo, agi hin mbuɗ ki ko namma, wi jivira u cora.»
6Cara wi ana vuɗ gu namma jivi a tira, gol jivi lay, a ndaɗ mbuɗ wi dlara coco lay. Ndaɗ ndoɗom vuɗum ndoɗni tamu, ɦal maŋ njufuɗu, nam ka egeɗu, nam ti may. 7Na zak gawni irisi mal kiyo, asi u dlasira jakka mbuɗ wi tasi ki ana asi ki siiliya. Asi duɓ hum tulumma njunum egesi ko barawna na.
8Faɗta heɓ heɓmi, semeɗna gijaŋ siira ɗaŋ, sana u caamba hum ana Yawe Lona mba gol senena, ni namu ni asi ŋgay tasi ki duk hum gugunina. 9Yawe Lona yi sana joɓom ana, «Aŋŋi arage?» 10Sana hoŋ dira ana, «An humuŋ deleŋ ay hu senena na ni, an li ndaana, an ŋgay tan kiyo, kay an ki siiliya.» 11Yawe Lona joɓom ana, «Sa ma daŋ ana taŋ li ki siiliyana ni gege? Aŋ ti vuɗ gu ma an daŋ ana tambinawa su?» 12Sana hoŋom dira ana, «Cara aŋ ɦanda a njun unda ɦan vuɗ guna, an tamu.» 13Yawe Lona joɓ cara ana, «Ndak li na ni amege?» Cara hoŋ dam ana, «Guyna ganan yanni namu, an ti vuɗ guna ni na.»#2 Kor. 11.3; 1 Tim. 2.14
14Na ɗaŋŋi nam Yawe Lona di guyna anaba, «Aŋ li na ni an gaŋ vunna duk tlesuu tuɗ u sesina u suu ɦaram kaŋgaa, aŋ ɦaram u vun dikiŋu. Aŋ ti ni gugum ndaŋgara ta ta daɓpa vi iiri maŋga. 15An hin tin gonokka dukugi u cara, duk ɦoŋ suu hu njaf carana u maŋsina may. Njaf cara hin tooŋ yaŋ kiyo, aŋ hin eɗem diŋ diŋilim may.»#Wira 12.17
16Yawe Lona di cara ana, «Ndak hin vi wiina wani wi hawra cocoo, ndak hin vuɗ goryokŋi u lassa. Saa makka halaŋ tokŋi kay njufuku, nam hin lini a ŋgol makka.»
17Nam di sana ana, «Aŋ vi vun caaŋga, hin ti vuɗ gu ma an daŋ ana tambina. Kay cooŋ ndaɗta, an gi vunna maŋ ndaŋgara wa, aŋ hin fi tiiŋŋa duk ndaŋgara hu iiri maŋga halaŋŋi u zamalla.#Heb. 6.8 18Tlesuu siina hin day ki fokoŋ kay ndaŋgara. Aŋ hin tini tlesuu day hu senena. 19Aŋ hin fi tiiŋŋa ni u zamalla vogoŋu, gak gak aŋ hin hoŋ duk ndaŋgara aŋ mbay ki hura. Gasi aŋŋi ndaŋgara, aŋ hin hoŋ duk ndaŋgara aŋ mbay ki hura.»
20Adam tin sem caamba ana Eve, ni ana iirira. Kay ndaɗ ni su suu warna halaŋ. 21Yawe Lona ɦal baraw bakka maŋ sana u caamba a asi baa tasira. 22Yawe Lona di ana, «Sana mbuɗ ki cemi ko aygi na may, wi jivira u cora lay. Dooroygina, hinim a tin kom eg guna vi iirira a kak iri dindindaɗi.»#Wira 22.14
23Yawe Lona dik sana ay ki hu sene ma Edenna, kay nam horok yam ndaŋgara nam col ay dukuɗta. 24Nam dik sana ay ki dikŋi hin cuk Serubimma hu sene Edenna a golomba, u ŋgewina kosi weleɗ ko kura, ko lona weleɗta na, kay a gol voɗ guna vi iirira.
Attualmente Selezionati:
URA TIN AYRA 3: BMS
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible Moussey © Bible Society of Chad, 2002.