Jang 18
18
Baak rngiêl, baak chhưt u baak rêh kươi Brah Jê-sus ri
(18:1–21:25)
Brah Jê-sus dol nhôp
(Ma-thi-ơ 26:47-56; Mak 14:43-50; Lu-ka 22:47-53)
1Di kươi ja r'bon dan, Brah Jê-sus han n'hai bơl jơrnơ rlach mak tôw n'hoor daak Kêt-rôn; tu nei geh di mir, Pang pôl bơl jơrnơ han mưt u nei. 2Ju-đa, bah ndun Pang, kot gưt ktôk au đươm Brah Jê-sus u bơl jơrnơ rnđơơih ta pơrgum tu au. 3Bei nei, Ju-đa liêu di phung lênh pôl n'hai dêch drêên bơl yau thwaai ndap ttơơm ri u bnih Pha-ri-si tơt nei, kan đeng, ôinh snuôl u sơndal. 4Brah Jê-sus gưt leq sêch ntil ơơn a kươi lôh tơt aan nơơm, mơ han tơt u ôp: “Bơl 'bei wơng 'bơơn?” 5Bu ơh: “Jê-sus bnih Na-sa-ret.” Brah Jê-sus mor: “Nơơm Hei au!” Ju-đa, bah ndun Pang, kot ta yoong a nei n'hai bu. 6Tơt Brah Jê-sus mor: “Nơơm Hei au” nei bu kot rônh kơơi u a kơq u teh. 7Pang ôp nha: “Bơl 'bei wơng 'bơơn?” Bu ơh: “Jê-sus bnih Na-sa-ret.” 8Brah Jê-sus mor: “Hei ja maanh bơl 'bei, nơơm Hei a au. Bei nei, mơq bơl 'bei wơng nhôp Hei nei phrui aan pal bnih au han.” 9Ntil au dip plak baak Pang ja lah: “Koon 'bưn teq saap mbu 'bơơn knông pal bnih Bươp ja ươn aan Koon.” 10Si-môn Phi-e-rơ geh pêh đao, hôt kơndaal, pơm dêch yau thwaai ttơơm ri, sreh tech tôr ma bnih au ri. Dêch nei chhak laa Man-chu. 11Brah Jê-sus maanh Phi-e-rơ: “Phrui prap pêh 'bei ri teq u smoop! Tgaan pa Bươp ja ươn aan Hei, Hei leet 'bưn ôn laang?”#Mat 26:39; Mak 14:36; Lu 22:42.
Brah Jê-sus di mat An-ne. – Phi-e-rơ dmôw Brah
(Ma-thi-ơ 26:59-75; Mak 14:55-72; Lu-ka 22:55-71)
12Plah nei, bơl lênh n'hai nơơm kan lênh u bơl dêch drêên bnih Jo-thai ri nhôp Brah Jê-sus u kơt broih. 13Noor leq, bu jưn Pang tơt An-ne, đươm bu laa bươp pôw Kai-phe ri, bnih plah lơh yau thwaai ttơơm knông snam nei. 14Nơơm Kai-phe laa bnih ja pơrgênh n'hai bnih Jo-thai laah: “N'hop n'hal teq mbu bnih chhưt đươm leq raih nei nha huôih.”#Ja 11:49-50.
15Si-môn Phi-e-rơ u mbu jơrnơ nday han tênh Brah Jê-sus. Jơrnơ au ơih gưt yau thwaai ttơơm, mơ mưt n'hai Brah Jê-sus knông tal lơwaang yau thwaai ttơơm ri. 16Nha Phi-e-rơ nei ta yoong mak gaaih, dơơh lpôông. Bei nei, jơrnơ tôw, bnih ơih gưt yau thwaai ttơơm, han sot mor n'hai mei dơur kray lpôông, ja nei liêu Phi-e-rơ mưt. 17Mei dơur kray lpôông mor n'hai Phi-e-rơ: “'Bưn geh ay kot laa di mbu knông bơl jơrnơ bnih ri nei laang?” Phi-e-rơ ơh: “'Bưn geh hei.” 18Đươm mang l'ik mơ bơl dêch u bơl dêch drêên pur ôinh, ja nei ta yoong jah nhjơr ôinh. Phi-e-rơ kot ta yoong nhjơr ôinh n'hai bu.
