انجیلِ لوقا 5
5
اَوَلین شاگِردَلِ عیسی
1یِه رو که عیسی ویسایَه بی هیبِی دریاچۀ جِنیسارِت وِ جمعیت وَ همَه لَت هِلَش اینان تا کلامِ خدا نَه بِشنِفِن، 2عیسی هیبِی دریاچَه دِتا قایق دی که ماهیگیرَل وَشون دَراومَیَه بییِن وِ سَرگَرمِ شُسَنِ تورَلِشون بییِن. 3عیسی سوار وابی وَ یکی وَ قایِقَل که این شَمعون بی وِ وَش خواس قایقَه یِچِی وَ خشکی دیر کنه وِ در حالی که مِنِه قایق نِشَسَه بی وَ مردم تعلیم ایدا. 4وختی گَپَلِش تموم وابی، وَ شمعون گُت: «قایقَه بُویَر وَ جِی غورِ اُو، وِ تورَلِتونَه سی ماهی گِرُتَن وِربییت مِنِه اُو.» 5شمعون جواب دا: «استاد، تمومِ شو نَه مهلی زَحمت کَشیئیم وِ چیئی نَگِرُتیم. امّا ایسِه کِه تِ ایگی، تورَلَه وِراییم مِنِه اُو.» 6وختی ای کارَ کِردِن، ایقَزَه ماهی گِرُتِن که چی نَمُندَه بی تورَلِشون بِدِرِه! 7وَ هُمکارَلِ خِشون که مِنِه یِه قایق دَ بییِن، بی اِشارَه خواسِن که بیان وَ کِمَکِشون. اونگَل اومَن وِ هر دِتا قایقَه ایقَزَه وَ ماهی پر کِردِن که چی نَمُندَه بی بِرَن زِرِ اُو. 8وختی شمعونِ پطرس یِنَه دی، اُفتا وَ پایَلِ عیسی وِ گُت: «ای خداوند، وَ مِ دیر وابو، سییِکِه مِ گِناکارُم!» 9سییِکِه خُوش وِ هُمکارَلِش وَ ماهییَلی که گِرُتَه بییِن حیرتزیَه بییِن. 10یعقوب وِ یوحنا، کُرَلِ زِبدی هم، که هُمکار شمعون بییِن، هَمی حالَه داشتِن. عیسی وَ شَمعون گُت: «زَلَت مَرَه، وَ یِه واپَس وَ جِی ماهی مردِمَه صید ایکِنی.» 11هَمیِکِه قایقَلِ خِشونَه آوُردِن وَ خشکی، همه چی نَه وِل کِردِن وُ وَ دینِ عیسی رُونَه وابییِن.
شَفِی مِرد جذامی
12یِه رو دَ وختی عیسی مِنِه یکی وَ شهرَل بی، مِردی اومَه که جذام تموم بَیَنِشَه گِرُتَه بی. وختی او جذامی عیسی نَه دی، سَجدَه کِه وِ بی التماس گُت: «خداوند، اَر بِخِی ایتَری مِنَه شفا بِیی.» 13عیسی دَسِ خِشَه دِراز کِه وِ دَس نَها وَ ریش وِ گُت: «ایخوام؛ شفا بِگِه!» هَمو دَقَه، او مِرد وَ جذام شَفا گِرُت . 14اوسِه عیسی وَش قَدَقَن کِه ای جریانَه سی کَسی نَگُ بلکَم وَش گُت: «بِرَه وِ خِتَه وَ کاهِن نِشون بییِه وِ او قُربونی نَه که موسی سی خاطرِ پاک وابییَن وَ جذام دستور دایِه، تقدیم کُ تا وَ اونگَل نِشون بییِه که شَفا گِرُتییِی.» 15امّا وا ای هَمَه، خَوَرِ کارَلِ عیسی بیشترَبیشتَر ایپیچِس، طوری که جماعَتَلِ زیادی جَم ایابییِن تا گَپَلِشَه بِشنِفِن وُ وَ مریضی یَلِشون شفا بگِرِن. 16امّا عیسی ایرَت وَ جایَلی دیر وَ مردم تا مِنِه تِنایی دعا کِنِه.
شَفِی مِردِ فلج
17مِنِه یکی وَ او روزَل، دَر حالی که عیسی تعلیم ایدا، عالِمَلِ فرقۀ فَریسی وِ معلملِ تورات وُچه نِشَسَه بییِن. اونگَل وَ اورشلیم وِ تَمومِ دهاتَل وِ شَهرَلِ وِلاتِ جلیل وِ یهودیَه اومَیَه بییِن. قدرت خداوند سی شَفِی مریضَل بِی عیسی بی. 18مِنِه او بین، چَنتا مِرد وَ رَه رَسییِن که فلَجی نَه سر تختی ایاوُردِن. اونگَل تلاش کِردِن وِّ نَه بُویَرِن مِنِه حونَه وِ بِنِن دَمِ ری عیسی. 19امّا وَ خاطِرِ زیادیِ جمعیت نَتَرِسِن رَیی بِجورِن که وِّ نَه بویَرِن مِنِه حونَه، پَ رَتِن سرِ تُو وِ سفالَلَ وَگِرُتِن وُ وَ مابینِ سفالَل فلجَه بِی جاش دان دومِن وِ نَهان مِنِه دلِ جمعیت، دَمِ ری عیسی. 20وختی عیسی ایمونِ اونگَلَه دی، گُت: «ای مِرد، گِنایَلِت آمرزییَه وابی!» 21معلملِ تورات وِ عالِمَلِ فَریسی بِی خِشون گُتِن: «یِه کیَه که کُفر ایگُ؟ غیرَ خدا کی ایتَرِه گِنایَلَه بیامُرزِه؟ 22وختی عیسی فَمِس که چه فکری ایکِنِن وَشون پُرسی: «سیچِه مِنِه دِلی ایطو فکر ایکِنیت؟ 23گُتَنِ کویَکی آسونتَرِه: "گِنایَلِت آمرزییَه وابی" یا یِکِه "وَری وِ رَه بِرَه"؟ 24امّا سییِکِه بِیونیت کِرِ انسان وَ ری زمین، اقتدارِ آمرزییَنِ گِنایَلَه دارِه...» - پَ ری که وَ او مِرد فلج وِ گُت: «وَ تِ ایگُم: وَری، جاتَه وَگِه وِ بِرَه حونَت!» 25دَرجا، او مِرد دَمِ ریشون وَریسا وِ جایی نَه که سَرِش خوسییَه بی وَگِرُت وِ مِنِه حالی که خدا نَه شکر ایکِه رَت وَ حونَش. 26همه وَ ای جریان حیرتزَیَه وابییِن وِ خدا نَه ستایش کِردِن وِ مِنِه حالی که هَمَشونَه ترس وَگِرُتَه بی، ایگُتِن: «اُمرو چییَلِ عجیبی دییم.»
دعوت وَ لاویِ خَراجگیر
27بعدَ یِکِه عیسی وَ او حونَه اومَه وَدَر، خَراجگیری نَه دی که نومِش لاوی بی، که مِنِه تُو خَراجگیری نِشَسَه بی. عیسی وَش گُت: «وَ دینِ مِ بیو.» 28لاوی وَریسا، هَمَه چینَه وِل کِه وُ وَ دینِ عیسی رُونَه وابی.
29لاوی مِنِه حونِی خُوش مِمونی گَپویی سی عیسی بَر پا کِه، وِ عِدۀ زیادی وَ خَراجگیرَل وِ مردمِ دییَه هَم، بِی عیسی وِ شاگِردَلِش سرِ سفرَه بییِن. 30امّا عالِمَلِ فَریسی وِ عِدِهای وَ معلملِ تورات که وَ دَسِی فَریسییَل بییِن، بِی غُرَغُر کِردَن وَ شاگِردَلِ عیسی گُتِن: «سیچِه بِی خَراجگیرَل وِ گِناکارَل ایخَریت وِ اینوشیت؟» 31عیسی مِنِه جوابِشون گُت: «مَریضَلِن که وَ طبیب اِتیاج دارِن، نَه آیَمَلِ سالم. 32مِ نَیومَمِه تا صالِحَلَه، بلکم تا گِناکارَلَه وَ توبَه دعوت کِنُم.»
سئوال در مورد روزَه
33اونگَل وَ عیسی گُتِن: «شاگِردَلِ یحیی بیشترِ موقِهیَل روزه ایگِرِن وِ دعا ایکِنِن؛ شاگِردَلِ عالِمَلِ فَریسی هم هَمی کارَ ایکِنِن، امّا شاگِردَلِ تِ همیشَه در حالِ خَردَن وِ نوشییَنِن.» 34عیسی وَشون جواب دا: «مَه ایابو دوسَلِ دوما نَه تا موقِی که دوما باشونِه، وَ روزَه گِرُتَن واداشت؟ 35امّا زَمونی ایایِه که دوما وَشون گِرُتَه وابو. مِنِه او روزَل روزَه ایگِرِن.» 36عیسی ای مَثَلَه هَم سیشون آوُرد: «هیشکَه وَ جومِی نو، تِلیشی نیبِرِه تا وِه نَه پَرو کِنِه وَ جومِی کُهنَه. اَر ای کارَ کِنِه، هم جومِی نو نَه پَرَه کِردِه وِ هم پارچِی نو وَ جومِی کُهنَه نیا. 37همیطو کسی شراب نو نَه نیریزِه مِنِه مشکَلِ کُهنَه. اَر ای کارَ کِنِه، شراب نو مَشکَلَه ایدِرنِه وِ شراب حَروم ایابو وِ مَشکَل هَم وَ بِین ایرَن. 38بَله، شرابِ نو نَه باید رِت مِنِه مشکَلِ نو. 39وِ کسی بعدَ خَردَنِ شرابِ کُهنَه، شراب تازَه نیخوا، سییِکِه ایگُ: "شرابِ کُهنَه بِختَرِه."»
Valið núna:
انجیلِ لوقا 5: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company