Markus 4
4
Maŋgəla ataa ala ma zləga
(Mat 13.1-9; Luk 8.4-8)
1Zhana, Yesu dəba a asərəkatana ma a həji aagi a ma mtil Galili. Həji aagi vərəm, aa tadzam ta ka abəra. Sha ana ndə a taf tə ata gəlmbə, ka a ndza tə ka ata mtil. Həji aagi mba ka ata hayak, a mazləm yəm. 2Dəba Yesu a asərəkatana səkən aagi dagala abə maŋgəla. A wəzaha a sərək ma tə watsa, a kazlapatana:
3«Huni tehzə! Ala ma kazləga, zləga tə watsa a kwiy a kwiy səkən, tsaw a nda a damə a zləgaha. 4Ama ndə a kakwiy shiŋ səkən ya, ndiɓi aagi zah a zal təf. Vigin aagi, dəm aa dəmə tiwtiw. 5Ndiɓi aagi zah ta ata kefe ata la ndə hayak a ɗa ɓəraŋ. Dəf aa dəf ta kahkah, ara ndə, hayak a ɗa ɓəraŋ. 6Ama ndə pish a kaɓalha tə, hwiyam a baz bəza. Ŋhwal aa ŋhwal ta, ara ndə, dzara a ŋkula ndza ka a jiɓ. 7Ndiɓi aagi ya, aa zah a jigiɗ, aa gəl takum, jigiɗ aagi hurakw hurakw aa hurakw ta, kwa taba mbə akas. 8Ndiɓi aagi zah ata hayak ma ŋtan. Dəf aa dəfha, gəl aa gəl ta, kpay aa kpayha ha, ba aagi mbə: Ndiɓi aagi ramahkaɗ ana mbə a heɗe, ndiɓi aagi, raŋkwah ana mbə a heɗe, minja ya, teemeri ata nduŋ ŋtaguleŋ.» 9A diwzha tə, Yesu zlap a zlap azha, iŋgaya: «Ala ma ndza abə zləm a tehi, mazlima.»
Yesu a zlap abə maŋgəla ara veme?
(Mat 13.10-17; Luk 8.9-10)
10Ndə Yesu a ɗa gədək abə həji aagi, həji ta zlən tə aagi abə həji ma ndza abəra aagi, dəba aagi aɗiwzə, ata maŋgəla watsa. 11Yesu zhin a zhinatana: «Aŋkuni meni, Bizlaf tapəlahuni təf a sən səkən abə ma ma ɓahaɓah ma ndza a la ndza bay Bizlaf. Ama həji ndiɓi ma ndza a varvara aagi, səy həji ma zlapatana abə maŋgəla. 12Sha ana ndə a ɗa:
Aa kasar la, ama, aa kagəras.
Aa katehi abə zləm, aa kazlimas.
Ara ndə aa kazhinha a dzanə ra a Bizlaf, aska a pəlatana mpət ta ka.»
Yesu a kaghal maŋgəla ataa ala ma zləga
(Mat 13.18-23; Luk 8.11-15)
13Azha, Yesu zlap a zlapatana: «Huni tazlima maŋgəla ataa ala ma kazləga ma kwiy kwiy shiŋ səkən watsə wəra! Huni asən a zlima maŋgəla ndiɓi aagi avaŋga? 14“Ala ma kazləga səkən,” a zləga ma Bizlaf. 15“Mbə səkən ma zah tə ama təf meni,” təmta, aa ɗa həji ma kazlima ma Bizlaf aagi. Ndə aa zlima, kajik ikwa, Gətili taa tə, leŋ a ji a bəza a ꞌunəf ta. 16“Ma zah ta ata kefe ata la ndə hayak a ɗa ɓəraŋ aagi,” təmta, ana həji ma kazlima ma Bizlaf aagi, lam aa lamzə kahkah abə ɓas a ꞌunəf ta. 17Ama ma watsa taza dzara ka a ꞌunəf ta akas, aa lamzə ma watsa ataa wan kajik ikwa. Ndə yaka a ndaa tə dawna ma Bizlaf, mbasl aa mbasl ka kahkah. 18“Ndiɓi ma zah ta aska jigiɗ aagi”, təmta ana həji ma kazlima ma Bizlaf aagi, 19ama, aa tsa kanda ta a deŋ, ɗa nja aska səkən ma ndza a manahayak, ma kaghut həji aagi: Andza ŋtsəɓ, ɗa nja ma parpar parpar aagi, tatakata ka, ma Bizlaf kwa a kagəl akas, a kanda atama akas. 20“Ataa ma zah a hayak ma ŋtan aagi”, təmta, aa ɗa həji ma zlima ma Bizlaf aagi, kaw aa mbəl ka. Dəba aagi agəl ma tə: Ndiɓi aagi ramahkaɗ, ndiɓi aagi raŋkwah, ndiɓi aagi teemeri.»
