انجیلِ لوقا 15

مثلِ میشِ وَلا وابی‌یَه

1باجگیرَل وِ گِناکارل همَشون طی عیسی جَم ایابییِن تا گَپَلِشَه بِشنِفِن. 2عالِمَلِ فرقۀ فَریسی وِ معلملِ تورات غُرَغُر ایکِردِن وِ ایگُتِن: «ای مِرد، گِناکارَلَه قبول ایکِنِه وِ باشون هُمسفرَه ایابو.»

3پَ عیسی ای مثلَه سیشون آوُرد: 4«کویَکی وَ ایشانِه که صد میش داشتَه بو وِ وختی یکی وَ اونگَل وَلا وابو، او نود وُ نُه میشِ دَ نَه مِنِه صحرا وِل نَکِنِه وُ وَ دینِ او وَلا وابی‌یَه نَرَه تا وِه نَه بِجورِه؟ 5وِ وختی میشِ وَلا وابی‌یَه نَه جُس، وِه نَه بِی شایی اینِه سرِ کولِش. 6وِ وختی ایا وَ حونَه، تَمومِ رَفیقَل وِ هُمسایَلِشَه صیا ایکِنِه وِ ایگُ: "بِی مِ شایی کنیت، او میشِ وَلا وابی‌یَمَه جُسِمِه." 7وَ ایشا ایگُم، همیطو سی یِه گِناکار که توبه ایکِنِه، جشن و شایی گَپوتری مِنِه آسمون بَرپا ایابو تا سی نود وُ نُه صالح که اِتیاج وَ توبه نَیارِن.»

مَثَل سِکِۀ وَلا وابی‌یَه

8«وِ یا کو زَنِه که ده سِکِۀ نقرَه داشتَه بو وِ وختی یکی وَ اونگَل وَلا وابو، چراغی بُر نَکِنه وِ حونَه نَه نَرِفِه وِ تا وِه نَه نَجوره، وَ جُسَن نَوِیسه؟ 9وِ وختی وِه نَه جُس، تَمومِ رَفیقَل و هُمسایَلِشَه صیا ایکِنِه وِ ایگُ: "بِی مِ شایی کنیت، او سِکِۀ وَلا وابی‌یَمَه جُسِمِه." 10مِ وَ ایشا ایگُم، همیطو، سی یِه گِناکار که توبَه ایکِنِه، مِنِه حضور فرشتِه‌یَلِ خدا جشن و شایی بَرپا ایابو.»

مَثَلِ کِرِ وَلا وابی‌یَه

11اوسِه عیسی فرمایش کِه: «مِردی دِ کُر داشت. 12یِه رو کِرِ کِچِلو وَ بُوش گُت: "ای بُو، بَهری نَه که وَ داراییت وَ مِ ایرَسِه، ایسِه وَم بییِه." پَ بُو دارِییشَه بین او دِتا بَهر کِه. 13بعدَ یِچِی، کِرِ کِچلوتر هر چیئی که داشت جَم کِه وِ رایی دیاری دیردس وابی وِ داراییِ خِشَه وَ وُچه بِی عیاشی وَ بای دا. 14وختی هرچه داشت خرج کِه، قحطی سختی مِنِه او دیار اومَه وُ وِّ مهلی دَسِش تَنگ وابی. 15سی هَمیو، کارگرِ یکی وَ مَردِمونِ او دیار وابی، وِ او مِرد وِّ نَه بِسی کِه وَ مزرعۀ خُوش تا خوکَلَه بِچَرِه. 16کُر اُرزو داشت کِمِشَه بِی غَذِی خوکَل سیر کِنه، امّا هیشکَه چیئی وَش نیدا. 17عاقبت وَ خِش اومَه وِ گُت: "پَ بسا کارِگَرَلِ بُوم غَذِی اضافی هم دارِن وِ مِ وِیچِه وَ گُسنِه‌ای ایمیرُم." 18پَ ایوَریسُم وِ ایرَم طی بُوم وِ ایگُم: "ای بُو، وَ حقِ خدا وُ وَ حقِ تِ گِنا کردِمِه. 19دَ لیاقت نیارُم کِرِت خُوندَه وابوم. بام می یکی وَ کارگرَلِت رفتار کُ."

20پَ وَریسا وِ رایی حونِی بُو وابی. هَنی یِکِلی تا حونَه مُندَه بی که بُوش وِّ نَه دی، دِلِش وَ حالِش سُت وِ جِکِس وَ طَرَفِش، بغلِش کِه وِ بوسِش کِه. 21کُر گُت: "ای بُو، وَ حقِ خدا وُ وَ حقِ تِ گِنا کِردِمه. دَ لیاقت نیارُم کِرِت خُوندَه وابوم." 22امّا بُو وَ غلامَلِش گُت: "بِجِکیت! بِتَرین قَبا نَه بیاریت کِنیت وِ وَرِش. انگشتری وَ پِنجَش وِ اُورسی وَ پایَلِش کنیت. 23او گویَرِ پروارَ بیاریت، سر بوئوریت تا بِخَریم وِ جشن بِگِریم. 24سی‌یِکِه ای کِرِ مِ مردَه بی، ایسِه اُمبِلا زنده یَه؛ وَلا وابی‌یَه بی، ایسِه جُسَه وابی‌یِه!" پَ جشن وِ شایی بَرپا کردن.

25«امّا کِرِ گَوتَر سرِ زمین بی. وختی نِزِنگ وابی وَ حونَه وِ صییِی ساز وُ دِهُل وِ وَربازیَنَه اِشنُفت، 26یکی وَ خذمتکارَلَه صیا کِه وِ پُرسی: "چه خَوَرِه؟" 27خذمتکار جواب دا: "کَکات اومَیِه وِ بُوت سی‌یِکِه وِّ نَه اُمبِلا ساق‌وُسلامت جُسِه، او گویَرِ پروارَ سیش سر بِرییِه." 28امّا کِرِ گَپو تَش گِرُت وِ نَخواس بِرَه وَ حونَه. پَ بُوش اومَه وَدَر وِ وَش التماس کِه. 29امّا وِّ مِنِه جوابِ بُوش گُت: " سِی کُ، مِنِه تَمومِ ای سالَل مِی غلام خذمَتِت کِردِمِه وِ هیچ فِرمونیتَه نَنَهامِه ری زمین. وا ای حال تِ هیچ وَخت حتی کَرَه‌ای وَم نَدِی تا بِی رَفیقَلُم جَشنی بِگِرُم. 30امّا ایسِه که ای کِرِت وَرگَشته، کِری که داراییِ تِنَه بِی بَدکارِه‌یَل وَ بای دایِه، سیش او گویَرِ پروارَ سر بِری‌یِی!" 31بُو گُت: "رو، تِ همیشَه بِی مِنی، وِ هرچه دارُم، این تِنِه. 32امّا ایمِجال دِرِسِش یِنِه که جشن بِگِریم وِ شایی کِنیم، سی‌یِکِه ای کَکِی تِ مردَه بی، وِ ایسِه زندَه یَه؛ وَلا وابی‌یَه بی، جُسَه وابی‌یِه!"»

Valið núna:

انجیلِ لوقا 15: SLB

Áherslumerki

Deildu

Afrita