ܣܶܦܪܳܐ ܕ݄ܒܪܺܝܬ̥ܳܐ 4
4
1ܘܳܐܕ̥ܳܡ ܡܚܰܟܰܡ ܠܶܗ ܪܽܘܚܶܗ ܒܚܰܘܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ، ܘ݄ܒܛܺܝܢܳܐ ܘܡܰܘܠܰܕ ܠܰܗ ܠܩܳܐܶܝܢ. ܘܐܡ݄ܪ ܠܰܗ: ”ܩܢܶܐ ܠܺܝ ܓܰܒ̥ܪܳܐ ܠܡܳܪܝܳܐ.“ 2ܘܡܰܘܠܰܕ ܠܰܗ ܣܬܶܝ ܠܽܗ̄ܘ ܐܰܚܽܘܢܰܝܕ̥ܶܗ ܗܳܒܶܝܠ. ܘܗܰܘܺܝ ܗܳܒܶܝܠ ܪܳܥܝܳܐ ܕܰܥܘܳܢ̈ܶܐ. ܘܩܳܐܶܝܢ ܗܰܘܺܝ ܦܰܠܳܚܳܐ ܒܺܗ̄ܝ ܐܰܪܥܳܐ. 3ܘܗܰܘܺܝ ܡܶܢ̱ ܒ݄ܬ̥݄ܪ ܝܰܘܡ̈ܳܬ̥ܳܐ، ܘܡܰܝܬܶܐ ܠܶܗ ܩܳܐܶܝܢ ܡܰܢ̱ ܦّܺܐܪ̈ܶܐ ܕܺܗ̄ܝ ܐܰܪܥܰܝܕ̥ܶܗ ܩܽܘܪܒܳܢܳܐ ܠܡܳܪܝܳܐ. 4ܘܗܳܒܶܝܠ ܣܬܶܝ ܡܰܝܬܶܐ ܠܶܗ ܡܰܢ̱ ܒّܽܘܟ̥ܪ̈ܶܐ ܕܰܥܘܳܢ̈ܰܝܕ̥ܶܗ ܘܡܰܢ̱ ܬّܰܩܺܝܢ̈ܰܬّ̥ܶܗ. ܘ݄ܦܨܺܝܚ ܡܳܪܝܳܐ ܒܗܳܒܶܝܠ ܘܒܽܗ̄ܘ ܩܽܘܪܒܳܢܰܝܕ̥ܶܗ. 5ܘ݄ܒܩܳܐܶܝܢ ܘܒܽܗ̄ܘ ܩܽܘܪܒܳܢܰܝܕ̥ܶܗ ܠܳܐ ܦܨܺܝܚ. ܘܥܰܝ݄ܩ ܠܶܗ ܠܩܳܐܶܝܢ ܓ̥ܰܠܰܒܶܐ، ܘ݄ܟܡܺܝܪܳܐ ܦܳܬ̥ܶܗ. 6ܘܐܡ݄ܪ ܠܶܗ ܡܳܪܝܳܐ ܠܩܳܐܶܝܢ: ”ܠܡ݄ܢ ܥܰܝ݄ܩ ܠܳܟ̥؟ ܘ݄ܠܡ݄ܢ ܟܡܺܝܪܳܐ ܦܳܬ̥ܳܟ̥؟ 7ܟܰܐܠܶܗ ܐܶܢ ܛܳܒ̥ܳܐ ܕܣܰܝܡܰܬ ܡܰܩܒܶܠ ܠܺܝ. ܘ݄ܕܠܳܐ ܛܳܒ̥ܳܐ ܣܰܝܡܰܬ، ܟܰܐܠܰܗ ܚܛܺܝܬ̥ܳܐ ܥܰܠ ܗ̄ܽܘ ܬܰܪܥܳܐ ܪܰܒ̥݄ܥܬܳܐ. ܗܰܬ ܓܕܳܥܪܰܬ ܐܰܥܠܰܗ، ܘܗܺܝّܰܗ ܓܡܺܝܫܰܠܛܳܐ ܐܰܥܠܳܟ̥.“
