MATTHEW 12
12
Jisu He Bisram Din Laga Prabhu
1Eitu homoi te Jisu he bisram din te dhan kheti par kori kene jaise. Aru tar laga chella khan bhuk lagi jaise, aru tarkhan pora dhan singi kene khabole shuru hoise. 2Kintu ketiya Pharisees khan pora eitu dekhise, taikhan pora Tar ke koise, “Sabi, tumar chella khan pora bisram din te ki nakori bole kanoon te koi ase eitu kori ase.” 3Tar he taikhan ke koise, “Ketiya bhuk lagise, David aru tar logote thaka manuh khan pora ki korise eitu tumikhan pora porha nai neki: 4keneka tar he Isor laga ghor te jai kene kanoon hisap te khali puruhit khan pora he khabole para roti, eitu tar aru tar logot te thaka khan pora khaise, eitu porha nai neki? 5Nahole puruhit khan pora bisram din te girja ghor laga kam korile bhi galti nahoi eitu bhi porha nai neki? 6Moi tumi khan ke kobo, dhormo kam pora bhi mahan ekjon he iyate ase. 7Aru ‘Moi bolidaan namange, kintu doya he mange,’ jodi eitu ortho tu tumikhan pora bujile, tetiya tumikhan pora galti nathaka khan ke galti nadibole thakise. 8Kilemane Manuh laga Putro he bisram din laga prabhu ase.”
Haat Sukhi Thaka Manuh
9Aru pasot te Tar eitu jaga pora jaise, aru taikhan laga girja ghor te humaise. 10Aru sabi, tate haat sukhi jua manuh ekjon thakise. Jisu ke bodnam dibole bhabna kori kene taikhan pora hudise, “Bisram din te hustho kori dibole kanoon hisap te thik ase na nahoi?” 11Tetiya Tar he tarkhan ke koise, “Tumikhan majote kon ase, kon pora nijor laga ekta mer thakise aru eitu bisram din te chenda ekta te giri jaise; tetiya tumi eitu ke haat pora dhori kene uthai nadibo neki? 12Tetiya mer ekta pora tu manuh he besi dam ase! Eitu nimite bisram din te holebhi bhall kam koribole kanoon te mani loi ase.” 13Tetiya Jisu he eitu manuh ke koise, “Tumar haat sidha kori lobi.” Aru eitu manuh pora haat tu sidha kori loise, aru dusera haat nisna he bhall hoi jaise. 14Kintu pharisees khan bahar te jai kene Jisu ke keneka morai dibo eitu laga budhi alusona korise.
Basi Lua Isor Laga Nokor
15Jisu he eitu jani loise, aru tate pora jai jaise. Aru besi manuh he tar laga piche piche jaise, aru Jisu he taikhan sob ke hustho kori dise, 16aru Tar kon ase eitu janai nadibo nimite manuh khan ke Tar pora hukum dise. 17Isaiah bhavobadi pora koi thaka kotha tu hidho hoise:
18“sabi, moi laga nokor, kon ke moi basi kene rakhise,
Moi laga priyo ekjon, Tar logot te moi laga atma besi khushi pai.
Tar logot te moi laga atma pathai dibo,
aru tar pora hosa kotha porjati majot te janai dibo.
19Tar pora jagra nakoribo nahole chillai kene dangor awaz pora bhi nakobo,
nahole raasta phale tar pora kotha kua kon pora bhi nahunibo;
20niyai kotha pora najita tak,
Tar pora tera kori thaka paani gos nol ekta bhi nabhangibo,
aru joli thaka mom bati te bhi, jui namorabo;
21Aru Tar laga nam te he porjati khan pora bharosa koribo.”
Pobitro Atma Upor Te Beya Kotha Kua
22Tetiya bhut he dhori thaka andha aru buba ekjon Tar usor te anise, aru Jisu he tar ke hustho kori dise, tetiya eitu buba he kotha kobole aru dekhibole paise. 23Aru sob manuh pora asorit lagise, aru koise, “Eitu David laga Putro tu nahoi neki?” 24Kintu Pharisees khan pora eitu huni kene koise, “Eitu manuh he bhut laga raja, Beelzebul madad pora he ohusi atma khan ke khedai ase.” 25Taikhan laga bhabna jani kene Jisu he koise, “kon tu rajyo nijor majote birudhi kore, alag alag hoi jai kene khotom hobo, aru kon tu sohor nahole ghor nijor majot te birudhi kore, eitu bhi khara koribo naparibo; 26Aru jodi saitan pora saitan ke khedai, tetiya tai nijor majot te alag alag hoi jabo; aru eneka hole tar laga rajyo tu keneka khara kori thakibo? 27Aru jodi moi Beelzebul darai bhut khedai ase, kon pora tumar laga bacha khan pora eitu ke khedai dibo? Eitu nimite taikhan he tumikhan ke bichar koribo. 28Kintu jodi Moi Isor laga Atma darai he bhut ke khedai, tetiya hole tumar khan karne sorgo rajyo usor te ahhe kene ase. 29Nahole balowan ekjon tu aage te nabandhile, keneka manuh ekjon pora tar laga ghor te jai kene bostu khan uthai lobo paribo? Eitu aage te bandhi rakhile tetiya he uthai lobo paribo. 30Kon manuh he moi logot te nathake, eitu manuh moi logot te birudh ase; aru kon manuh he moi logot te jama nakori tar alag hoi jabo. 31Eitu nimite moi tumikhan ke kobo, manuh khan pora kora paap aru ninda kora sob khyama koribo, kintu Pobitro Atma birudh te ninda kora khyama napabo. 32Aru kon manuh he Manuh laga Putro birudhi kotha koi, khyama pabo; kintu kon manuh he Pobitro Atma birudhi kotha koi, eitu jugh te holebhi ahhi thaka jugh te holebhi khyama napabo.
