ܣܶܦܪܳܐ ܕ݄ܒܪܺܝܬ̥ܳܐ 3
3
1ܘܽܗ̄ܘ ܚܰܘܝܳܐ ܨܢܺܝܥܳܐ ܗ̄ܘܰܐ ܙ݄ܕ ܡܶܢ̱ ܟܽܘܠّܶܗ ܗ̄ܰܚّܰܝ̈ܘܳܬ̥ܳܐ ܕܽܗ̄ܘ ܡܰܕ̥݄ܒܪܳܐ ܕܣ݄ܡ ܠܶܗ ܡܳܪܝܳܐ ܐܰܠܳܗܳܐ. ܘܐܡ݄ܪ ܠܶܗ ܗ̄ܽܘ ܚܰܘܝܳܐ ܠܺܗ̄ܝ ܐܰܢ̱ܬ̥ܬܳܐ: ”ܒ݄ܫܪܳܪܳܐ ܐܡ݄ܪ ܠܶܗ ܐܰܠܳܗܳܐ ܕܠܳܐ ܐܟ̥ܠܺܝܬܽܘ ܡܶܢ̱ ܟܽܘܠّܶܗ ܗ̄ܰܢ ܐܺܝܠܳܢ̈ܶܐ ܕܽܗ̄ܘ ܦܰܪܕܰܝܣܳܐ؟“ 2ܘܐܡ݄ܪ ܠܰܗ ܗ̄ܺܝ ܐܰܢ̱ܬ̥ܬܳܐ ܠܽܗ̄ܘ ܚܰܘܝܳܐ: ”ܡܰܢ̱ ܦّܺܐܪ̈ܶܐ ܕܰܗ̄ܢ ܐܺܝܠܳܢ̈ܶܐ ܕܒܽܗ̄ܘ ܦܰܪܕܰܝܣܳܐ ܟܽܘܠّܶܗ ܓܕܳܐܟ̥ܠܺܝܢܰܐ، 3ܘܡܰܢ̱ ܦّܺܐܪ̈ܶܐ ܕܽܗ̄ܘ ܐܺܝܠܳܢܳܐ ܕ݄ܒܦܰܠܓܶܗ ܕܽܗ̄ܘ ܦܰܪܕܰܝܣܳܐ، ܐܰܠܳܗܳܐ ܐܡ݄ܪ ܠܶܗ: ܠܳܐ ܐܟ̥ܠܺܝܬܽܘ ܡܶܢܶܗ، ܘܠܳܐ ܡܩܰܪܒ̥ܺܝܬܽܘ ܠܶܗ ܕܠܳܐ ܡܰܝܬ̥ܺܝܬܽܘ.“ 4ܘܐܡ݄ܪ ܠܶܗ ܗ̄ܽܘ ܚܰܘܝܳܐ ܠܺܗ̄ܝ ܐܰܢ̱ܬ̥ܬܳܐ: ”ܡܰܘܬܳܐ ܠܳܐ ܓܡܰܝܬ̥ܺܝܬܽܘ، 5ܡܺܐܝܕ̥ܶܗ ܕܟܳܐܕ̥݄ܥ ܐܰܠܳܗܳܐ ܕܒܽܗ̄ܘ ܝܰܘܡܳܐ ܕܳܐܟ̥ܠܺܝܬܽܘ ܡܶܢܶܗ، ܓܡ݄ܦܬܳܚܺܝ ܥܰܝܢ̈ܳܬ̥ܰܝܟ̥ܽܘ، ܘ݄ܓܕܳܗ̄ܘܺܝܬܽܘ ܐܟ̥ ܕܰܗ̄ܢ ܐܰܠܳܗ̈ܶܐ ܝܰܕ̥ܳܥ̈ܶܐ ܕܺܗ̄ܝ ܛܰܒ̥ܬܳܐ ܘܕܺܗ̄ܝ ܒܺܝܫܬܳܐ.“ 6ܘ݄ܚܙܶܐ ܠܰܗ ܗ̄ܺܝ ܐܰܢ̱ܬ̥ܬܳܐ ܕܫܰܦܺܝܪܳܐ ܝܳܐ ܗ̄ܽܘ ܐܺܝܠܳܢܳܐ ܠܽܗ̄ܘ ܡܽܐܘܟܠܳܐ ܘܪܶܓܬ̥ܳܐ ܝܳܐ ܠܰܥّܰܝܢ̈ܶܐ، ܘܫܰܦܺܝܪܳܐ ܝܳܐ ܗ̄ܽܘ ܐܺܝܠܳܢܳܐ ܕܡܺܝܚ݄ܪ ܐܶܒܶܗ. ܘܡ݄ܕ ܠܰܗ ܡܰܢ̱ ܦّܺܐܪ̈ܰܝܕ̥ܶܗ ܘܰܐܟ̥ܺܝܠ ܠܰܗ. ܘܗܽܒ̥ ܠܰܗ ܠܽܗ̄ܘ ܓܰܒ̥ܪܰܝܕ̥ܰܗ ܣܬܶܝ ܐܰܥܡܰܗ ܘܰܐܟ̥ܺܝܠ ܠܶܗ. 7ܘ݄ܦܬܺܝܚܺܝ ܥܰܝܢ̈ܶܐ ܕܰܬܪܰܝّܶܗ ܘܰܐܕ̥ܺܝܥܺܝ ܕܥܰܪ̈ܛܶܠܳܝܶܐ ܢܶܝ. ܘܡܰܪܟܰܒّ̥ܶܗ (ܙܠ݄ܩّܶܗ) ܛܰܪ̈ܦܶܐ ܕܬܶܐܢ̈ܶܐ ܘܣܺܝܡ݄ܢّܶܗ ܫܰܪ̈ܒ̥ܳܠܶܐ.
8ܘܫܰܡܺܝܥܺܝ ܗ̄ܽܘ ܩܳܠܳܐ ܕܡܳܪܝܳܐ ܐܰܠܳܗܳܐ ܕܟܳܡܗܰܠ݄ܟ̥ ܒܽܗ̄ܘ ܦܰܪܕܰܝܣܳܐ ܒ݄ܓܢܰܝܬܶܗ ܕܝܰܘܡܳܐ، ܘ݄ܬܠܰܠّܶܗ ܪ̈ܽܘܚܰܝّܶܗ ܐܳܕ̥ܳܡ ܘܺܗ̄ܝ ܐܰܢ̱ܬ̥ܬܳܐ ܡܶܢ̱ ܩܽܘܕ̱ܡܶܗ ܕܡܳܪܝܳܐ ܐܰܠܳܗܳܐ ܒܰܝܢ ܗ̄ܰܢ ܐܺܝܠܳܢ̈ܶܐ ܕܒܽܗ̄ܘ ܦܰܪܕܰܝܣܳܐ. 9ܘ݄ܩܪܶܐ ܠܶܗ ܡܳܪܝܳܐ ܐܰܠܳܗܳܐ ܠܳܐܕ̥ܳܡ ܘܐܡ݄ܪ ܠܶܗ ܠܶܗ: ”ܐܰܝܟܳܐ ܗܰܬ ܐܳܕ̥ܳܡ؟“ 10ܘܐܡ݄ܪ ܠܶܗ: ”ܩܳܠܳܟ̥ ܫܰܡ݄ܥ ܐ̱ܢܳܐ ܒܽܗ̄ܘ ܦܰܪܕܰܝܣܳܐ، ܘ݄ܚܙܶܐ ܠܺܝ ܕܟ݄ܬ ܐ̱ܢܳܐ ܥܰܪܛܶܠܳܝܳܐ، ܘ݄ܬܠܶܐ ܠܺܝ ܪܽܘܚܺܝ.“ 11ܘܐܡ݄ܪ ܠܶܗ ܠܶܗ ܡܳܪܝܳܐ: ”ܡܰܢ ܡܰܚܘܶܐ ܠܶܗ ܠܳܟ̥ ܕܥܰܪܛܶܠܳܝܳܐ ܗܰܬ؟ ܟܰܐܠܶܗ ܡܽܗ̄ܘ ܐܺܝܠܳܢܳܐ ܕܐܡ݄ܪ ܠܺܝ ܠܳܟ̥ ܒܦܽܘܩܕܳܢܳܐ ܠܳܐ ܐܟ̥ܠܰܬ ܡܶܢܶܗ، ܐܰܟ̥ܺܝܠ ܠܳܟ̥؟“ 12ܘܐܡ݄ܪ ܠܶܗ ܐܳܕ̥ܳܡ: ”ܗ̄ܺܝ ܐܰܢ̱ܬ̥ܬܳܐ ܕܗܽܒ̥ ܠܳܟ̥ ܠܺܝ ܐܰܥܡܺܝ ܗܺܝّܰܗ ܗܽܒ̥ ܠܰܗ ܠܺܝ ܡܽܗ̄ܘ ܐܺܝܠܳܢܳܐ ܘܰܐܟ̥ܺܝܠ ܠܺܝ.“ 13ܘܐܡ݄ܪ ܠܶܗ ܡܳܪܝܳܐ ܐܰܠܳܗܳܐ ܠܺܗ̄ܝ ܐܰܢ̱ܬ̥ܬܳܐ: ”ܡ݄ܢܝܳܐ ܗܰܢܳܐ ܕܣ݄ܡ ܠܰܟ̥؟“ ܘܐܡ݄ܪ ܠܰܗ ܗ̄ܺܝ ܐܰܢ̱ܬ̥ܬܳܐ: ”ܗ̄ܽܘ ܚܰܘܝܳܐ ܡܰܛܥܶܐ ܠܶܗ ܠܺܝ ܘܰܐܟ̥ܺܝܠ ܠܺܝ.