8ܘܐܡ݄ܪ ܠܶܗ ܩܳܐܶܝܢ ܠܗܳܒܶܝܠ ܗ̄ܽܘ ܐܰܚܽܘܢܳܐ: ”ܬܳܟ̥ ܡܗܰܠܟ̥ܺܝܢܰܐ ܠܽܗ̄ܘ ܢܰܚܠܳܐ.“ ܘܗܰܘܺܝ، ܘܗ݄ܢّܶܝ ܒܺܗ̄ܝ ܚܰܩܠܳܐ، ܩܰܝ݄ܡ ܩܳܐܶܝܢ ܥܰܠ ܗܳܒܶܝܠ ܗ̄ܽܘ ܐܰܚܽܘܢܳܐ ܘ݄ܩܛܺܝܠ ܠܶܗ. 9ܘܐܡ݄ܪ ܠܶܗ ܡܳܪܝܳܐ ܠܩܳܐܶܝܢ: ”ܐܰܝܟܳܐ ܝܳܐ ܗܳܒܶܝܠ ܐܰܚܽܘܢܳܟ̥؟“ ܘܐܡ݄ܪ ܠܶܗ: ”ܠ݄ܐ ܟܳܐܕ̥ܰܥ ܐ̱ܢܳܐ، ܩܰܝ ܢܳܛܽܘܪܳܐ ܐ̱ܢܳܐ ܕܰܐܚܽܘܢܺܝ؟“ 10ܘܐܡ݄ܪ ܠܶܗ ܠܶܗ ܡܳܪܝܳܐ: ”ܡ݄ܢ ܣ݄ܡ ܠܳܟ̥؟ ܗ̄ܽܘ ܩܳܠܳܐ ܕܽܗ̄ܘ ܐܰܕܡܳܐ ܕܰܐܚܽܘܢܳܟ̥ ܟܳܓܳܥܶܐ ܠܣܺܝܕܺܝ ܡܺܗ̄ܝ ܐܰܪܥܳܐ. 11ܡܳܐܥܕܳܐ ܠܺܝܛܳܐ ܗܰܬ ܡܺܗ̄ܝ ܐܰܪܥܳܐ ܕ݄ܦܬ݄ܚ ܠܰܗ ܦܶܡܰܗ ܘܡܰܩܒܶܠ ܠܰܗ ܐܰܕ̥ܡܶܗ ܕܰܐܚܽܘܢܳܟ̥ ܡܶܢ̱ ܐܺܝܕ̥̈ܳܬ̥ܳܟ̥. 12ܗ̄ܺܝ ܢܰܩܠܐ ܕܦܳܠܚܰܬ ܗ̄ܺܝ ܐܰܪܥܳܐ ܠ݄ܐ ܓܕܳܥܪܳܐ ܗ̄ܳܒܶܐ ܠܳܟ̥ ܗ̄ܽܘ ܚܰܝܠܰܝܕ̥ܰܗ. ܙܰܝܳܥܳܐ ܘܟܰܪܳܟ̥ܳܐ ܓܕܳܗ̄ܘܰܬ ܒܺܗ̄ܝ ܐܰܪܥܳܐ.“ 13ܘܐܡ݄ܪ ܠܶܗ ܩܳܐܶܝܢ ܠܡܳܪܝܳܐ: ”ܗ̄ܺܝ ܚܛܺܝܬ̥ܰܝܕ̥ܺܝ ܗܰܩܰܐ ܪܰܒܬ̥ܳܐ ܝܳܐ ܕܠܳܐ ܡ݄ܫܒܳܩܳܐ. 14ܟܰܐܠܶܗ ܡܰܘܦܰܩ ܠܳܟ̥ ܠܺܝ، ܐܰܕܝܰܘܡܰܐ، ܡܶܢ̱ ܦܳܬ̥ܰܗ ܕܺܗ̄ܝ ܐܰܪܥܳܐ، ܘܡܶܢ̱ ܩܽܘܕ̱ܡܳܟ̥ ܓܡ݄ܬܠܶܐ ܐ̱ܢܳܐ، ܘ݄ܓܕܳܗ̄ܘܶܐ ܐ̱ܢܳܐ ܙܰܝܳܥܳܐ ܘܟܰܪܳܟ̥ܳܐ ܒܺܗ̄ܝ ܐܰܪܥܳܐ. ܘܟܘ̇ܠ ܡܰܢ ܕܚܳܙܶܐ ܠܺܝ ܓܩܳܛ݄ܠ ܠܺܝ.