I Versetti Biblici più popolari da Mateyo 24

Condividi

Pamulandu wakufula kwabubi, echo nokutemwana kwabantu abenji kwakuchepelelako. Nomba uwakushipikisha ukufikila kumupwilo, ewakupuluka.

Elo Ubutumi Bwawama ubwa Bufumu bwakubala bubilwe muchalo chonse pakuti abantu bamitundu yonse bakomfwe, epo nempelo yachalo yakwisa.

Mwakumfwa inkondo nomukunkunto wankondo, nomba mwilokusakamikwapo iyowo. Mfi fintu fyakwisa kuchitika, kuntu ukushila kwachalo takulayisapo.

Ifyalo fyakulwa nefyalo ifinakwe. Ubufumu bwakulwisha ubufumu bunakwe. Kwakwisa kuba insala nefinkunkuma konse-konse. Mfi fyonse fyakuba ekutatika kwamachushi.

Umulu nechalo fyakupita, kuntu amashiwi anji akubelelela umuyayaya.

Pakuba abenji bakwishila mwishina lyanji nokusosa ati, ‘Nine Klistu,’ nokubepa bakubepa abantu abenji.

“Abantu bamitundu yonse bakumusula pamulandu wanji. Munshita nji abantu abenji bakusula ubuchetekelo bwabo. Bakwisa kwebushanya nokupatana. Kwakuboneka abasoseshi ababufi abenji, abakupulula abantu abenji.

Elo Yesu abasukile ati, “Chenjeleni ukuti umuntu nangu umo ekamubepapo.

Echo namwe mulokwipekenye pakuti panshita mutebukilepo epo Umwana wa Muntu akwishilapo.

Echo mulokulola pakuti tamwishibilepo ulo imfumu yenu yakwisa.

“Ulo nkalya kasuba kakufika, tapapo umuntu uwayishiba, nangu bangelo bakumulu nangu Mwana wa Muntu iyowo, sembi Bawishi benka.

Pakuti ba Klistu nabasoseshi ababufi bakwima nokuchita ifyafiso ifikulu nefyakushimbwisha ukwebati babepayike nabasalwa kumo nga chingachitika.

Nga mfilya chali panshita yakwa Nowa, efyo chakuba napakwisa kwa Mwana wa Muntu. Pakuti panshita njilya ichama tachilayisa, abantu balikulya nokunwa, balikuupwa nokuupa ukufikila ulo Nowa ayinjile mubwato. Abantu tabayilukilepo ukufikila ulo ichama chayishile nokubepaya bonse. Efyo chakuba napakwisa kwa Mwana wa Muntu.