“ 14ܘܐܡ݄ܪ ܠܶܗ ܡܳܪܝܳܐ ܐܰܠܳܗܳܐ ܠܽܗ̄ܘ ܚܰܘܝܳܐ: ”ܥܰܠ ܕܣ݄ܡ ܠܳܟ̥ ܗܰܬ̥ܶܐ، ܠܺܝܛܳܐ ܗܰܬ ܡܶܢ̱ ܟܽܘܠܶܗ ܗ̄ܽܘ ܒܥܺܝܪܳܐ ܘܡܶܢ̱ ܟܽܘܠܰܗ ܗ̄ܺܝ ܚܰܝܽܘܬ̥ܳܐ ܕܽܗ̄ܘ ܡܰܕ̥݄ܒܪܳܐ. ܘܥܰܠ ܓܰܘܳܟ̥ ܓ݄ܡܗܰܠܟ̥ܰܬ، ܘܥܰܦܪܳܐ ܓܕܳܐܟ̥ܠܰܬ ܟܽܘܠّܶܗ ܗ̄ܰܝّܰܘܡ̈ܶܐ ܕܰܚّܰܝ̈ܰܝܕ̥ܳܟ̥. 15ܘ݄ܒܥܶܠܕܒܳܒܽܘܬ̥ܳܐ ܓܡܰܚܰܬ ܐ̱ܢܳܐ ܒܰܝܢ ܐܶܠܳܟ̥ ܘܠܺܗ̄ܝ ܐܰܢ̱ܬ̥ܬܳܐ، ܘܒܰܝܢ ܗ̄ܽܘ ܙܰܪܥܰܝܕ̥ܰܟ̥ ܘܠܽܗ̄ܘ ܙܰܪܥܰܝܕ̥ܶܗ. ܗܺܝّܶܗ ܓܕܳܝ݄ܫ ܪܺܝܫܳܟ̥، ܘܗܰܬ ܓܡܳܚܰܬ ܠܶܗ ܒܥܰܪܩܽܘܒ̥ܶܗ.“ 16ܘܠܺܗ̄ܝ ܐܰܢ̱ܬ̥ܬܳܐ ܐܡ݄ܪ ܠܶܗ: ”ܬܶܙܺܝܕܳܐ ܓܡܰܙ݄ܕ ܐ̱ܢܳܐ ܗ̄ܰܟّܶܐܒ̥̈ܰܝܕ̥ܰܟ̥ ܘܰܒّܰܛܢ̈ܰܝܕ̥ܰܟ̥. ܘ݄ܒܟܶܐܒ̥̈ܶܐ ܓܡܰܘܠܕܰܬ ܐܰܒܢ̈ܶܐ. ܘܥܰܠ ܗ̄ܽܘ ܓܰܒ̥ܪܰܝܕ̥ܰܟ̥ ܓܕܳܥܪܰܬ ܘܗܺܝّܶܗ ܓܡܺܝܫܰܠ݄ܛ ܐܰܥܠܰܟ̥.“ 17ܘܠܳܐܕ̥ܳܡ ܐܡ݄ܪ ܠܶܗ: ”ܥܰܠ ܕܫܰܡܺܝܥܰܬ ܒܩܳܠܳܐ ܕܺܗ̄ܝ ܐܰܢ̱ܬ̥ܬܰܝܕ̥ܳܟ̥، ܘܰܐܟ̥ܺܝܠ ܠܳܟ̥ ܡܽܗ̄ܘ ܐܺܝܠܳܢܳܐ ܕܐܡ݄ܪ ܠܺܝ ܠܳܟ̥ ܒܽܗ̄ܘ ܦܽܘܩܕܳܢܳܐ ܕܠܳܐ ܐܟ̥ܠܰܬ ܡܶܢܶܗ، ܡܶܢ̱ ܦܳܬ̥ܳܟ̥ ܠܺܝܛܬܳܐ ܓܕܽܗ̄ܘܝܳܐ ܗ̄ܺܝ ܐܰܪܥܳܐ. ܒܟܶܐܒ̥̈ܶܐ ܓܕܳܐܟ̥ܠܰܬ ܡܶܢܰܗ ܟܽܘܠّܶܗ ܗ̄ܰܝّܰܘܡ̈ܶܐ ܕܰܚّܰܝ̈ܰܝܕ̥ܳܟ̥. 18ܟܽܘܒ̈ܶܐ ܘܕܰܪ̈ܕܳܪܶܐ ܓܡܰܘܥܝܳܐ ܠܳܟ̥. ܘܕܳܐܟ̥ܠܰܬ ܗ̄ܽܘ ܓܶܠܳܐ ܕܺܗ̄ܝ ܚܰܩܠܳܐ. 19ܘܒܺܗ̄ܝ ܕܰܥܬ̥ܳܐ ܕܦܳܬ̥ܳܟ̥ ܓܕܳܐܟ̥ܠܰܬ ܠܰܚܡܳܐ ܗ݄ܠ ܕܕܳܥܪܰܬ ܠܺܗ̄ܝ ܐܰܪܥܳܐ ܕܡܶܢܰܗ ܡܺܝܕܰܬ. ܡܺܐܝܕ̥ܶܗ ܕܥܰܦܪܳܐ ܗܰܬ ܘܠܽܗ̄ܘ ܥܰܦܪܳܐ ܓܕܳܥܪܰܬ.“