Maŋgəla ma ata patərla
(Mat 5.15; 10.26; Luk 8.16-18; 11.33; 6.38)
21Yesu zlap a zlapatana zhana, iŋgaya: «Andza ala tadaaha patərla ya, a dzəɓ ka aska wədzəm vəw? Aka səku, a tsəzə ka a wəzaha aska rəŋgaw vəw? Aɓa azha ci, a tsəzə ka ata la ma tsəham a wəzlaf. 22Səkən ma ɓahaɓah aagi tiwtiw, həji agəra, kala səkən ma ɗal ata digh aagi, aagi aghala ta a la ma ghwaɗeɗe. 23Andza ala abə zləm a tehi, matehi!» 24Zlap Yesu a zhin a zlapatana, iŋgaya: «Huni mbəla ŋkwaɓ abə ma ndə huni kazlima aagi! Səkən ndə huni slaŋgalatana səkən a həji aagi abə sha, Bizlaf a aslaŋgalahuni aŋkuni andza sha. A aɗalahuni dəy aha. 25Ara ndə a ɗa, həji vəlanə səkən ana ala ndə səkən ara. Ama, ala ndə səkən a ŋkula ndza ara, kwa ma kajik ndə a kadeŋ a heɗe, həji aji a bəza ara.»
Maŋgəla ata shiŋ səkən ma kadəfaɓa ha tə
26Yesu zlap a zlap zhana, iŋgaya: «La ndza bay Bizlaf a saɓ andza ala ma zləga shiŋ səkən tə ka a hayak. 27Kwa a kawan, kwa a kandza abə nja, zaɗə abə bishkit, səkən ndə a zləgə watsa, a kadəf, a kagəl. Ama a kasən kata a ɗal avaŋgəyəs. 28Hayak ma kadəf ŋkəsaf watsa abə ha tə, ndə səkən a dəf tə, dəba a adaa ha, dəba a aba mbə. 29Ndə mbə tə a na tə, həji aji ambat a dzə ka ndə a kaɗa teete a dza,» iy.
Maŋgəla ma ndza ata mbə ma gəy guma
(Mat 13.31, 32-34; Luk 13.18-19)
30Yesu zlap a zlap, iŋgaya: «Həji asaɓ Bay Bizlaf abə veme? Abə maŋgəla ma a vata abə həji aa ghalə? 31A ndza andza mbə ma gəy guma, ndə həji zləgə ka a hayak, sha ana ma feŋ a taba shiŋ səkən ma ata manahayak aagi tiwtiw. 32Ama, ndə həji zləgə ka ya, dəf a dəf tə, gəl a gəl tə dəy aha mpi aagi tiwtiw. A kaza ra bay tə, vigin aagi kandaha a lam jak aska kushaŋ tə.»
33Yesu tasərəkatana ma abə maŋgəla aagi vərəm andza watsə, a zlapatana abə səkən ndə aa kaazlima. 34Ma ndə a ŋkula ghalatana abə maŋgəla akas. Ama ndə a ɗa gagagha tə abə magəli tə aagi, tsa kaghalatana ma ma ndza a maŋgəla watsa aagi tiwtiw.