Phol Pora Gos Jani Loi
33“Gos aru eitu laga phol bhall kori dibi; nahole gos aru eitu laga phol bhi beya kori dibi; kilemane phol pora he gos tu jani loi. 34Tumi sanp laga bacha khan! Tumikhan beya hoi kene, keneka bhall kotha kobo paribo? Kilemane ki pora mon bhorta ase, eitu he mukh pora ulai. 35Bhall manuh he bhall mon pora bhall bostu ulai diye, aru beya manuh he beya mon pora beya bostu ulai diye. 36Moi tumikhan ke koi ase, bichar din te manuh khan pora ki hushier nakora kotha koise, eitu nimite nijor he jawab dibo lagibo, 37kilemane nijor kotha pora he tumikhan ke bachabo, aru nijor kotha te he tumikhan ke ninda hobo.”
Jonah Laga Sign
38Tetiya konuba pondit aru Pharisees khan pora Tar ke koise, “Guru, apuni asorit kam kora ekta amikhan pora sabole monn ase.” 39Kintu Jisu he tarkhan ke jawab di koise, “Paapi khan aru biyobichar jugh manuh khan pora sign sabole bisare, kintu Jonah bhavobadi laga sign pora alag sign eku bhi taikhan ke nadekhabo. 40Kilemane keneka dangor maas laga pet bhitor te Jonah tin din aru tin raati thakise, eitu nisna Manuh laga Putro maati bhitor te tin din aru tin raati thakibo. 41Bichar din te Nineveh laga manuh khan he eitu jugh logot te khara kori kene taikhan ke ninda koribo, kilemane taikhan pora Jonah prachar kora kotha te mon bodli korise, aru sabi, Jonah pora bhi dangor ekjon iyate ase! 42Bichar din te dokshin te thaka raani he eitu jugh logot te khara kori kene ninda koribo, kilemane tai prithibi kinar pora Solomon laga gyan kotha hunibole ahhise, aru sabi, konuba ekjon Solomon pora bhi dangor iyate ase.
Ohusi Atma Ghurai Ahha
43“Ketiya ohusi atma manuh laga mon pora ulai jai, eitu aram koribole sukhan jaga bisari kene sob phale jai, kintu jaga napai. 44Tetiya ohusi atma pora koi, ‘Moi kon tu ghor pora ulai ahhise, tate ghurai jabo.’ Aru ketiya tar ahhise, eitu ghor khali kori kene, safa aru sob thik-thak thakise. 45Tetiya tar jai kene tar pora bhi besi beya atma satta anise, aru taikhan tate thaki jaise, aru eitu manuh laga jivon tu, shuru pora antim tu he besi beya hobole ase. Eitu nisna he, eitu paapi jugh bhi eneka he hobo.”
Jisu Laga Amaa Aru Bhai Khan
46Ketiya jama kori thaka manuh khan logote Jisu he kotha koi thakise, sabi, tar laga amaa aru bhai khan bahar te khara kori kene tar logot te kotha patibole bisari thakise.#12:46 based text te v. 47 tu likha nai 48Kintu kon he khobor dise tar ke uttar di kene koise, “Moi laga amaa kon ase, aru moi laga bhai khan kon ase?” 49Aru nijor chella khan ke anguli pora dekhai kene Tar he koise, “Eitu khan he moi laga amaa aru bhai khan ase! 50Kilemane kon he sorgo te thaka Pitri itcha kore, eitu he moi laga bhai bhoni aru amaa ase.”
Valið núna:
MATTHEW 12: NagaMe
Áherslumerki
Deildu
Afrita
Want to have your highlights saved across all your devices? Sign up or sign in
© 2014, The Bible Society of India
All rights reserved.