19Yau thwaai ttơơm ôp Brah Jê-sus teq u bơl jơrnơ u baak kne Pang ri. 20Brah Jê-sus ơh: “Hei ja mor srlah aan teh lôôk. Hei rnđơơih kne knông pal nhi pơrgum u nhi r'bưn, ktôk leq sêch bnih Jo-thai ta pơrgum, nei Hei 'bưn mor ntil ơơn pôn ndơp laang. 21A hay 'bei leet ôp trach Hei? Khang ôp pal bnih ja iat Hei, mơq Hei ja mor ơơn n'hai bu. Pal bnih nei gưt pal ntil Hei ja mor.” 22Tơt Pang mhei luôih mor, di mbu bah knông phung dêch drêên plah ta yoong tu nei pơih ti taap teq u bom Pang u mor: “'Bei baanh ơh yau thwaai ttơơm bei au laang?” 23Brah Jê-sus ơh: “Mơq Hei mor tih, phrui tơrsau ktôk tih ơơi; Nha mơq Hei lah dip, a hay 'bei leet pơm Hei?” 24An-ne maanh jưn Brah Jê-sus nha plah dol kơt tơt yau thwaai ttơơm Kai-phe.
25Plah Si-môn Phi-e-rơ nha plah dơk nhjơr ôinh, bu ôp pang: “Bi kot laa mbu knông nak bơl jơrnơ pang nei ri lah 'bưn?” Phi-e-rơ dmôw u ơh: “'Bưn geh hei.” 26Di mbu knông bơl dêch yau thwaai ttơơm ri, geh mbaang n'hai bnih Phi-e-rơ ja sreh tech tôr, mor: “'Bưn geh nơơm hei ja sau 'bei gôq knông mir n'hai bu nei laang?” 27Phi-e-rơ di wưt nha leet dmôw, kơl dal iêr ndrau.
Brah Jê-sus di mat Phi-lat
(Ma-thi-ơ 27:1,2,11-14; Mak 15:1-5; Lu-ka 23:1-5)
28Bei nei, bu jưn Brah Jê-sus a nhi Kai-phe tơt nhi yau tông. Plah nei laap aang ôi. Nơơm bu 'bưn mưt knông nhi, jah rlach dol jrơơk jrơơm, u kươt sa ryơơng Chloong Rlach. 29Nei mơ, Phi-lat han sot, lôh n'hai bu u mor: “Bơl 'bei pnđing bnih au đươm kaar ơơn?” 30Bu ơh: “Mơq bnih au 'bưn geh laa bah lơh ap nei bơl hei 'bưn ndơơp aan kan ttih.” 31Phi-lat mor n'hai bu: “Bơl 'bei khang liêu bu nei ơơi u pơrkat tênh ch'bap bơl 'bei ri.” Bnih Jo-thai ơh: “Bơl hei 'bưn kươt ch'bap pơrkat 'bơơn đôôi.” 32Ntil au dip plak baak Brah Jê-sus ja mor, lap pơrgap tơt kaar Pang phrui chhưt bei êch.#Ja 3:14; 12:32. 33Phi-lat plơq kơơi nhi yau tông, khuôl Brah Jê-sus u ôp: “Ay geh dip laa snđach raih Jo-thai 'bưn?” 34Brah Jê-sus ơh: “Ay lah êêng ntil au, paich geh 'bơơn nday lah aan 'bei teq u Hei?” 35Phi-lat ơh: “Hei geh laa bnih Jo-thai laang? Raih bal ay u pal yau thwaai ndap ttơơm ja ndơơp ay aan hei. Bei nei ay ja lơh ơơn?” 36Brah Jê-sus ơh: “Nggoor Hei ri 'bưn pơơn teq u swich teh au. Mơq nggoor Hei ri pơơn teq u swich teh au nei pal bnih tênh Hei ja ta lơh hơơi, 'bưn teq Hei dol ndơơp teq u ti bnih Jo-thai. Dôh nggoor Hei ri 'bưn pơơn teq u swich teh au.” 37Phi-lat mor: “Bei nei ay lah snđach neh?” Brah Jê-sus ơh: “Nơơm ay mor Hei laa snđach. Au laa rơ kheet a hay Hei ja lgơơch, a hay Hei ja jưr swich teh au: Nei laa jah lơh ndraanh aan song klanh. Paich 'bơơn pơơn teq u song klanh kot iat baak Hei.” 38Phi-lat ôp: “Song klanh laa ơơn?”
Di kươi ja mor bei nei, Phi-lat leet han sot a mơp bnih Jo-thai u mor: “Hei 'bưn wơng sau bnih au geh dôih ơơn laang. 39Dôh tênh rnđơơih bơl 'bei ri, khang tơt ryơơng Chloong Rlach nei hei krôih aan bơl bei mbu chhak khaam. Bei nei, bơl 'bei geh êch hei krôih snđach raih Jo-thai aan bơl 'bei 'bưn?” 40Bu leet troh mơh: “Khơơm krôih bu, phrui krôih Ba-ra-ba!” Ba-ra-ba ơơm laa mbu bnih ttung.
Valið núna:
Jang 18: SBL2024
Áherslumerki
Deildu
Afrita
Want to have your highlights saved across all your devices? Sign up or sign in
© 2024 Bible Society Vietnam. All rights reserved.