Yesu tagar valalay ka
(Mat 8.23-27; Luk 8.22-25)
35Ma vah watsa abə ŋtsəɓahw, Yesu zlap a zlapatana a magəli tə aagi, iŋgaya: «Kiyzamtakwa a bəza aha ma zlazlər,» iy. 36Mbasl aa mbasl ŋgaɓa həji aagi aka. Magəli tə aagi jaɓ aa jaɓ Yesu abə gəlmbə. Gəlmbə ndiɓi aagi a tsutsa huk abəra aka. 37Dəba valalay a adza abə ɓərɓər tə, yəm a kusah buŋkwa buŋkwa a riy a gəlmbə, slaɓ a pik. 38Yesu tawan tə a wəzaha ata nduŋ a gəlmbə, tatsa ha tə ka ata səkən ta tsa ha tə. Fəɗah aa fəɗah ka ana magəli tə aagi, aagi kəsha iŋgaya: «Madagal, həji kaɗiw a bazl takwa, kwalay kwa aka wəra?» 39Yesu fəɗah a fəɗah tə, dəba a agulak valalay abə ɓərɓər tə: «Ndza ka ɗekɗek!» iy. Gar a gar tə ka, ɗekɗek ana valalay. 40Yesu zlap a zlapatana a magəli tə aagi, iŋgaya: «Huni ɗal ŋzliŋ ara veme? Huni tanaka a ɗal awa aska ma Bizlaf ma ndza a ꞌunəf kuni aka wəra?» 41Ama aa taɗal ŋzliŋ aka a guɗaŋ, aa kazlap a walaŋ ha ta: «Shiŋ ala ndə kwa valalay a kazlimanə zlima abə mtil watsə vaya?» aagiy.
Valið núna:
Markus 4: GOU
Áherslumerki
Deildu
Afrita
Want to have your highlights saved across all your devices? Sign up or sign in
Markus 4
4
Maŋgəla ataa ala ma zləga
(Mat 13.1-9; Luk 8.4-8)
1Zhana, Yesu dəba a asərəkatana ma a həji aagi a ma mtil Galili. Həji aagi vərəm, aa tadzam ta ka abəra. Sha ana ndə a taf tə ata gəlmbə, ka a ndza tə ka ata mtil. Həji aagi mba ka ata hayak, a mazləm yəm. 2Dəba Yesu a asərəkatana səkən aagi dagala abə maŋgəla. A wəzaha a sərək ma tə watsa, a kazlapatana:
3«Huni tehzə! Ala ma kazləga, zləga tə watsa a kwiy a kwiy səkən, tsaw a nda a damə a zləgaha. 4Ama ndə a kakwiy shiŋ səkən ya, ndiɓi aagi zah a zal təf. Vigin aagi, dəm aa dəmə tiwtiw. 5Ndiɓi aagi zah ta ata kefe ata la ndə hayak a ɗa ɓəraŋ. Dəf aa dəf ta kahkah, ara ndə, hayak a ɗa ɓəraŋ. 6Ama ndə pish a kaɓalha tə, hwiyam a baz bəza. Ŋhwal aa ŋhwal ta, ara ndə, dzara a ŋkula ndza ka a jiɓ. 7Ndiɓi aagi ya, aa zah a jigiɗ, aa gəl takum, jigiɗ aagi hurakw hurakw aa hurakw ta, kwa taba mbə akas. 8Ndiɓi aagi zah ata hayak ma ŋtan. Dəf aa dəfha, gəl aa gəl ta, kpay aa kpayha ha, ba aagi mbə: Ndiɓi aagi ramahkaɗ ana mbə a heɗe, ndiɓi aagi, raŋkwah ana mbə a heɗe, minja ya, teemeri ata nduŋ ŋtaguleŋ.» 9A diwzha tə, Yesu zlap a zlap azha, iŋgaya: «Ala ma ndza abə zləm a tehi, mazlima.»