20ܘ݄ܩܪܶܐ ܠܶܗ ܐܳܕ̥ܳܡ ܐ݄ܫܡܰܗ ܕܺܗ̄ܝ ܐܰܢ̱ܬ̥ܬܳܐ ܚܰܘܳܐ، ܥܰܠ ܕܗܺܝّܰܗ ܗܰܘܝܳܐ ܐܶܡܳܐ ܕܟܘ̇ܠ ܚܰܝܳܐ. 21ܘܣ݄ܡ ܠܶܗ ܡܳܪܝܳܐ ܐܰܠܳܗܳܐ ܠܳܐܕ̥ܳܡ ܘܠܺܗ̄ܝ ܐܰܢ̱ܬ̥ܬܳܐ ܩܶܡ݄ܣܝ̈ܳܬ̥ܳܐ ܕܓܰܠܕܳܐ ܘܡܰܠܒ̥ܫܺܝ ܠܶܗ.
22ܘܐܡ݄ܪ ܠܶܗ ܡܳܪܝܳܐ ܐܰܠܳܗܳܐ: ”ܟܰܐܠܶܗ ܐܳܕ̥ܳܡ ܗܰܘܺܝ ܐܟ̥ ܕܚܰܕ̱ ܡܶܢܰܢ ܕܳܐܕ̥݄ܥ ܗ̄ܺܝ ܛܰܒ̥ܬܳܐ ܘܺܗ̄ܝ ܒܺܝܫܬܳܐ. ܐܳܥܕܳܐ ܕܠ݄ܐ ܐܙّܶܗ ܦܳܫ݄ܛ (ܡܳܫ݄ܕ) ܐܺܝܕ̥ܶܗ ܘܡܳܝ݄ܕ ܣܬܶܝ ܡܽܗ̄ܘ ܐܺܝܠܳܢܳܐ ܕܰܚّܰܝ̈ܶܐ ܘܳܐܟ̥݄ܠ ܘܚܳܝܶܐ ܠܥܳܠܰܡ.“ 23ܘ݄ܡܫܰܕܰܪ ܠܶܗ ܡܳܪܝܳܐ ܐܰܠܳܗܳܐ ܡܽܗ̄ܘ ܦܰܪܕܰܝܣܳܐ ܕ݄ܥܕܶܢ ܕܦܳܠ݄ܚ ܗ̄ܺܝ ܐܰܪܥܳܐ ܕܡܺܝܕ ܡܶܢ̱ ܬܰܡܳܐ. 24ܘܡܰܘܦܰܩ ܠܶܗ ܡܳܪܝܳܐ ܐܰܠܳܗܳܐ. ܘܡܽܗ̄ܘ ܡܰܕ݄ܢܚܳܐ ܡܰܩ݄ܡ ܠܶܗ ܟܪܽܘܒܳܐ (ܡܰܠܰܐܟ̥ܳܐ) ܚܶܕ̥ܳܪ ܕܽܗ̄ܘ ܦܰܪܕܰܝܣܳܐ ܕ݄ܥܕܶܢ، ܘܣܰܝܦܳܐ ܠܛܺܝܫܳܐ ܕܟܳܟܳܪ݄ܟ̥ ܕܢܳܛ݄ܪ ܗ̄ܽܘ ܕܰܪܒܳܐ ܕܽܗ̄ܘ ܐܺܝܠܳܢܳܐ ܕܰܚّܰܝ̈ܶܐ.
Valið núna:
ܣܶܦܪܳܐ ܕ݄ܒܪܺܝܬ̥ܳܐ 3: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation