MATTHEW 11
11
Baptisma Diya John Laga Khobor Diya Manuh
1Aru ketiya Jisu he barohjon chella ke hukum diya khotom hoise, tate pora Tar jaise aru taikhan laga sohor sob te prachar kori kene sikhai dise.
2Eitu homoi, ketiya John he bandhi-ghor pora Khrista kam laga khobor tu hunise, tar chella khan logote kotha loi kene pathaise 3aru Jisu ke hudise, “Ahhibole thaka ekjon tu apuni ase na, nahole aru dusera ekjon ke he rukhi thakibo?” 4Aru Jisu he tarkhan ke jawab dise, “Jabi aru ki tumikhan pora dekhise, aru hunise eitu John ke kobi: 5andha khan pora dekhi ase, aru lengera khan bhi khuj karhi ase, kuntho-rugi khan bhi safa hoi ase, aru kan benga khan bhi huni ase, aru mora khan bhi jinda uthai di ase, aru dukhiya manuh khan nimite susamachar anidise. 6Aru kon pora moi upor te beya napai eitu manuh ashish.”
7Tarkhan jua homoi te, Jisu pora manuh khan ke Baptisma diya John laga kotha kobole shuru hoise: “Ki sabo nimite tumikhan ulai kene jungol jaga te jaise? Hava pora hilai thaka paani gos nol sabole jaise neki? 8Tenehole ki sabole tumikhan jaise? Konuba norom kapoor pindhi thaka manuh neki? Sabi eneka norom kapoor pindhi thaka manuh khan tu raja laga ghor te he ase. 9Tenehole ki sabole tumikhan ulai jaise? Bhavobadi ekjon neki? Hoi, moi tumikhan ke koi ase, bhavobadi pora bhi besi dangor ekjon ase. 10Eitu tar he ase, kon laga eneka likhi ase,
“‘Sabi, tumar aage te moi nijor laga khobor bukha manuh pathai ase,
Kon pora tumar aage te raasta jugar kori dibo.’
11Moi tumikhan ke hosa kobo, tiruta khan pora jonom kora majot te Baptisma diya John nisna mahan kon bhi ula nai; kintu sorgo rajyo te tu hole sobse huru tu tar pora bhi mahan ase. 12Baptisma diya John laga din pora aji tak, sorgo rajyo karne dukh pora jobor josti kori kene lobole juji ase, aru jobor josti kora manuh khan laga tagot pora eitu loi ase. 13Kilemane John laga din tak te bhavobadi khan aru kanoon te bhavobani likhi thaka sob tu eitu laga kotha he janai thakise; 14aru jodi tumikhan pora biswas kore, tetiya tar he ahhibole thaka Elijah tu ase. 15Kon hunibole kan ase, tar pora huni lobi.
16“Kintu eitu jugh manuh khan nimite, moi ki pora tulona kori kene dekhai dibo? Eitu bacha khan bazar te bohi kene eke logote kheli thaka nijor saathi khan ke mati thaka nisna ase,
17“‘Amikhan banhi bajaise, aru tumikhan pora nach kora nai;
amikhan kanda gana gaise, aru tumikhan mon dukh hua nai.’
18Kilemane John ahhi kene khua lua kora nai, aru taikhan pora koi, ‘Tar logote ohusi atma ase.’ 19Manuh laga Putro tu khua lua kori kene ahhise, aru taikhan pora koi, ‘Sabi, khakua manuh, aru paapi khan aru khajana tula khan laga saathi!’ Kintu gyan kotha tu hole tai nijor laga kam pora he janai dibo.
Mon Naghura Sohor Khan Bedona Ase
20Tetiya sohor kiman te Tar he asorit kam besi korise eitu khan ke gali dibole shuru hoise, kilemane taikhan pora mon ghurai ahha nai. 21“Tumi karne bedona ase, Chorazin! Tumi karne bedona ase Bethsaida! Kilemane kontu asorit kam tumikhan logote korise, eitu jodi Tyre aru Sidon te korise kole taikhan tu aage pora bosta kapoor uri kene aru khaar te bohi kene mon ghurai kene thakibole asile. 22Kintu moi tumikhan ke koi ase, Bichar kora din te tumikhan pora tu Tyre aru Sidon ke sehen koribole he sosta hobo. 23Aru tumi, Capernaum, tumi akash tak uthi jabo neki? Tumi hades niche tak loi anibo. Kilemane tumikhan karne ki mahan kam korise eitu Sodom te kori kene thakile, aji tak taikhan bhi thakibole asile. 24Kintu moi tumikhan ke koi ase bichar din te tumikhan pora tu Sodom desh laga dondo he sehen koribole sosta hobo.”
Moi Logot Ahhibi, Aru Moi Aram Dibo
25Eitu homoi te Jisu he koise, “Moi tumi ke dhanyabad di ase Pitri, Sorgo aru prithibi laga prabhu, kilemane gyani khan aru pondit khan pora tumi eitu kotha lukai rakhise aru huru bacha khan ke janai dise; 26hoi, Pitri, kilemane eneka hobole he Apunar itcha thakise. 27Sob bostu khan Pitri pora moi logote he dise; aru konu manuh bhi Putro ke najane khali Pitri he jane, aru konu manuh bhi Pitri ke najane khali Putro he jane, aru kon ke Putro pora Pitri janai dibole monn ase taikhan ke prokahit kore. 28Kon he dukh aru bhari khang bukhi ase, moi logote ahhibi aru moi tumikhan ke aram dibo. 29Moi laga jungali tumi loi lobi, aru moi pora sikhai lobi; kilemane moi nomro aru mon te norom ase, aru tumar atma nimite aram pabo. 30Kilemane moi laga jungali tu asani ase, aru moi laga khang tu halka ase.”
Valið núna:
MATTHEW 11: NagaMe
Áherslumerki
Deildu
Afrita
Want to have your highlights saved across all your devices? Sign up or sign in
© 2014, The Bible Society of India
All rights reserved.