Yesu a zlap abə maŋgəla ara veme?
(Mat 13.10-17; Luk 8.9-10)
10Ndə Yesu a ɗa gədək abə həji aagi, həji ta zlən tə aagi abə həji ma ndza abəra aagi, dəba aagi aɗiwzə, ata maŋgəla watsa. 11Yesu zhin a zhinatana: «Aŋkuni meni, Bizlaf tapəlahuni təf a sən səkən abə ma ma ɓahaɓah ma ndza a la ndza bay Bizlaf. Ama həji ndiɓi ma ndza a varvara aagi, səy həji ma zlapatana abə maŋgəla. 12Sha ana ndə a ɗa:
Aa kasar la, ama, aa kagəras.
Aa katehi abə zləm, aa kazlimas.
Ara ndə aa kazhinha a dzanə ra a Bizlaf, aska a pəlatana mpət ta ka.»
Yesu a kaghal maŋgəla ataa ala ma zləga
(Mat 13.18-23; Luk 8.11-15)
13Azha, Yesu zlap a zlapatana: «Huni tazlima maŋgəla ataa ala ma kazləga ma kwiy kwiy shiŋ səkən watsə wəra! Huni asən a zlima maŋgəla ndiɓi aagi avaŋga? 14“Ala ma kazləga səkən,” a zləga ma Bizlaf. 15“Mbə səkən ma zah tə ama təf meni,” təmta, aa ɗa həji ma kazlima ma Bizlaf aagi. Ndə aa zlima, kajik ikwa, Gətili taa tə, leŋ a ji a bəza a ꞌunəf ta. 16“Ma zah ta ata kefe ata la ndə hayak a ɗa ɓəraŋ aagi,” təmta, ana həji ma kazlima ma Bizlaf aagi, lam aa lamzə kahkah abə ɓas a ꞌunəf ta. 17Ama ma watsa taza dzara ka a ꞌunəf ta akas, aa lamzə ma watsa ataa wan kajik ikwa. Ndə yaka a ndaa tə dawna ma Bizlaf, mbasl aa mbasl ka kahkah. 18“Ndiɓi ma zah ta aska jigiɗ aagi”, təmta ana həji ma kazlima ma Bizlaf aagi, 19ama, aa tsa kanda ta a deŋ, ɗa nja aska səkən ma ndza a manahayak, ma kaghut həji aagi: Andza ŋtsəɓ, ɗa nja ma parpar parpar aagi, tatakata ka, ma Bizlaf kwa a kagəl akas, a kanda atama akas. 20“Ataa ma zah a hayak ma ŋtan aagi”, təmta, aa ɗa həji ma zlima ma Bizlaf aagi, kaw aa mbəl ka. Dəba aagi agəl ma tə: Ndiɓi aagi ramahkaɗ, ndiɓi aagi raŋkwah, ndiɓi aagi teemeri.»
Maŋgəla ma ata patərla
(Mat 5.15; 10.26; Luk 8.16-18; 11.33; 6.38)
21Yesu zlap a zlapatana zhana, iŋgaya: «Andza ala tadaaha patərla ya, a dzəɓ ka aska wədzəm vəw? Aka səku, a tsəzə ka a wəzaha aska rəŋgaw vəw? Aɓa azha ci, a tsəzə ka ata la ma tsəham a wəzlaf. 22Səkən ma ɓahaɓah aagi tiwtiw, həji agəra, kala səkən ma ɗal ata digh aagi, aagi aghala ta a la ma ghwaɗeɗe. 23Andza ala abə zləm a tehi, matehi!» 24Zlap Yesu a zhin a zlapatana, iŋgaya: «Huni mbəla ŋkwaɓ abə ma ndə huni kazlima aagi! Səkən ndə huni slaŋgalatana səkən a həji aagi abə sha, Bizlaf a aslaŋgalahuni aŋkuni andza sha. A aɗalahuni dəy aha. 25Ara ndə a ɗa, həji vəlanə səkən ana ala ndə səkən ara. Ama, ala ndə səkən a ŋkula ndza ara, kwa ma kajik ndə a kadeŋ a heɗe, həji aji a bəza ara.»
Maŋgəla ata shiŋ səkən ma kadəfaɓa ha tə
26Yesu zlap a zlap zhana, iŋgaya: «La ndza bay Bizlaf a saɓ andza ala ma zləga shiŋ səkən tə ka a hayak. 27Kwa a kawan, kwa a kandza abə nja, zaɗə abə bishkit, səkən ndə a zləgə watsa, a kadəf, a kagəl. Ama a kasən kata a ɗal avaŋgəyəs. 28Hayak ma kadəf ŋkəsaf watsa abə ha tə, ndə səkən a dəf tə, dəba a adaa ha, dəba a aba mbə. 29Ndə mbə tə a na tə, həji aji ambat a dzə ka ndə a kaɗa teete a dza,» iy.
Maŋgəla ma ndza ata mbə ma gəy guma
(Mat 13.31, 32-34; Luk 13.18-19)
30Yesu zlap a zlap, iŋgaya: «Həji asaɓ Bay Bizlaf abə veme? Abə maŋgəla ma a vata abə həji aa ghalə? 31A ndza andza mbə ma gəy guma, ndə həji zləgə ka a hayak, sha ana ma feŋ a taba shiŋ səkən ma ata manahayak aagi tiwtiw. 32Ama, ndə həji zləgə ka ya, dəf a dəf tə, gəl a gəl tə dəy aha mpi aagi tiwtiw. A kaza ra bay tə, vigin aagi kandaha a lam jak aska kushaŋ tə.»
33Yesu tasərəkatana ma abə maŋgəla aagi vərəm andza watsə, a zlapatana abə səkən ndə aa kaazlima. 34Ma ndə a ŋkula ghalatana abə maŋgəla akas. Ama ndə a ɗa gagagha tə abə magəli tə aagi, tsa kaghalatana ma ma ndza a maŋgəla watsa aagi tiwtiw.
Yesu tagar valalay ka
(Mat 8.23-27; Luk 8.22-25)
35Ma vah watsa abə ŋtsəɓahw, Yesu zlap a zlapatana a magəli tə aagi, iŋgaya: «Kiyzamtakwa a bəza aha ma zlazlər,» iy. 36Mbasl aa mbasl ŋgaɓa həji aagi aka. Magəli tə aagi jaɓ aa jaɓ Yesu abə gəlmbə. Gəlmbə ndiɓi aagi a tsutsa huk abəra aka. 37Dəba valalay a adza abə ɓərɓər tə, yəm a kusah buŋkwa buŋkwa a riy a gəlmbə, slaɓ a pik. 38Yesu tawan tə a wəzaha ata nduŋ a gəlmbə, tatsa ha tə ka ata səkən ta tsa ha tə. Fəɗah aa fəɗah ka ana magəli tə aagi, aagi kəsha iŋgaya: «Madagal, həji kaɗiw a bazl takwa, kwalay kwa aka wəra?» 39Yesu fəɗah a fəɗah tə, dəba a agulak valalay abə ɓərɓər tə: «Ndza ka ɗekɗek!» iy. Gar a gar tə ka, ɗekɗek ana valalay. 40Yesu zlap a zlapatana a magəli tə aagi, iŋgaya: «Huni ɗal ŋzliŋ ara veme? Huni tanaka a ɗal awa aska ma Bizlaf ma ndza a ꞌunəf kuni aka wəra?» 41Ama aa taɗal ŋzliŋ aka a guɗaŋ, aa kazlap a walaŋ ha ta: «Shiŋ ala ndə kwa valalay a kazlimanə zlima abə mtil watsə vaya?» aagiy.
Valið núna:
:
Áherslumerki
Deildu
Afrita
Want to have your highlights saved across all your devices? Sign up or sign in