“ 15ܘܐܡ݄ܪ ܠܶܗ ܠܶܗ ܡܳܪܝܳܐ: ”ܠܳܐ ܗܰܘܟ̥ܰܐ. ܗ̄ܽܘ ܩܰܛܳܠܳܐ ܕܩܳܐܶܝܢ ܫܒ̥ܰܥ ܟܳܪ̈ܶܐ ܙ݄ܕ ܓܡܺܝܚܰܫܽܒ̥.“ ܘܡܰܚ݄ܬ ܠܶܗ ܡܳܪܝܳܐ ܐܳܬ̥ܳܐ ܒܩܳܐܶܝܢ ܕܠܳܐ ܩܳܛܶܠ ܠܶܗ ܟܘ̇ܠ ܡܰܢ ܕܚܳܙܶܐ ܠܶܗ. 16ܘܢܰܦ݄ܩ ܩܳܐܶܝܢ ܡܶܢ̱ ܩܽܘܕ̱ܡܶܗ ܕܡܳܪܝܳܐ، ܘܝܰܬܽܒ̥ ܒܺܗ̄ܝ ܐܰܪܥܳܐ ܕܢܽܘܕ ܒܽܗ̄ܘ ܡܰܕ݄ܢܚܳܐ ܕ݄ܥܕܶܢ.
17ܘܩܳܐܶܝܢ ܡܚܰܟܰܡ ܠܶܗ ܪܽܘܚܶܗ ܒܺܗ̄ܝ ܐܰܢ̱ܬ̥ܬܰܝܕ̥ܶܗ، ܘ݄ܒܛܺܝܢܳܐ ܘܡܰܘܠܰܕ ܠܰܗ ܚܢܽܘܟ̥. ܘ݄ܒܢܶܐ ܠܶܗ ܡܕ̥ܺܝܢ̱ܬܳܐ، ܘ݄ܩܪܶܐ ܠܶܗ ܗ̄ܺܝ ܡܕ̥ܺܝܢ̱ܬܳܐ ܥܰܠ ܐ݄ܫܡܶܗ ܕܽܗ̄ܘ ܐܰܒܪܳܐ ܚܢܽܘܟ̥. 18ܘܡܰܘܠ݄ܕ ܠ݄ܚܢܽܘܟ̥ ܥܺܝܕܳܪ. ܘܥܺܝܕܳܪ ܡܰܘܠܰܕ ܠܶܗ ܡܰܚܽܘܐܶܝܠ. ܘܡܰܚܽܘܐܶܝܠ ܡܰܘܠܰܕ ܠܶܗ ܡܰܬܽܘܫܶܝܠ. ܘܡܰܬܽܘܫܶܝܠ ܡܰܘܠܰܕ ܠܶܗ ܠܰܡܶܟ. 19ܘܠܰܡܶܟ ܫܩܺܝܠ ܠܶܗ ܬܰܪܬܶܝ ܢܶܫ̈ܶܐ، ܐ݄ܫܡܰܗ ܕ݄ܚܕ̥ܳܐ ܥܰܕܳܐ، ܘ݄ܐܫܡܰܗ ܕܺܗ̄ܝ ܚܪܶܬܳܐ ܨܰܠܳܐ. 20ܘܥܰܕ̥ܳܐ ܡܰܘܠܰܕ ܠܰܗ ܝܳܒܳܠ، ܘܗܺܝّܶܗ ܗܰܘܺܝ ܒܰܒܳܐ ܠܰܥّܳܡܽܘܪ̈ܶܐ ܕܽܗ̄ܘ ܡܰܫܟܢܳܐ، ܘܠܰܡّܳܪ̈ܶܐ ܕܰܩّܰܢ̈ܝܳܢܶܐ. 21ܘ݄ܐܫܡܶܗ ܕܽܗ̄ܘ ܐܰܚܽܘܢܳܐ ܝܽܘܒܳܠ، ܘܗܺܝّܶܗ ܗܰܘܺܝ ܒܰܒܳܐ ܠܟܘ̇ܠ ܕܟܳܕܳܝ݄ܩ ܩܺܝܬ̥ܳܪܳܐ ܘܟܶܢܳܪܳܐ. 22ܘܨܰܠܳܐ ܣܬܶܝ ܡܰܘܠܰܕ ܠܰܗ ܬܽܘܒܰܠܩܺܝܢ، ܝܰܕ̥ܳܥܳܐ ܒܽܗ̄ܘ ܥܒ̥ܳܕܳܐ ܕܽܗ̄ܘ ܢܚܳܫܳܐ ܘܕܽܗ̄ܘ ܦܰܪܙܠܳܐ، ܘܠܺܗ̄ܝ ܚܳܬ̥ܳܐ ܕܬܽܘܒܰܠܩܺܝܢ ܢܰܥܡܳܐ. 23ܘܐܡ݄ܪ ܠܶܗ ܠܰܡܶܟ ܠܰܗ̄ܢ ܢܶܫ̈ܰܝܕ̥ܶܗ، ܥܰܕܳܐ ܘܨܰܠܳܐ: ”ܫܡܰܥܽܘ ܩܳܠܺܝ، ܝܰܐ ܗ̄ܰܢ ܢܶܫ̈ܶܐ ܕܠܰܡܶܟ، ܡܰܨܶܬ̥ܽܘ ܠܽܗ̄ܘ ܡܰܐܡܪܰܝܕ̥ܺܝ: ܩܛܺܝܠ ܠܺܝ ܓܰܒ̥ܪܳܐ ܥܰܠ ܕ݄ܡܚܶܐ ܠܶܗ ܠܺܝ، ܘܛܰܠܝܳܐ ܥܰܠ ܕܡܰܟܽܒ̥ ܠܶܗ ܠܺܝ. 24ܡܺܐܝܕ̥ܶܗ ܕ݄ܫܒ̥ܰܥ ܟܳܪ̈ܶܐ ܙ݄ܕ ܓܡܺܝܚܰܫܽܒ̥ ܩܳܐܶܝܢ، ܘܠܰܡܶܟ ܫܒ̥ܰܥ ܘܫܰܒ̥ܥܺܝ.“
25ܘܢܰܩܠܐ ܚܪܶܬܳܐ ܡܚܰܟܰܡ ܠܶܗ ܐܳܕ̥ܳܡ ܒܚܰܘܳܐ ܗ̄ܺܝ ܐܰܢ̱ܬ̥ܬܳܐ، ܘ݄ܒܛܺܝܢܳܐ ܘܡܰܘܠܰܕ ܠܰܗ ܐܰܒܪܳܐ، ܘ݄ܩܪܶܐ ܠܰܗ ܐ݄ܫܡܶܗ ܫܺܝܬ̥. (ܘܐܡ݄ܪ ܠܰܗ): ”ܥܰܠ ܕܗܽܒ̥ ܠܶܗ ܠܺܝ ܐܰܠܳܗܳܐ ܙܰܪܥܳܐ ܚܪܶܢܳܐ ܡܶܢ̱ ܚܠܳܦ ܕܗܳܒܶܝܠ ܕ݄ܩܛܺܝܠ ܠܶܗ ܩܳܐܶܝܢ.“ 26ܘ݄ܠܫܺܝܬ̥ ܣܬܶܝ ܗܰܘܺܝ ܠܶܗ ܐܰܒܪܳܐ، ܘ݄ܩܪܶܐ ܠܶܗ ܐ݄ܫܡܶܗ ܐܰܢܽܘܫ. ܗܶܕܺܝ ܡܫܰܪܶܐ ܠܶܗ ܕܩܳܪܶܐ ܒ݄ܐܫܡܶܗ ܕܡܳܪܝܳܐ.
Valið núna:
ܣܶܦܪܳܐ ܕ݄ܒܪܺܝܬ̥ܳܐ 4: ܟܬܒܐ
Áherslumerki
Deildu
Afrita
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation