انجیلِ یوحنا 4

عیسی وِ زن سامری

1وَختی عیسی خداوند فَمِس که عالِمَلِ فرقه فَریسی اِشنُفتِنِه که عیسی بیشترَ یحیی شاگرد دارِه وِ تعمیدشون اییِه 2(شاگردلِ عیسی تعمید ایدان نَه خُوش) 3وَ یهودیه زَه وَدَر وِ اُمبِلا وَرگشت وَ جلیل. 4وِّ ایبایِس وَ وِلاتِ سامرَه رَی ایابی. 5پَ رَسی وَ شهری مِنِه وِلاتِ سامِرَه وَ نومِ سوخار، نِزِنگِ زمینی که یعقوب دایَه بی وَ کِرِش یوسف. 6چَه یعقوب وُچِه بی وِ عیسی خَسَه وَ سفَر نِشَس طِی چَه. حدودِ ساعت دُوازۀ ظهربی.

7مِنِه ای موقَع، زنی وَ مَردِمونِ سامِرَه اومَه سی اُو کَشییَن. عیسی وَش گُت: «گِلِپی اُو وَم بییِه» 8سی‌یِکِه شاگردَلِش سی اِسَیَنِ غذا رَتَه بییِن وَ شهر. 9زَنِ سامری وَش گُت: «چطو تِ که یهودی یِی، وَ مِ که زنی سامِری یَم اُو ایخِی؟» سی‌یِکِه یَهودی‌یَل بِی سامِری‌یَل اومَدِ رفت نیکِردِن. 10عیسی مِنِه جواب گُت: «اَر وَ چیئی که خدا بی‌عَوَض پیشکِش اییِه خَوَر داشتی، وِ دونِسی کی وَ تِ اُو ایخوا، تِ خُوت وَش ایخواسی، وُ وَ تِ اُو حیات ایدا.» 11زن وَش گُت: «ای آقا، دول نَیاری وِ چَه غورِه، پَ اُو حیات وَ کوچِه ایاری؟ 12مَه تِ وَ بو ایما یعقوب گَپوتَری که ای چَه نَه دا وَ ایما، وِ خُوش وِ کُرَلِش وِ گَلِه‌یَلِش وَش ایخَردِن؟» 13عیسی گُت: «هرکه وَ ای اُو ایخَرِه، اُمبلا تشنَه ایابو. 14امّا هرکه وَ او اُو که مِ وَش بییُم بِخَرِه، وَتَه تشنَه نیابو، بلکم اُویی که مِ اییُم مِنِش چشمه‌ای ایابو که تا وَ حیاتِ ابدی غِل ایزَنِه.» 15زن وَش گُت: «ای آقا، وَ ای اُو وَم بییِه، تا دَ تشنَه نَوابوم وِ سی اُو کَشییَن نَیام وِیچو.» 16عیسی گُت: «بِرَه میرَتَه صیا کُ وِ وَرگَرد.» 17زن جواب دا: «میرَه نَیارُم» عیسی گُت: «راس ایگِی که میرَه نَیاری، 18سی‌یِکِه پنج میرَه داشتی‌یِی وُ وِّ هَم که ایسِه داری، نَه میرَتِه. اوچیئی که گُتی راسِه!» 19زن وَش گُت: «ای آقا، ایبینُم که پیغمبری. 20بُویَلِ ایما مِنِه ای کُو پرستش ایکِردِن، امّا ایشا ایگِیت جِیئی که بایِس مِنِش پرستش کِه اورشلیمِه.» 21عیسی گُت: «ای زن، باوَر کُ، زمونی ایرَسِه که بُو نَه، نَه مِنِه ای کُو پرستش ایکِنیت، نَه مِنِه اورشلیم. 22ایشا اوچیئی نَه که نیشناسیت ایپَرستیت، امّا ایما اوچیئی نَه که ایشناسیم ایپَرستیم، سی‌یِکِه نجات وَ واسطۀ قومِ یهود ایا. 23امّا زمونی ایرَسِه، وِ هَمیسه رَسییِه، که کسلی که خدا نَه وَراسی ایپَرَستِن، بُو نَه مِنِه روح وُ مِنِه راستی پرستش ایکِنِن، سی‌یِکِه بُو وَ دینِ کسلی یَه که ایطو پَرستِش ایکِنِن. 24خدا روحِه وِ کسلی که ایپَرستِنِش بایِس وِّ نَه مِنِه روح وُ مِنِه راستی بِپَرَستِن.» 25زن وَش گُت: «دونُم که مسیحِ موعود ایایِه؛ وَختی وِّ بیا، هَمَه چی نَه سی ایما آشکار ایکِنِه.» 26عیسی وَش گُت: «مِ که بِی تِ گَپ ایزَنُم، هَموِّنُم.»

27هَمو دَقَه، شاگردلِ عیسی وَ رَه رَسییِن وِ تعجب کِردِن که بِی زنی گَپ ایزَنِه. امّا هیچ کویَکی نَپُرسی «چه ایخِی؟» یا «سیچِه باش گَپ ایزَنی؟» 28اوسِه زن، کوزَشَه جا نَها وِ رَت وَ شهر وُ وَ مردم گُت: 29«بی‌یِیت مِردی نَه بِوینیت که هرچی تا ایسِه کِردَه بییُم، وَم گُت. مَه ایابو وِّ مسیحِ موعود بو؟» 30پَ اونگَل وَ شهر اومَن وَدَر، وِ رونَه وابی‌یِن طِی عیسی.

31مِنِه ای بین، شاگردَل وَش خواهِشت کِردِن، گُتِن: «استاد، چیئی بِخَه.» 32امّا عیسی وَشون گُت: «مِ غَذایی سی خَردَن دارُم که ایشا چیئی وَش نُونیت.» 33شاگردَل وَ یَک گُتِن: «مَه کسی سیش غذا آوُردِه؟» 34عیسی وَشون گُت: «غَذِی مِ یِنِه که خواسِ کسی نَه که مِنَه بِسی کِردِه وَجا بیارُم وِ کارِ وِّ نَه کامل اَنجوم بییُم. 35مَه ای گَپَه نَشنُفتیتِه که "چار ماه بیشتر وَ مُوسِمِ بِرییَن نَمُندِه"؟ امّا مِ وَ ایشا ایگُم، تییَلِتونَه واز کِنیت وِ بِوینیت که هَمیسِه کشتزارَل آمایۀ بِرییَنِه. 36همیسِه، دروگر مِزِ خِشَه ایسونِه وِ مَصولی سی حیاتِ ابدی جَم ایکِنِه، تا کسی که ایکارِه وِ کسی که ایبِرِه بِی یَک شایَمون وابون. 37وَ وِیچو ای گُتَه دِرِسِه که "یکی ایکارِه وِ یکیدَه ایبِرِه". 38مِ ایشا نَه بِسی کِردُم تا مَصولی نَه بوئوریت که نَه دسرنجِ خِتونِه. بقیَه سخت کار کِردِن وِ ایشا دسرنج اونگَلَه جَم ایکِنیت.»

39پَ وَ دینِ شَهادَتِ او زن که گُتَه بی «هر چیئی که تا ایسِه کِردَه بییُم، وَم گُت» خیلی وَ سامری‌یَلی که مِنِه او شهر زِندِیی ایکِردن وَ عیسی ایمون آوُردِن. 40وختی او سامِری‌یَل اومَن طِی عیسی، وَش خواسِن وِیسِه طِیشون. پَ دِ رو وُچِه وِیسا. 41وِ خیلی‌یَلِ دَ وَ خاطرِ اِشنُفتَنِ گَپَلِش ایمون آوُردِن. 42اونگَل وَ او زن ایگُتِن: «ایسِه دَ تِنا وَ خاطرِ گَپِ تِ ایمون نیاریم، سی‌یِکِه خِمون گَپَلِ وِّ نَه اِشنُفتیمِه وِ دونیم که ای مِرد وَراسی نجات دهندۀ دنیایَه.»

عیسی مِنِه جلیل

43اوسِه بعدَ او دِ رو، عیسی وَ وُچِه رَت وَ طرفِ جلیل، 44سی‌یِکِه خُوش گُتَه بی که «پیغمبَر مِنِه دیارِ خُوش حرمتی نَیارِه.» 45وختی رَسی وَ جلیل، جلیلی‌یَل وِّ نَه وَ گَرمی قبول کِردِن، سی‌یِکِه اونگَل هَم سی عید رَتَه بییِن وَ اورشلیم وِ اوچیئی نَه که عیسی وُچِه کِردَه بی، دییَه بییِن.

شَفِی کِرِ یِه درباری

46اوسِه یِه دَف‌دَه رَت وَ دهاتِ قانا مِنِه جلیل، هَموُچِه که اُو نَه شراب کِردَه بی. وُچِه یکی وَ درباری‌یَل بی که مِنِه کفرناحوم کِرِ مریضی داشت. 47وختی اِشنُفت عیسی وَ یهودیَه اومَیِه وَ جلیل، زی رَت وَ دییَنِش وِ التماس کِه، که بیا دومِن وِ کِرِشَه شفا بییِه، سی‌یِکِه کِرِش وَ حالِ مرگ بی. 48عیسی وَش گُت: «تا معجزه‌‌یَل وِ نِشونه‌یَل وِ چییَلِ عجیب نَبینیت، ایمون نیاریت.» 49او مِرد وَ عیسی گُت: «ای آقا، نِهِی یِکِه بَچَم بِمیرِه، بیو.» 50عیسی وَش گُت: «بِرَه؛ کِرِت زِندَه ایوِیسِه.» او مِرد کلامِ عیسی نَه قبول کِه وِ اُفتا وَ رَه. 51هَنی مِنِه رَه بی که خذمتکارَلِش اومَن وَ رَش، گُتِن: «حالِ کِرِت دارِه خوب ایابو.» 52وَشون پُرسی: «وَ چه ساعتی شروع کِه وَ خوب وابی‌یَن؟» گُتِن: «دیگ، مِنِه ساعتِ یکِ بعدظُهر تُو وِلِش کِه.» 53اوسِه بُو فَمِس که یِه هَمو ساعتی بی که عیسی وَش گُتَه بی: «کِرِت زِندَه ایوِیسِه.» پَ خُوش وِ تَمومِ اَهلِ‌اَیالِش ایمون آوُردِن. 54یِه دِومین نِشونَه وِ معجزه‌ای بی که عیسی موقِی که وَ یهودیَه اومَه وَ جلیل، اَنجوم دا.

Valið núna:

انجیلِ یوحنا 4: SLB

Áherslumerki

Deildu

Afrita